VOV4.Bahnar - Lơ̆m hla ar chih tơ roi jăl 14 kơ Kuô̆k hô̆i tơ ƀôh hơ dăh: jăl jang âu ki iŏk đei jơ nei ‘lơ̆ng hăm dôm tơ drong jang chih pơ jing luơ̆t, dăr hơ len, tơ chơ̆t dôm tơ drong gĭt kăl kơ tĕh đak truh jang tơ bôl đơ̆ng nghị viện. Kiơ̆ đơ̆ng nŏh, tơ gop hơ nhăk tĕh đak yak hlŏh dôm tơ drong mơ mat tat, pơ jing đei lơ tơ drong tơ plĭh ‘lơ̆ng, pran găh tơ drong arih xa mŭk drăm – tơ pôl, khul linh, vei sơ đơ̆ng, jang tơ bôl, hơ met păng pơm hơ tŏk tơ drong arih xa kon pơ lei.

Jăl jang kơ Kuô̆k hô̆i 14 tŏk pran păng roi ‘lơ̆ng găh tơ drong chih pơ jing luơ̆t, pơih tơ drong ‘lơ̆ng trŏ ƀlep ăn tơ drong jang tŏk hrĕnh, kơ jăp kơ tĕh đak. Lơ̆m jăl jang âu ki, hăm 72 luơ̆t, 02 tơ drong hơ găt luơ̆t păng lơ tơ drong tơ chơ̆t ƀơm truh luơ̆t đei drơ̆ng nơ̆r hlôi pơ jing tơ drong trŏ ƀlep ăn tơ drong tơ plih ‘nao, hơ tŏk tơ drong pran, đei yoa đơ̆ng khul kơ dră pơ gơ̆r tĕh đak; tơ iung tơ drong tơ păt ‘lơ̆ng păng pơm tơm kơ kon pơ lei; hơ tŏk hrĕnh tơ drong jang mŭk drăm kiơ̆ trong xã hội chủ nghĩa.

Lăm hôp Diên Hồng – Hnam Kuô̆k hô̆i Việt Nam

Kơ dră Kuô̆k hô̆i Nguyễn Thị Kim Ngân ăn tơ băt, tơ drong dăr lăng đei năng kăl, dăr lăng trŏ tơ drong tih, tơ drong kăl, ƀơm truh rim tơ drong, roi đunh roi đei yoa, iŏk đei lơ jơ nei gĭt kăl, đei bơ ngai tăh hla păng kon pơ lei tơ chĕng ‘lơ̆ng. Kiơ̆ đơ̆ng chă dăr lăng hlôi ƀôh hơ dăh tơ drong trŏ ƀlep đơ̆ng trong jang, tơ drong tơ gŭm, khôi luơ̆t tĕh đak, bơ̆ jang roi ‘lơ̆ng, roi tơ tom chă ƀôh dôm tơ drong ưh kơ lăp. Dăr lăng kiơ̆ tơ drong jang hlôi pơm hơ dăh roi nhen hăm 7 tơ drong ƀơm truh tơ drong jang atŏk tơ iung mŭk drăm, tơ pôl păng tơ drong arih xa kơ kon pơ lei; trong pơ gơ̆r hơ met ming, roi đunh roi ‘lơ̆ng, gơ̆h hơ gei:

“Apinh jet păng tơl nơ̆r apĭnh jet hơ nơ̆ng đei tơ drong tơ plih ‘nao, mă loi jĭ trong “apĭnh hrĕnh, tơ̆l kơ đeh” pơ jing tơ drong ‘lơ̆ng vă hơ tŏk kơ sô̆ bơ ngai tang măt Kuô̆k hô̆i apĭnh, pơ ma pơ jăh, jô̆ hloi tơ drong đei apĭnh păng nơ̆r apĭnh, nơ̆r tơl rơ gei, tơ iung jơ hngâm hơ iă, pơm hơ tŏk tơ drong tơ rĕk đơ̆ng bơ ngai tang măt Kuô̆k hô̆i, bơ ngai tăh hla păng kon pơ lei lơ̆m tĕh đak. Tơ drong iŏk kơ phĭu lui dăh ưh hăm bơ ngai iŏk jang kơ chư̆k yoa Kuôk hô̆i pôk dăh mă kĭ ăn đei bơ̆ jang tơ păt ‘lơ̆ng, vang tưk tơ iung tơ drong pơm pơm đơ̆ng kon pơ lei lơ̆m tơ drong jang kơ anĭh tang măt ăn kon pơ lei kŭm nhen lơ̆m tơ drong arih xa tơ pôl.”

Kuô̆k hô̆i jăl 14 hlôi hơ len năng, tơ chơ̆t lơ tơ drong gĭt kăl kơ tĕh đak, ƀơm truh tơ dromng arih xa mŭk drăm, tơ pôl, atŏk tơ iung tơ ring groi kông kon pơ lei kon kông, hơ dai hăm vei sơ đơ̆ng tĕh đak, jang tơ bôl. Kuô̆k hô̆i hlôi tơ chơ̆t ăn trong tơ mât jên jang dôm tơ drong jang tih, gĭt kăl kơ tĕh đak, tôch đei yoa ăn tơ drong jang atŏk tơ iung mŭk drăm, tơ pôl kơ tĕh đak nhen man 1,2 tŏ trong gre kơ dâu hrĕnh rok trong Bắc - Nam găh Hơ lĕch đơ̆ng 2017-2020, dôm tơ drong jang vă man cham gre păr Long Thành; tơ chơ̆t hŭt lê̆ tơ drong jang man hnam kơ măy unh điên hat nhân Ninh Thuận...

Găh rơih bơ ngai jang đei hơ len năng, pơ gơ̆r tôch kơ jăp, trŏ tơ drong hơ găt, lăp hăm tơ drong ‘mĕh vă tơ̆ yăn âu păng iŏk đei tơ drong drơ̆ng nơ̆r kơ jung. Tơ drong hơ len năng, tơ chơ̆t pơ jing, tơ mât hơ dai, chĕng hơ met ming tơ ring tĕh vei lăng tơ̆ apŭng, xăh lơ̆m dôm dêh char, plt găh trung ương vang tơ gop tơ lĕch jang ‘lơ̆ng trong jang đơ̆ng Đảng, Tơ drong tơ chơ̆t đơ̆ng Kuô̆k hô̆i găh pơm tơ jur khul bơ ngai pơ gơ̆r, hơ tŏk tơ drong jang mŭk drăm, tơ pôl, vei lăng sơ đơ̆ng tĕh đak, sơ đơ̆ng tơ pôl tơ̆ tơ ring. Dôm bơ ngai tang măt Kuô̆k hô̆i kŭm jing gơng tơ ƀưh tôch gĭt kăl đơ̆ng Kuô̆k hô̆i hăm bơ ngai tăh hla kiơ̆ đơ̆ng chă răp mơ̆ng, roi tơ băt tơ păt ‘lơ̆ng đon tơ chĕng, tơ drong hơ pơi ‘mĕh đơ̆ng kon pơ lei lơ̆m hnam hôp kŭm nhen roi tơ băt, hơ nhăk tơ drong tơ gŭm păng tơ drong tơ chơ̆t đơ̆ng luơ̆t mât lơ̆m tơ drong arih xa.

Kơ dră Quốc hội Nguyễn Thị Kim Ngân pơ ma hơ dăh: “Jăl jang Kuô̆k hô̆i mă XIV hlôi iŏk đei jơ nei ‘lơ̆ng hăm dôm tơ drong jang chih pơ jing luơ̆t, dăr hơ len, tơ chơ̆t dôm tơ drong gĭt kăl kơ tĕh đak truh jang tơ bôl đơ̆ng nghị viện. Kiơ̆ đơ̆ng nŏh, vang tơ gop hơ nhăk tĕh đak yak hlŏh dôm tơ drong mơ mat tat, pơ jing đei lơ tơ drong tơ plĭh ‘lơ̆ng, pran găh tơ drong arih xa mŭk drăm – tơ pôl, khul linh, vei sơ đơ̆ng tĕh đak, jang tơ bôl, hơ met păng pơm hơ tŏk tơ drong arih xa kon pơ lei, tơ gop tih ăn dôm tơ drong jơ nei tôch gĭt kăl lơ̆m vă jê̆ 35 sơ năm bơ̆ jang tơ plih ‘nao, pơm pơ ‘lơ̆ng hlŏh dơ̆ng tơ drong juăt 75 sơ năm ‘lơ̆ng hơ iă đơ̆ng Kuô̆k hô̆i.”

Ƀlep ƀât ‘măng mă âu, tang măt ăn Kuô̆k hô̆i, Kơ dră Kuô̆k hô̆i Nguyễn Thị Kim Ngân tơ ƀôh đon bơ nê tôch ai hăm đĭ đăng kon pơ lei păng bơ ngai tăh hla lơ̆m tĕh đak, hơ nơ̆ng lui kiơ̆ păng pơ jao hơ năp jang trăp trĭn ăn bơ ngai tang măt kơ kon pơ lei; bơ nê tơ drong vang jang hơ doi tôch tơ năp đơ̆ng Kơ dră tĕh đak, Khul kơ dră tĕh đak, Anih trung ương Mặt trận Tổ quốc Việt Nam, Anĭh tơm sek tơ lang kon pơ lei, Anĭh tơm dăr hơ len kon pơ lei, dôm anĭh jang, khul grŭp jang kơ pal kŭm nhen tơ drong jang hơ doi, tơ drong tơ gŭm đơ̆ng bôl boăl lơ̆m apŭng plenh tĕh.

Dŏng: Tơ blơ̆