VOV4.Bahnar - Ƀok Phan Văn Đa, Phŏ kơ dră Anĭh vei lăng kon pơ lei dê̆h char, Kơ dră Khŭl tang măt Jơ nŭm vei lăng, anĭh mong jên tơ gŭm tơ pôl dê̆h char Lâm Đồng hlôi pơ gơ̆r jơ bơ̆ jang hăm Anĭh mong jên tơ gŭm tơ pôl dê̆h char Lâm Đồng găh tơ lĕch jang jên asong tŏk iŏk tơ gŭm sơ năm 2021. Trŭh dang ei, akŏp jên asong tŏk iŏk tơ gŭm lơ̆m tơ ring đei hlŏh 3.800 ti hlak jên, tŏk hlŏh 38 ti hlak jên pơ têng hăm blŭng sơ năm. Kiơ̆ chĭh jô̆, kơ sô̆ jên ăn tŏk iŏk 2 khei blŭng sơ năm 2021 đei hlŏh 146 ti hlak jên, hlŏh 4.600 ‘nu tơ moi tŏk iŏk jên. Pơ ma tơ̆ hop akŏm, Phŏ kơ dră Anĭh vei lăng kon pơ lei dê̆h char Phan Văn Đa pơ ma hơ dăh: Hăm tơ drong ‘lơ̆ng gĭt kăl đơ̆ng jên asong tŏk iŏk tơ gŭm, mă loi ‘nŏh jĭ khei ‘năr dê̆h char Lâm Đồng tŏk bŏk akŏm tơ lĕch jang rim tơ drong jang tơ jur dơ nŭh hin hrĕnh păng kơ jăp. Yua thoi nŏh, Anĭh mong jên tơ gŭm tơ pôl dê̆h char kăl kơ hơ nơ̆ng hơ met tôm khŭl jang, lăng kiơ̆ rim tơ dỏng hơ găt, tơ drong jang đơ̆ng jên asong tŏk iŏk tơ gŭm tơ pôl, hơ nơ̆ng dăr hơ len tơ mơ̆t dơ̆ng ŭnh hnam dơ nŭh hin, hơ drin tơ chĕng hơ len găh trong jang tơ gŭm ăn tŏk iŏk vă pơ̆ih să bơ ngai, đei trong tơ lĕch jang klăih song jên mă lăp.

Thuem: Tơ blơ̆