Vă hơtŏk pran tơdrong tơplih hăm kơmăy sô̆ tơ̆ anih jang kơ teh đak, tơgop pơm hơtŏk tơdrong đei yoa mưh vei lăng teh đak, hơmet pơ ‘lơ̆ng anih pơm hla ar păng pơih trong ăn tơdrong jang tŏk mŭk drăm, tơpôl, ‘năr 17/7, tơ̆ Hà Nội pơgơ̆r Hop akŏm Tơplih hăm kơmăy sô̆ tơ̆ Anih jang kơ teh đak- pơih trong ăn tơdrong jang tŏk mŭk drăm tơpôl yoa ƀăo Điên tư Radio nơ̆r pơma Việt Nam pơgơ̆r.

Ƀât mă tơdrong jang Kăch mang kơmăy kơmŏk 4.0 oei pơgơ̆r tôch pran, tơplih hăm kơmăy sô̆ jing tơdrong tôch gĭt kăl lơ̆m tơdỏng pơm hơtŏk tơdrong đei yoa mưh vei lăng teh đak, hơmet pơ ‘lơ̆ng anih vei lăng păng pơih trong ăn tơdrong jang tŏk mŭk drăm, tơpôl. Tơdrong tơmât yoa kơmăy sô̆ lơ̆m anih jang kơ teh đak ưh lăp đei yoa ăn dôm tơdrong jang tơ̆ anih jang kơ teh đak đĕch, mă oei pơjing tơdrong ‘lơ̆ng, hiôk hian ăn anih tĕch mơdro păng kon pơlei truh pơm bơ̆n hla ar hai.

Tơ̆ hop akŏm, ƀok Phạm Mạnh Hùng- Phŏ Kơdră chĕp kơ̆l Radio nơ̆r pơma Việt Nam pơma hơdăh, tơplih hăm kơmăy sô̆ pơih tơdrong ‘lơ̆ng vă jang tŏk, jing jơhngâm pran vang tơgop hơmet ming anih jang mŭk drăm, tơplih ‘nao trong vei lăng tơpôl păng hơtŏk tơdrong đei yoa mưh pơvih ăn kon pơlei, anih tĕch mơdro. Mă loi tơ̆ anih jang kơ teh đak hăm hơnăp jang tơƀôh trong chong glung oei dơ̆ng ƀât hơnăp tơdrong athei tơplih ‘nao, jang hăm kơmăy, hơtŏk hrĕnh tơdrong jang tŏk mŭk drăm, tơpôl.