VOV4.Bahnar – Pơgê năr 16/6, Anih vei lăng kon pơlei dêh char Lâm Đồng hlôi đei hla bar pơkăp 'nao pơtruh ăn Anih vei lăng Jên hu, Anih vei lăng Pơtho Pơhrăm, Anih vei lăng kon pơlei dôm apŭng plei tơm drơ̆ng nơ̆r pơtoi pơm kiơ̆ pơkăp tơgŭm yuơ jang đunh xơnăm hăm bơngai pơtho chư truh lai yơ đei tơchơ̆t 'nao đơ̆ng Trung ương. Hla bar pơkăp ră hơdăh, Luơ̆t Pơtho Pơhrăm kơsô̆ 43/2014/QH14 năr 14/6/2019 đei iŏk yua đơ̆ng năr 1/7/2020 pơkăp găh jên khei jang: “Bơngai pơtho chư đei xơkơ̆t jên khei trŏ ƀlep hăm pơkăp pơm jang; đei axong xa jên khei kăp gĭt kiơ̆ tơchơ̆t đơ̆ng Khul kơpal teh đak”. Mă lei, truh dang ei, Trung ương tam mă đei hla bar pơkăp păng pơtho axong jên khei 'nao. Kơyuơ noh, lơ̆m kơplăh gô Khul kơpal teh đak păng rim anih jang tơm, anih jang Trung ương pơtruh hla bar 'nao pơkăp, pơtho axong jên khei jang 'nao păng vă tơgŭm ăn bơngai pơtho chư gơh xơđơ̆ng tơdrong erih, xơđơ̆ng pơm jang, Anih vei lăng kon pơlei dêh char drơ̆ng nơ̆r pơtoi pơm kiơ̆ pơkăp tơgŭm yuơ jang đunh xơnăm ăn bơngai pơtho chư truh lai yơ đei tơchơ̆t păng pơtho jang 'nao đơ̆ng Trung ương.

Lan chih păng pơre nơ̆r