VOV4.Bahnar - Tơ̆ Hà Nội, Anih tơm vei lăng choh jang xa păng atŏk tơ iung tơ ring tơ rang păng Tơ drong jang atŏk tơ iung kơ Liên Hợp Quốc (UNDP) kĭ pơ kăp ăn tơ drong jang “Hơ tŏk kơ sư̆k tơ jră đơ̆ng tơ drong choh jang xa iĕ hăm tơ drong vei sơ đơ̆ng đak, yoa đơ̆ng tŏ ‘mi kial tơ plih tơ̆ tơ ring Tây Nguyên păng tơ̆ Pơ băh tơ ring Tŏk Bŏk”. Lêh kĭ pơ kăp đei tơ drong dơ̆ng lăng đơ̆ng kơ dră chĕp kơ̆l dôm dêh char lơ̆m tơ ring đei tơ drong jang ‘nŏh: Dak Lak, Dak Nông, Khánh Hòa, Ninh Thuận, Bình Thuận. 

Tơ drong jang vă tơ lĕch đơ̆ng dang ei truh sơ năm 2026, iŏk yoa jên tơ gŭm jang tŏk (ODA) đơ̆ng Anih mong jên Hơ yuh kial rơ gŏh 'lơ̆ng đơ̆ng UNDP. Tơ drong jang vang tơ gop pơm tơ plih trong jang xa đơ̆ng unh hnam jang chŭn mir, jang kơ đĕh năr vă gô chang dôm tơ drong jang tih, đunh đai gơ̆h vei lăng đak. Akŏm đĭ đăng jên đơ̆ng tơ drong jang âu 'nŏh hlŏh 30,2 triu USD. Tơ drong jang âu gô hơ nhăk tơ drong đei yoa ăn 222.400 'nu kon pơ lei (mă loi 'nŏh jĭ đe drŏ kăn păng kon pơ lei kon kông) tơ̆ dôm dêh char Dak Lak, Dak Nông, Bình Thuận păng Ninh Thuận.

Dơ̆ng: Tơ blơ̆