VOV4.Bahnar - Jô̆ truh tong anê̆ khei 9 âu ki dêh char Kon Tum hlôi pơtăm ‘nao hloh 3.600ha bri. ‘Nâu jing hơyak pơih blŭng kăp gĭt vă dêh char Kon Tum pơm jang đei jơnei Tơchơ̆t Hop akŏm Anih jang Đảng dêh char ‘măng mă 16 truh xơnăm 2025, pơtăm đei 15.000ha bri. Tơpă ăn ƀôh tơdrong jang đei jơnei kiơ̆ pơkăp Kla jên vei lăng bri tŏk bŏk pơm trong ăn tơdrong jang vei lăng păng hơtŏk bri đơ̆ng kon pơlei Kon Tum.

          Xăh tơnap tap Đăk Pxi, apŭng Đăk Hà đei 5 pơlei iŏk vei lăng bri đơ̆ng Anih jang găh bri hmŏ Đăk Hà. Xơnăm âu ki, dôm pơlei âu iŏk yua đei pơhlom 3,9 tih hlj vei lăng bri. Hăm minh xăh mă tơdrong erih kon pơlei oei lơ tơnap tap nhen  Đăk Pxi, noh âu jing minh kơsô̆ jên tih tên. Atŭm hăm tơdrong pơyua hơtŏk trong jang mă jên kla vei lăng bri pơyua ăn kon pơlei, tơdrong đei yua đơ̆ng bri hlôi pơm ăn kon pơlei đei jơhngơ̆m pran vă vei lăng bri. Ƀok A Sáo, tơ̆ pơlei Kon Pao Kla ăn tơbăt: “Kon pơlei hơnơ̆ng năm hơlen vei bri, pơyan ‘mi minh khei đơ̆ng 2 truh 3 ‘măng. Oei pơyan phang noh minh khei 4 ‘măng năm hơlen vă tang găn păng pĭt unh xa bri păng tang găn dôm bơngai mơ̆t tơtông koh ot ‘long bri glăi, nhen ot tơ̆r păng pơnăh kon bri. Kơsô̆ jên mă kon pơlei đei xa yua noh pơkăp kiơ̆ ‘năr jang. Minh năr noh xa hơpăh  200 hlj. Đak xăng gre noh khul vei lăng bri kla ăn kon pơlei chă vih vơ̆t. Găh kơsô̆ jên kon pơlei đei xa tơ̆ unh hnam dơ̆ng”.

Ƀôh hơdăh pơyua đơ̆ng bri hơ ‘nhăk ăn tơdrong erih, xơnăm 2017 đơ̆ng tơdrong hơvơn đơ̆ng jơnŭm pơgơ̆r tơring Đăk Ui, apŭng Đăk Hà, kon pơlei tơ̆ 2 pơlei lơ̆m xăh noh Kon Bông păng Kon Năng Triang khŏm mă pơtăm bri tơ̆ hơgăt teh phui phang tơnang kŏ. Truh dang ei hăm tơdrong vei jang đơ̆ng kon pơlei, 30ha ‘long hơngo pêng hla pơtăm đunh kơ âu 4 xơnăm hlôi jê̆ tôm pơkăp vă iŏk yua xa hơpăh đơ̆ng vei jang bri. ‘Nguaih kơ noh, tơdrong pơyua đơ̆ng iŏk kơtăk hơngo păng tĕch ‘long tơ̆r tih đơ̆ng hơgăt bri pơtăm âu duh pơkăp pơyua lơ ăn kon pơlei khei năr anô̆ anăp kơnh. Ƀok A Bế, tơ̆ pơlei Kon Mriang, xăh Đăk Ui, apŭng Đăk Hà ăn tơbăt, tơdrong đei jơnei đơ̆ng tơdrong vei lăng bri păng pơtăm bri hlôi tơgŭm pơtôch bơih tơdrong mă kon pơlei lơ̆m xăh koh ot ‘long bri muih choh pơm mir: “Adrol ki kon pơlei chă muih choh mă lei đơ̆ng mă đei pơkăp vei lăng bri âu noh kon pơlei pă đei muih choh teh bri bơih. Đe xư hơnơ̆ng lui kiơ̆ pơkăp hơtŏk bri đe jang kiơ̆. Kon pơlei băt hơdăh trong pơkăp jang đei xa yua noh. Xơ̆ ki đei mă lei dang ei pă đei bơih. Găh tơring Đăk Ui ưh đei chă phă muih choh bri bơih”.

Pơm kiơ̆ pơkăp pơtăm ‘nao 15.000ha bri mă Tơchơ̆t Hop akŏm Anih jang Đảng dêh char Kon Tum ‘măng mă 16, jăl jang 2020-2025 tơlĕch, truh tong anê̆ khei 9 âu ki, jâ̆p dêh char Kon Tum hlôi pơtăm ‘nao đei hloh 3.600ha bri, yak hloh 600ha pơtêng hăm pơkăp pơjao lơ̆m xơnăm âu. Vă pơtăm đei bri, jơnŭm pơgơ̆r dôm apŭng, plei tơm kơ dêh char hlôi hơvơn kon pơlei pơtăm bri hăm hơgăt teh phui phang tơnang kŏ, hơgăt teh pơtăm ƀum ƀlang, ƀa mă ưh đei yua lơ; tơgŭm ăn hơdrĕch, bơngai jang, pơtho kih thuơ̆t ăn kon pơlei; hơvơn khul linh, kang ƀô̆ bơngai jang... atŭm vang pơtăm bri. Ƀok Nguyễn Văn Tiến, Phŏ Kơdră Anih jang găh bri dêh char Kon Tum ăn tơbăt, lơ trong jang duh hlôi đei tơlĕch vă kon pơlei lui ngeh găh tơdrong pơyua mŭk drăm ƀơ̆t vang pơtăm bri: “Kon pơlei ăh vang pơtăm bri đơ̆ng rŏng kơnh đei xa yua kiơ̆ pơkăp, nhen kla jên vei lăng bri. Bri mă kon pơlei kơdih pơtăm ning mônh kơnh đei yua tôm 100%. Anih jang găh bri hlôi tơgŭm ăn dôm jăl pơgơ̆r tơring hơtŏk tenh tơdrong pơjing dôm anih ot pơ ‘lơ̆ng tơ̆r vă tĕch tơ̆r ‘long bri pơtăm vă hơtŏk kơjă tơmam drăm ‘lơ̆ng xơđơ̆ng vă kon pơlei ăh pơtăm bri adoi đei yua lơ hloh”.         

Lan chih păng pơre nơ̆r