VOV4.Bahnar - Lơ̆m jơ năr năm tơ mang păng bơ̆ jang tơ̆ Dak Nông, pơ gê ‘năr 8/4, Phŏ kơ dră anih tơm vei lăng găh tơ drong jang sa linh jĭ rơ ka păng tơ pôl Lê Văn Thanh hlôi năm hơ len lăng tơ drong bơ ngai jang, tơ drong jang tơ̆ Kŏng ti Nhôm Dak Nông-TKV, tơ̆ xăh Nhân Cơ, apŭng Đắk R’lấp. Kŏng ti Nhôm Dak Nông-TKV bơ̆ jang đơ̆ng sơ năm 2017, dang ei đei 1.045 ‘nu bơ ngai jang. Dôm sơ năm âu ki, kŏng ti hlôi bơ̆ jang kiơ̆ ƀlep tơ drong hơ găt găh tơ drong kĭ pơ kăp hla ar bơ ngai jang, nôp lơ kơ loăi ƀao hiêm ăn bơ ngai jang kiơ̆ ƀlep tơ drong hơ găt.

Phŏ kơ dră Anih tơm vei lăng găh tơ drong jang linh jĭ rơ ka păng tơ pôl  Lê Văn Thanh asong tơ mam ăn kơ kŏng nhân Hnam kơ măy Alumil Nhân Cơ

Tơ drong arih sa kơ kang ƀô̆, kŏng nhân, bơ ngai jang ư̆h kơ đei pơ dơ̆h đei tŏk, đơ̆ng jên khei, trong jang tơ gŭm găh hnam oei tơ pôl păng rim tơ drong jang đei yua, jŏh ayŏ, tơ plŏng kơ dâu. Kŏng ti oei vang tơ gop, tơ gŭm lơ jên mong tơ̆ tơ ring, rim tơ drong jang ‘mêm mơ nat, vei sơ đơ̆ng tơ drong arih sa tơ pôl hăm kơ sô̆ jên hloh 69 ti hlak jên. Phŏ kơ dră Lê Văn Thanh lăng ‘lơ̆ng tơ drong bơ ngơ̆t truh đơ̆ng kơ dră chĕp kơ̆l Kŏng ti Nhôm Dak Nông -TKV hăm tơ drong arih sa bơ ngai jang păng rim tơ drong jang vei sơ đơ̆ng tơ drong arih sa tơ pôl, tơ gŭm ŭnh hnam teh đak tơ gŭm, kon pơ lei kon kông đei tơ drong arih sa mơ mat tat.

Thuem: Tơ blơ̆