VOV4.Bahnar - Anih vei lăng găh tơ drong jang sa linh jĭ rơ ka păng tơ pôl jang hơ dai hăm Anih jang Đoàn dêh char Lâm Đồng pơ gơ̆r lêh sơng iŏk ăn Anih mong jên tơ gŭm hơ ioh dêh char păng tơ drong jang pơ jao hŏk ƀŏng ăn kơ hŏk tro lơ̆m pơ lei tơm Đà Lạt. Tơ̆ jơ pơm lêh, Kŏng ti jang găh tơ mang lăng Sài Gòn - Đại Ninh hlôi pơ jao 2 ti hlak jên ăn kơ Anih mong jên tơ gŭm hơ ioh dêh char Lâm Đồng.

Yă Trần Thị Chúc Quỳnh- Bí thư anih jang Đoàn dêh char Lâm Đồng pơ jao hŏk ƀŏng ăn kơ đe oh đei tơ drong arih sa mơ mat tat

Lăp đơ̆ng rŏng kơ sơng iŏk, Khŭl pơ gơ̆r hlôi pơ jao 500 kơ suơ̆t hŏk ƀŏng, 1 kơ suơ̆t đei kơ jă 1 triệu hlak jên ăn kơ đe oh hŏk tro đei tơ drong arih sa mơ mat tat tŏk bŏk hŏk pơ hrăm tơ̆ rim hnam trưng păng rim hơ nih vei lăng tơ gŭm tơ pôl lơ̆m pơ lei tơm Đà Lạt. ‘Nâu jĭ tơ drong jang ‘lơ̆ng hơ iă tơ ƀôh tơ drong bơ ngơ̆t truh đơ̆ng rim khŭl jang tơ pôl păng anih jang mơ dro sa lăng truh đe hŏk tro đei tơ drong arih sa mơ mat tat.

Thuem: Tơ blơ̆