Đảng bộ xăh Ea Mdroh xăh kăn kư̆ kach mang tơ̆ dêh char Đắk Lắk, ‘nao pơgơ̆r Hop akŏm bơngai tang măt ‘măng mă mônh, jăl jang 2025-2030. Hop akŏm hlôi tơlĕch ăn dôm hơnăp jang, trong jang hơdăh vă pơjing jơnei tơring tơrang ‘nao lơ̆m sơnăm 2030. Jăl jang ‘nao truh sơnăm 2030, Đảng bộ xăh Ea Mdroh tơlĕch ăn tơdrong hơgăt hơdrin pơjing tơring jang đang ‘lơ̆ng tơring tơrang ‘nao; jang tŏk rim sơnăm đei 8-10%, akŏm kơjă pơm tơlĕch truh sơnăm 2030 jô̆ pơhlom đei 2.900 ti hlak jên, iŏk yua jô̆ păh lăp kơ̆l bơngai đei 80 triệu hlak jên 1 ‘nu 1 sơnăm...

Hop akŏm tơbăt hơdăh tơdrong tơchơ̆t đơ̆ng Anih jang Đảng dêh char Đắk Lắk, athei Khŭl chĕp kơ̆l pơgơ̆r Đảng bộ xăh Ea Mdroh jăl jang 2025-2030 ‘noh đei 26 ‘nu bơngai vang jang, Khŭl chĕp kơ̆l pơgơ̆r anih jang Đảng xăh đei 11 ‘nu bơngai vang jang. Yă H'Giang Niê, sơ̆ pơm Bí thư Anih jang đoan dêh char Đắk Lắk pơm Bí thư anih jang Đảng xăh Ea Mdroh, jăl jang 2025-2030.