VOV4.Bahnar – Lơ̆m prăt hnưr erih,  Đảng păng teh đak bơ̆n hơnơ̆ng tơrĕk, tơchơ̆t lơ trong jang vă hơtŏk rim tơdrong erih tơpôl ăn tơring kon pơlei kon kông. Tơdrong tôm hơtŏk mŭk drăm – tơpôl tơring kon pơlei păng groi kông jăl xơnăm 2021-2030 đei Kuôk hô̆i kĭ pơkăp kiơ̆ Tơchơ̆t kơsô̆ 88/2019/QH14 năr 18/11/2019 jing tơdrong bơ̆ng pang hơdăh ăn tơdrong pơkăp trŏ ƀlep đơ̆ng Đảng, Teh đak păng jing jơhngơ̆m pran tơgŭm kon pơlei kon kông păng groi kông hơtŏk rim tơdrong.  

Lơ̆m dôm xơnăm kơ âu, atŭm hăm tơdrong pơm jang đei jơnei dôm trong pơkăp jang đơ̆ng Đảng, tơchơ̆t đơ̆ng khôi luơ̆t Teh đak, dêh char Yên Bái hlôi tơlĕch lơ trong pơkăp jang ăn kon pơlei kon kông lơ̆m tơring; lơ̆m noh akŏm hơtŏk mŭk drăm – tơpôl; vei răk tơƀăk mong kơjă joh ayŏ juăt jue, vei xơđơ̆ng tơpôl tơring kon pơlei kon kông păng groi kông păng hlôi đei jơnei kăp gĭt. Kơsô̆ unh hnam hin dơnuh lơ̆m jâ̆p dêh char tơjur đơ̆ng hloh 32% (xơnăm 2016) oei pă 7,04% xơnăm 2020. Oei tơ̆ dôm apŭng hin dơnuh nhen Mù Cang Chải xơnăm 2016 noh jê̆ 67% noh ăh xơnăm 2020 hlôi tơjur tơ̆ hơla 9%. Yên Bái hlôi tơbang dôm trong pơkăp tơgŭm, lơ̆m noh đei Pơkăp tơgŭm choh jang xa jang găh bri păng ka hơdang kiơ̆ Tơchơ̆t 69 đơ̆ng Hô̆i đŏng kon pơlei dêh char.

Đei tơgŭm 8 trĭu hlj kiơ̆ Tơchơ̆t  69 đơ̆ng Hô̆i đŏng kon pơlei dêh char Yên Bái, ‘nhŏng Giàng A Dờ tơ̆ pơlei Púng Luông, xăh Púng Luông, apŭng Mù Cang Chải, dêh char Yên Bái hlôi axong jên hơmet hơdrong var păng rong 30 tŏ bơbe yŏng. Gơnơm pơ ‘nam hŏk hơlen khao hŏk kih thuơ̆t rong kon tơrong kiơ̆ đơ̆ng dôm lăm pơih pơtho păng mơ̆ng brŏ, đŏk ƀăo mă khul bơbe kơ unh hnam ‘nhŏng vơ̆ pran ‘lơ̆ng. tơgŭm unh hnam hơtŏk iŏk yua păng kĕ pơm pơdrŏng. Đơ̆ng tơdrong pơyua mă blŭng ‘nhŏng Dờ pơđăp hăm hơkăn hơtŏk khul bơbe truh 100 tŏ lơ̆m khei năr truh: Rim tŏ bơbe minh xơnăm đei yua đơ̆ng 400 truh 500 rơbâu, ưh jô̆ jene huach. Ăh đei tơgŭm hăm kon pơlei tơring groi kông, tơring ataih yaih âu noh duh jing minh lơ̆m dôm trong vă kon pơlei xut pơngot tơjur hin dơnuh.

Unh hnam pơmai Vũ Minh Thủy tơ̆ pơlei Ngã Ba Kim, xăh Púng Luông duh đei tơgŭm 15 trĭu hlj kiơ̆ Tơchơ̆t 69 đơ̆ng Hô̆i đŏng kon pơlei dêh char Yên Bái vă hơtŏk rong kon tơrong, hăm pơkăp 3 tŏ nhŭng yŏng păng 20 tŏ xa ‘nhĕm. Pơ ‘nam jang xa đei dôm jăl pơgơ̆r tơring pơih lăm hŏk găh kih thuơ̆t rong kon tơrong noh xơnăm xơ̆ unh hnam pơmai hlôi tĕch đei hloh 3 tâ̆n ‘nhĕm nhŭng đei yua hloh  200 trĭu hlj. Pơmai Vũ Minh Thủy tơroi: Đơ̆ng jên đei yua âu ưh adrô̆ tơgŭm pơmai klaih đơ̆ng hin dơnuh mă oei rong kon hơ ioh năm hŏk đăi hŏk, tơdrong erih da ƀiơ̆ tơnap tap: Mưh mă ưh đei hơbuh pơrang jĭ mă hơnơ̆ng jang xa đei thoi âu noh mŭk drăm xơđơ̆ng bơih. ‘Meh vă đei pơtoi iŏk tơgŭm unh hnam đei dơ̆ng hlak jên vă rong mă lơ kon tơrong.

Apŭng Mù Cang Chải hlôi hơtŏk pran tơroi tơbăt lơ unh hnam kon pơlei khĭn chă chih măt tơlĕch rong kon tơrong trŏ ƀlep hăm tơdrong kĕ đei, tơdrong hlôh vao kơ rim unh hnam. Kiơ̆ đơ̆ng noh, rim tơring hơlen, chih akŏm hơnăn dôm bơngai kĕ jang vă vei xơđơ̆ng tơdrong tơbang hiôk hian păng hơvơn, pơtho kon pơlei hơmet hơdrong var, răt tơmam drăm, kon yŏng vei xơđơ̆ng ‘lơ̆ng. Truh dang ei, apŭng Mù Cang Chải hlôi đei  86 unh hnam chih măt hăm kơsô̆ jên axong hloh 1 tih 4 trĭu hlj. Gơnơm đơ̆ng noh, kơsô̆ kon tơrong kơ apŭng đei 73.000 tŏ. Ƀok Vàng Bua Tủa, Kơdră Anih vei lăng kon pơlei xăh  Púng Luông, apŭng Mù Cang Chải ăn tơbăt:  Ƀơ̆t đei jên jang âu noh mă lơ unh hnam hin dơnuh đei tŏk iŏk, lơ̆m noh unh hnam yơ duh đei kơpô rơmo rong lơ̆m unh hnam, hơ ‘nhăk dôm unh hnam dar deh klaih đơ̆ng hin dơnuh. Đei lơ unh hnam duh iŏk yua jên jang vă pơih xă rong kon tơrong.

Apŭng Mù Cang Chải xơkơ̆t pơtoi hơtŏk tơroi tơbăt trong pơkăp tơgŭm đơ̆ng Tơchơ̆t kơsô̆ 69 truh hăm kon pơlei lơ̆m tơring; hơtŏk pran pơjing, hơvơn dôm trong jang, rong kon tơrong tơguăt hăm tơmam kăp gĭt kơ tơring nhen ier găm, nhŭng kông, bơbe kông, plei sơn tra, plei ‘long bri ‘nâu nia hia. Hơtŏk pơtho găh kih thuơ̆t, tơgŭm kon pơlei tơrĕk hăm jên tŏk iŏk duh nhen tơdrong hlôh vao găh vei lăng, tang găn pơrang jĭ, pơ ‘nguaih cham char; pơtoi hơvơn dôm hơp tak xăh choh jang xa lơ̆m tơring khĭn chih măt dôm tơdrong jang tơgŭm jang kiơ̆ pơkăp kơjă tơmam drăm.  

Pơtih tơ̆ kơpal adrô̆ jing minh um ai iĕ ioch lơ̆m dôm tơdrong axong jang đơ̆ng Đảng, Teh đak truh hăm tơring kon pơlei kon kông păng groi kông nhen: Tơdrong jang 135 jăl xơnăm: 1, 2, 3 axong ăn dôm xăh, thôn pơlei tơnap tap hloh; Tơchơ̆t 30A/2008/NQ-CP Găh tơdrong tơgŭm tơjur hin dơnuh tenh păng kơjăp xơđơ̆ng hăm 61 apŭng hin dơnuh đei pơm jang lơ̆m dôm xơnăm kơ âu; păng mă kăl noh Tơdrong jang tôm hơtŏk mŭk drăm – tơpôl tơring kon pơlei kon kông păng groi kông jăl xơnăm 2021 - 2030 hlôi đei Kuôk hô̆i kĭ pơkăp ăh xơnăm 2019. Kiơ̆ kơ ƀok Đỗ Văn Chiến, xơ̆ jang Kơdră – Ƀô̆ trưởng Anih jang găh Hơdrung kon kông  (dang ei noh Kơdră Anih jang Trung ương Măt trâ̆n tôh kuôk Việt Nam) noh tơdrong pơkăp jang âu đei:  Tơdrong pơkăp âu dơnơm noh pơm kiơ̆ 10 tơdrong jang păng xơkơ̆t noh đei 3 anih ‘nao. Anih mă mônh noh xơkơ̆t dơ̆ng tơring kon pơlei kon kông păng groi kông, xơkơ̆t hơdăh dôm tơring tơnap tap hloh vă đơ̆ng noh akŏm axong jang kăp gĭt đei jơnei tơnăp, pơjing trong jang păng hơtŏk bơngai jang ăn tơring kon pơlei kon kông păng groi kông. Trong jang âu tơguăt hăm 3 xơnong jang tơm: hơtŏk mŭk drăm bri, vei lăng păng hơtŏk bri; Rong kon tơrong, hơtŏk chêk lar kon yŏng kiơ̆ tơdrong kĕ đei kơ rim tơring; Pơjing trong jang xa pơtăm sâm păng dôm hơdrĕch ‘long pơm pơgang kăp gĭt trŏ ƀlep hăm cham char tô̆ ‘mi kơ rim tơring. Xek tơlang dôm tơdrong đei ƀôh mă hăt noh hăm drăkăn păng đe hơ ioh tơ̆ tơring kon kông păng groi kông. Atŭm hăm noh jing xek tơlang khôi juăt kơtul chơdư nhen tơ oei ‘nhŏng oh yă ƀok, tơ oei unh om đơ̆ng ‘lâ̆p păng xut lê̆ dôm khôi juăt kơtul chơdư; Akŏm hơtŏk pơtho pơhrăm, jang y tê̆ vă hơtŏk pơ ‘lơ̆ng kơsô̆ măt bơngai păng tơring groi kông.

Tơdrong pơkăp jang kơ teh đak Hơtŏk mŭk drăm – tơpôl tơring kon pơlei kon kông păng groi kông jăl xơnăm 2021 – 2030 đei tơlĕch jang gô tơgop pơm tơplih đon kơchĕng, trong pơm jang păng tơgŭm kon pơlei kon kông hơtŏk tơ iung klaih đơ̆ng hin dơnuh kơjăp xơđơ̆ng hloh.

Lan chih păng pơre nơ̆r