Tơdrong tơchơ̆t đơ̆ng Hop akŏm tơlĕch đon pơhnŏng pơjing xăh jing xăh tơring tơrang ‘nao ‘lơ̆ng rŏ kơ dêh char. Xăh Ea Tul adrol kơ tơmât hơdai ‘nŏh jĭ 1 lơ̆m 6 xăh mă blŭng kơ dêh char Đắk Lắk jang kĕh tơring tơrang ‘nao. Đơ̆ng rŏng kơ tơmât hơdai, xăh đei 34.000 ‘nu bơngai, đei 12 hơdrĕch hơdrung pha ra băl; hlŏh 1 puăt ‘nŏh jĭ bơngai Ê đê. Iŏk yoa jô̆ păh lăp kiơ̆ kơ̆l bơngai lơ̆m xăh sơnăm 2025 đei hlŏh 60 triu hlak jên.

Đảng ƀô̆ xăh dang ei đei 58 Anih jang Đảng găh sư, hăm vă jê̆ 900 ‘nu đảng viên. Jăl jang đơ̆ng 2025 – 2030, Đảng ƀô̆ xăh Ea Tul chih hơdăh trong jang “Atŏk tơiung mŭk drăm – tơpôl ‘nŏh tơm, pơjing Đảng jĭ tơdrong tôch gĭt kăl, tưk tơiung joh ayŏ kơ dŏ xoang ‘nŏh jĭ tơdrong athei jang hơnơ̆ng, vei kơjăp tơdrong sơđơ̆ng teh đak jĭ tơdrong tôch gĭt kăl athei bơ̆ jang mă ‘lơ̆ng”; adrin tŏk jing xăh tơring tơrang ‘nao ‘lơ̆ng rŏ kơ dêh char Đắk Lắk, iŏk yoa jô̆ păh lăp kiơ̆ kơ̆l bơngai lơ̆m sơnăm 2030 đei 77 triu hlak jên.