VOV4.Bahnar - Tơ̆ hop akŏm Kuô̆k hô̆i ‘nao âu, lơ bơ ngai tang măt Kuô̆k hô̆i akhan, hơ dai hăm tơ lĕch dôm trong jang tang găn jĭ Covid-19, ‘nŏh athei tơ lĕch jang ‘lơ̆ng dôm tơ drong tơ gŭm ăn kon pơ lei, bơ ngai jang, tơ ‘ngla iŏk bơ ngai jang ƀơm ưh ‘lơ̆ng đơ̆ng jĭ. Kŭm hăm ‘nŏh, dôm bơ ngai tang măt Kuô̆k hô̆i oei athei dôm anih tơm, anih jang kơ pal kơ trung ương kăl đei trong jang hơ doi kơ jăp ‘lơ̆ng lơ̆m tơ drong pơm tơ lĕch păng tĕch mơ dro tơ mam ăn anih tĕch mơ dro păng kon pơ lei.

Pơ ma nuh găh dôm trong ạng tang găn jĭ COVID- 19, lơ bơ ngai tang măt Kuô̆k hô̆i akhan, trong jang ‘nŏh tôch kơ tang vă tang găn jĭ, mă lei lê̆ tơ mât yoa dôm tơ drong ưh kơ kăl dêh hnang. Mă tơ pă khei 'năr âu ki, đei lơ tơ ring tơ mât yoa dôm trong jang tang găn jĭ ưh kơ lăp, pơm mơ mat tat ăn kon pơ lei, bơ ngai jang păng anih tĕch mơ dro lơ̆m tơ drong chơ chuĕn tơ mam, pơm ăn tơ drong chơ chuĕn, pơ truh tơ mam đơ̆ng dôm tơ ring tơ ƀâp mơ mat tat, ƀât lăp ưh gơ̆h yak vih vât.

Kiơ̆ bơ ngai tang măt Phan Đức Hiếu, khul Thái Bình, athei hơ tŏk tơ drong jang hơ doi đơ̆ng dôm tơ ring, lơ̆m tơ drong tang găn jĭ kiơ̆ trong năng kăl băl păng roi tơ băt rơ đăh rơ đong, vă pơ jing tơ drong ‘lơ̆ng ăn tơ drong chơ chuĕn tơ mam đơ̆ng dôm tơ ring:

“Kơ plăh hrei ‘nâu jĭ tơ̆ dôm tơ ring pha ra băl păng dôm trong jang tang găn jĭ kŭm pha ra băl. Lơ̆m 1 tơ drong yơ ‘nŏh ‘nâu jĭ dôm trong jang gĭt kăl, mă lei tơ dăh đei tơ drong pha ra băl lơ̆m trong jang đơ̆ng dôm tơ drong tang găn jĭ sơ jing găn trong chơ chuĕn tơ mam păng tơ drong yak vih vât đơ̆ng bơ ngai. Kiơ̆ nơ̆r tơ roi inh băt dang ei lơ jăl trong oei đei tơ drong găn trong, chĭt găn tơ drong chơ tơ mam vih vât kơ na kăl đei tơ drong jang hơ doi đơ̆ng dôm tơ ring, kơ plăh âu athei găn ƀiơ̆ tơ drong jang pha ra băl, ưh kơ kăl, đơ̆ng nŏh vă gơ̆h pơih trong hiôk hian ăn tơ drong chơ chuĕn tơ mam”.

Tơ blang găh dôm trong jang vă chơ chuĕn tơ mam đơ̆ng dôm tơ ring, Kơ dră tơm vei lăng jang kơ măy, tĕch mơ dro Nguyễn Hồng Diên ăn tơ băt, jăl khei mă blŭng tang găn jĭ Covid 19, dôm tơ ring oei tam mă kơ chăng, tơ hlăk tăk jing mơ mat tat mưh chơ chuĕn tơ mam kăl ăn kon pơ lei, ưh kơ măh tơ mam, yoa ưh đei trong chơ chuĕn. Dôm tơ drong ưh kơ lăp âu hlôi đei dôm anih vei lăng năng ƀôh păng oei hơ met pơ ‘lơ̆ng:

“Anih tơm vei lăng jang kơ măy, tĕch mơ dro athei rim anih choh jang xa hơ tŏk tơ drong jang xa, pơm tơ lĕch phe ƀa tơ mam xa, mă loi ‘nŏh tơ mam oei hơ drih, ‘nhot, ƀum, plei ‘long tơ̆ tơ ring đei jĭ păng dôm tơ ring tơ til kŭm nhen lơ̆m tĕh đak vă kơ chăng chơ tĕch tơ̆ ‘ngoăih. Dôm anih vei lăng trong nơ năm, công an, jang pơ gang, khul kơ dră dôm tơ ring, mă loi jĭ dôm tơ ring đei jĭ athei jang kiơ̆ mă tơ drong pơ vang găn đơ̆ng Khul kơ dră tĕh đak, Thủ tướng tĕh đak, ưh gơ̆h tơ lĕch dơ̆ng tơ drong hơ găt nai păng bơ̆ jang kiơ̆ ưh kơ trŏ. Dôm tơ ring athei hơ nơ̆ng hơ len năng, jăh tơ gŭm ăn dôm anih tĕch mơ dro pơ truh tôm tơ mam kăl, gơ̆h ‘măn răk đơ̆ng 10 - 15 năr, lăp hăm khei ‘năr ăn oei hơ drô̆; atŭm hăm ‘nŏh hơ met ming mă ‘lơ̆ng tơ drong pơ truh tơ mam kiơ̆ đơ̆ng siêu thị, kơ chơ so păng mong akŏm tơ mam, tơ iung trong tĕch mơ dro, nhen tĕch mơ dro hăm điên tư đơ̆ng hơ tăih.”

Lơ bơ ngai tang măt Kuô̆k hô̆i oei akhan, hơ dai hăm dôm trong tang găn jĭ athei tơ lĕch jang mă ‘lơ̆ng dôm tơ drong tơ gŭm ăn kon pơ lei, bơ ngai jang, tơ ‘ngla iŏk bơ ngai jang ƀơm kơ nê̆ đơ̆ng jĭ Covid 19. Mưh kon bơ ngai gơ̆h tơ iung đei tơ drong pran, ‘lơ̆ng ‘nŏh gô găn đei jĭ păng hơ met klăih đĭ jĭ. Dang ei, Khul kơ dră tĕh đak đei lơ tơ dỏng tơ gŭm nhen: tơ jur kơ jă điên, đak, pơ dui khei ‘năr nôp thuê̆, hŭt ƀiơ̆ 1,2 kơ sô jên athei nôp, tơ gŭm hrĕnh ăn kon pơ lei, bơ ngai jang păng tơ ‘ngla iŏk bơ ngai jang. Bơ ngai tang măt Vũ Thị Lưu Mai, khul Hà Nội akhan, tơ drong Khul kơ dră tĕh đak tơ lĕch dôm tơ drong tơ gŭm hrĕnh kiơ̆ trong jang rơ hơi hiôk, pơ jing đei tơ drong ‘lơ̆ng ăn bơ ngai xa yoa, mă lei athei rơih trŏ bơ ngai, ưh gơ̆h jang vă pơ trŏ, atŭm hăm ‘nŏh athei roi tơ băt trong jang hơ len năng đơ̆ng rŏng:

“Yoa hrei ‘nâu mă tơ pă hăm 1,2 tơ drong jang nhen thuê̆, hải quan ‘nŏh bơ̆n jang kiơ̆ trong hơ len năng đơ̆ng rŏng. Mưh chih tơ roi ưh kơ trŏ ‘nŏh athei iŏk pơ dreu mă tôm, mă lei hăm jên tơ gŭm ‘nŏh pha păng bơ̆n athei hơ len năng tơ drong trŏ ƀlep. Kơ lih yoa mưh chih tơ roi ‘nŏh kon pơ lei lăp băt hôp hô sơ păng tơ drong hơ len năng trŏ dăh ưh ‘nŏh jĭ hơ năp jang vei lăng tĕh đak đơ̆ng dôm anih jang kơ pal mưh bơ̆ jang. Mưh tơ lĕch jên ăn kon pơ lei ‘nŏh nhen thoi tơ drong ‘nŏh trŏ bơih. Tơ drong nai dơ̆ng, tơ drong tơ gŭm ‘nŏh jĭ tơ drong ‘lơ̆ng, jĭ um ai kơ khul kơ dră tĕh đak chro ti vă kŭm hăm kon pơ lei yak hlŏh mơ mat tat. Yoa thoi nŏh, mưh bơ̆ jang athei bơ̆ jang mă ‘lơ̆ng ‘năi”.

Vă bơ̆ jang kiơ̆ tơ drong tơ chơ̆t kơ sô̆ 30 đơ̆ng Kuô̆k hô̆i jăl XV, ‘nao âu Khul kơ dră tĕh đak tơ lĕch tơ drong Tơ chơ̆t 86/NQ-CP găh hơ met ming dôm trong jang tang găn jĭ COVID-19. Tơ drong tơ chơ̆t ‘nâu đei năng jĭ pơih trong, pơ jing tơ drong ‘lơ̆ng ăn dôm anih tơm, anih jang kơ pal, tơ ring tơ rang kơ chăng bơ̆ jang kiơ̆ dôm trong tang găn jĭ. Tơ drong kăl hlŏh dơ̆ng lơ̆m tơ drong tơ chơ̆t, ‘nŏh Khul Kơ dră tĕh đak hlôi đei trong tang găn jĭ ‘lơ ‘lŏ, ‘moi kiơ̆ tơ̆ yăn âu păng đei yoa ‘lơ̆ng hlŏh. Lơ nơ̆r pơ ma akhan ‘nâu jĭ trong jang tôch trŏ păng gơ̆h hơ gei.

Dơ̆ng: Tơ blơ̆