VOV4.Bahnar - Jang kiơ̆ Nơ̆r krao hơ vơn đơ̆ng Tổng Bí thư, Kơ dră teh đak găh tơ drong Đĭ đăng kon pơ lei tơ goăt 1 jơ hngơ̆m đon, iung jang tang găn jĭ Covid-19, vang yak hơ dai, tơ gŭm rim dêh char, pơ lei tơm lơ̆m tơ drong jang tang găn jĭ hơ buh, đơ̆ng khei 7 truh dang ei, dêh char Lâm Đồng hlôi hơ vơn lơ bơ ngai iŏk răt, tơ gŭm đei vă jê̆ 29.000 tấn tơ mam đơ̆ng choh jang sa đei, găh lơ ‘noh ‘nhot, ƀum, plei ăn kon pơ lei tơ̆ rim tơ ring jĭ.

Lơ̆m noh, lơ hloh ‘noh jĭ tơ gŭm ăn kon pơ lei tơ̆ pơ lei tơm Hồ Chí Minh hloh 16.800 tấn, pơ lei tơm Đà Nẵng vă jê̆ 2.300 tấn, dôm dêh char nai nhen Đồng Nai, Bình Dương, Khánh Hòa, Bình Thuận, Bà Rịa – Vũng Tàu, Phú Yên, Long An, Tiền Giang… hloh 9.600 tấn tơ mam đơ̆ng choh jang sa đei. Kiơ̆ kơ Anih vei lăng găh choh jang sa păng hơ tŏk tơ iung tơ ring tơ rang dêh char Lâm Đồng, pơ đĭ kơ sô̆ tơ mam âu đei akŏp kơ jă tŏk truh vă jê̆ 188 ti hlak jên, đei hơ vơn đơ̆ng lơ hơ nih tơ gop.

Thuem: Tơ blơ̆