VOV4.Bahnar - Pơgê năr 20/12, Dơnŏ anĭh Mặt trận Tổ quốc Việt Nam pơlei tơm Hồ Chí Minh pơgơ̆r pơm lêh sơng iŏk tơdrong tơgum djru ăn Hơnĭh mong jên “Kơ yuơ bơngai dơnuh” đơ̆ng rim khŭl, hơnĭh mơdroi sa, rim bơngai vă vei lăng năng tông Tết Nguyên đán Nhâm Dần 2022 ăn kon pơlei erĭh sa tơnap tap.

Pơlei tơm Hồ Chí Minh sơng iŏk vă jê̆ 56 ti hlak jên vei lăng năng tông Têt ăn bơngai dơnŭh

Jang kiơ̆ nơ̆r krao hơvơn đơ̆ng Dơnŏ anĭh MTTQ Việt Nam pơlei tơm Hồ Chí Minh, lơ hơnĭh mơdro sa mă đơ̆ng ‘nao plôih ‘măng iung jang đơ̆ng rŏng ji hơbŭh pơrăm mă lei hlôi vang chă tơra tơgop ăn Hơnĭh mong jên “Kơ yuơ bơngai dơnŭh”. Tơ̆ jơ pơm lêh, Dơnŏ anĭh MTTQ Việt Nam pơlei tơm hlôi sơng iŏk đei vă jê̆ 56 ti hlak jên đơ̆ng 2 ‘nu bơngai păng 20 hơnĭh bơ̆ jang, hơnĭh mơdro sa. Đơ̆ng kon jên tơgŭm djru au, Dơnŏ anih MTTQ Việt Nam pơlei tơm gô iung jang vei lăng năng tông Têt Nguyên đán Nhâm Dần ăn kon pơlei rim hơdrung kon kông erĭh sa tơnap tap; ŭnh hnam vă jê̆ dơnŭh; bơngai kră hơdro po; hơ ioh mơti mơtek kơ yuơ Covid-19, ... mĭnh tơnô̆ kơ jă 1 trĭu hlak jên.

Tơblơ̆ nơ̆r: Amazưt