VOV4.Bahnar – Găh pơkăp khôi luơ̆t, Theh Kăng kươk kon pơlei đei chô̆ chĭp jing hla bar pơkăp dơh po hăm kon pơlei Việt Nam đei pơkăp bơ̆ng pang găh kăng kươk kon pơlei kơ bơngai đei axong bơ̆ theh vă pơm jang dôm tơdrong kăl găh hla bar lơ̆m hơgăt teh đak Việt Nam.

Theh Kăng kươk kon pơlei đei yua pơtăl kơ tơdrong yua hô̆ chĭu mưh Việt Nam păng teh đak nai kĭ pơkăp dăh mă pơdrơ̆ng apŭng plenh teh axong kon pơlei ƀar teh đak kĭ pơkăp yua theh Kăng kươk kon pơlei pơtăl kơ yua hô̆ chĭu lơ̆m hơgăt teh kơ dih băl.

Anih jang, tơ ‘ngla bơngai kơpal gơh pơkăp kon pơlei tơbang theh Kăng kươk kon pơlei vă hơlen găh kăng kươk păng dôm tơdrong kăl đei tơrĕk. ‘Nguaih kơ noh, anih jang, tơ ‘ngla bơngai jang kơpal duh gơh yua minh ƀar tơdrong pơkăp tơ ‘ngla lơ̆m theh Kăng kươk kon pơlei vă hơlen tơdrong kăl kơ bơngai đei axong bơ̆ theh lơ̆m Anih chih vei lăng kơ teh đak găh tơring kon pơlei păng anih chih răk vei hơlen kơ anih juăt jang kiơ̆ tơchơ̆t đơ̆ng khôi luơ̆t.

Ăh kon pơlei tơbang theh Kăng kươk kon pơlei kiơ̆ pơkăl đơ̆ng anih jang, tơ ‘ngla jang kơpal noh anih jang, tơ ‘ngla jang kơpal gơh pơkăl kon pơlei tơbang minh ƀar hla bar kăl nai bơ̆ng pang tơdrong kăl kơ po hlôi đei lơ̆m theh Kăng kươk kon pơlei. Teh đak vei vêr xơnong pơyua kăp gĭt ăn bơngai đei axong bơ̆ theh Kăng kươk kon pơlei, vei xơđơ̆ng ăn tơdrong yua trŏ khôi luơ̆t, trŏ tơdrong păng hiôk hian.

Tơdrong 21 Lươ̆t Kăng kươk kon pơlei tơchơ̆t xơnăm gơh tơplih Kăng kươk kon pơlei nhen tơ̆ hơla: Theh Kăng kươk kon pơlei athei tơplih ăh tơ ‘ngla kon pơlei tŏk 25 xơnăm, tôm 40 xơnăm păng tôm 60 xơnăm. Mưh theh Kăng kươk kon pơlei đei bơ̆, tơplih ‘nao lơ̆m 2 xơnăm adrol kơ xơnăm pơkăp noh duh oei gơh yua truh tôm xơnăm tơplih theh đơ̆ng rŏng.

Hla bar pơkăp vă bơ̆ theh Kăng kươk kon pơlei chô̆ chĭp điê̆n tưh noh ƀônh đĕch, tenh kuăng gơnơm đei akŏm chih tơdrong kăl găh kon pơlei. Khei năr pơkă iŏk theh Kăng kươk kon pơlei chô̆ chĭp noh đơ̆ng rŏng 7 năr dăh mă 15 năr jô̆ đơ̆ng năr iŏk tôm hla bar kăl, kiơ̆ tơdrong axong bơ̆ ‘nao dăh mă axong tơplih kơyuơ hiong. Thươ̆ng tă Huỳnh Thị Thu Trang, Phŏ kơdră anih jang PC06, kŏng ang plei tơm Hồ Chí Minh ăn tơbăt: theh Kăng kươk kon pơlei ‘nao âu đei lơ tơdrong hiôk ăn kon pơlei, mă hăt noh đơ̆ng rŏng kơ năr 1/7/2021, ăh Anih tơm Kŏng ang chih akŏm tơdrong kăl đơ̆ng kon pơlei ăn dôm anih jang kơpal kơ teh đak vei hơlen, noh gô ưh kơ kăl hla bar pơkăp nai ƀơ̆t chă năm pơm jang tơdrong bơ̆ hla bar âu to:  “Dang ei, bơ̆n đei pơhlom 22 hla bar hanh chĭn kăl hăm kon pơlei chă bơ̆ jang. Theh  Kăng kươk kon pơlei chô̆ chĭp akŏm hloh 30 kơloăi hla bar kăl ăn tơ ‘ngla phara băl: theh BHYT, BHXH, kơsô̆ pơkăp thuê̆ tơ ‘ngla pơm jang, ƀăng vơ̆r gre. Ning mônh kon pơlei adrô̆ tơbang dơdŏ theh Kăng kươk kon pơlei ƀơ̆t bơ̆ hla bar âu to. Hăm theh âu kon pơlei gơh iŏk điê̆n thoăi chŭp kơsô̆ QR code noh gô băt hơdăh dôm tơdrong đei chih akŏm lơ̆m hla bar chư̆ng minh xo kơ po”.

Tơdrong 27 Lươ̆t Kăng kươk kon pơlei tơchơ̆t xơnăm 2014 pơkăp anih jang gơh axong bơ̆, tơplih bơ̆ kiơ̆ Lươ̆t Kăng kươk kon pơlei tơchơ̆t xơnăm noh Anih jang vei lăng kăng kươk kon pơlei kơ Anih tơm Kŏng ang. Kon pơlei gơh chă rơih minh lơ̆m dôm anih jang tơ̆ hơla vă bơ̆ hla bar kăl vă pơm theh Kăng kươk kon pơlei mưh tôm xơnăm pơkăp bơ̆ theh kăng kươk kiơ̆ tơchơ̆t đơ̆ng khôi luơ̆t:

- Anih jang vei lăng kăng kươk kon pơlei kơ Anih tơm Kŏng ang

- Anih jang vei lăng kăng kươk kon pơlei kơ Kŏng ang dêh char, plei tơm mă  trung ương vei lăng;

- Anih jang vei lăng kăng kươk kon pơlei kơ Kŏng ang apŭng, kuâ̆n, thĭ xăh, plei tơm mă dêh char vei lăng păng anih jang hanh chĭnh pơkăp nai;

- Anih jang vei lăng kăng kươk kon pơlei pơkăp kơpal gơh bơ̆ hla bar axong bơ̆ theh Kăng kươk kon pơlei tơ̆ xăh, phương, thĭ trâ̆n, anih jang dăh mă tơ̆ tơring kơtă kơ kon pơlei mưh đei tơdrong kăl.

 Hlôh vao hơdăh păng tôm tong găh tơdrong pơkăp khôi luơ̆t hăm Kăng kươk kon pơlei, duh nhen xơnong kơpal gơh axong bơ̆ Kăng kươk kon pơlei jing xơnong pơyua păng xơnong jang kơ rim kon pơlei  Việt Nam, kiơ̆ ƀlep tơchơ̆t đơ̆ng khôi luơ̆t.

Lan chih păng pơre nơ̆r