VOV4.Bahnar - Năr pơ̆h giĕng ‘nâu kơnh, jing ‘năr 23/5, bơ ngai tăh hla lơ̆m tĕh đak vă năm pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021 – 2026. Tơ̆ tơ ring Tây Nguyên, giĕng âu ki, dôm bơ ngai lĕch pơ jei hlôi pơ gơ̆r tơ ƀâp bơ ngai tăh hla vă krao hơ vơn pôk rơih trŏ tơ drong hơ găt. Lơ̆m giĕng âu ki mơ̆n, Khul dăr lăng găh tơ drong pôk rơih đơ̆ng Anih chĕp kơ̆l pơ gơ̆r Kuô̆k hô̆i, Anih vei lăng pôk rơih tĕh đak yoa Phŏ Kơ dră tĕh đak Võ Thị Ánh Xuân chĕp kơ̆l truh dăr lăng tơ drong hơ met ăn pôk rơih tơ̆ tơ ring.

Giĕng âu ki, dôm bơ ngai lĕch pơ jei pơm tang măt Kuô̆k hô̆i păng bơ ngai tang măt Jơ nŭm pơ gơ̆r kon pơ lei dôm dêh char tơ̆ tơ ring Tây Nguyên pơ gơ̆r tơ ƀâp bơ ngai tăh hla vă krao hơ vơn ăn pôk rơih. Tơ drong pơ gơ̆r ăn 10 ‘nu bơ ngai lĕch pơ jei pơm bơ ngai tang măt Kuô̆k hô̆i jăl XV păng 85 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char, đơ̆ng 2021-2026 bơ̆ jang tơ drong krao hơ vơn pôk rơih đơ̆ng kơ dih đei Anih MTTQ Việt Nam dêh char Kon Tum pơ gơ̆r tôch ‘lơ̆ng, trŏ tơ drong hơ găt. Vă rim bơ ngai tăh hla mưh đei apĭnh akhan, dôm bơ ngai lĕch pơ jei pơm bơ ngai tang măt Kuô̆k hô̆i păng pơm bơ ngai tang măt Jơ nŭm pơ gơ̆r kon pơ lei dêh char đei jơ hngâm đon ‘lơ̆ng ngăl; Tơ drong vă jang tôch rơ đăh, tơ ƀôh hơ dăh đon tơ năp đơ̆ng kơ dih mưh đei bơ ngai tăh hla pôk pơm bơ ngai tang măt Kuô̆k hô̆i păng bơ ngai tang măt Jơ nŭm pơ gơ̆r kon pơ lei dêh char.

Bơ ngai tăh hla kŭm tơ chĕng ‘lơ̆ng 1,2 ‘nu bơ ngai lĕch pơ jei đei đon jang tơ năp, rơ gei mơh bơ̆ jang, hlôi chih tơ lĕch đei trong vă jang lăp hăm yăn âu păng gơ̆h jang kiơ̆. Đơ̆ng rŏng kơ mơ̆ng 5 ‘nu bơ ngai lĕch pơ jei pơm bơ ngai tang măt Kuô̆k hô̆i jăl XV păng 7 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char roi tơ băt tơ drong vă jang, bơ ngai tăh hla Huỳnh Ngọc Phong, hnam tơ̆ thôn 1, xăh Tân Lập, apŭng Kon Rẫy akhan:

“Inh tôch hơ iă, tôch lui hăm dôm bơ ngai lĕch pơ jei ‘măng mă âu. Đe sư hlôi pơ ma tơ lĕch lơ tơ drong oei tơ tăm, mơ mat tat đơ̆ng dêh char Kon Tum pơ ma atŭm, apŭng Kon Rẫy nhôn pơ ma adrô̆. Pơ tih gia nhen Kơ dră tơm vei lăng jŏh ayŏ kơ dŏ xoang Nguyễn Văn Hùng đơ̆ng hơ tăih truh tơ̆ âu kŭm hơ len năng rim tơ drong mơ mat tat, tơ drong ‘lơ̆ng tơ̆ dêh char Kon Tum pơ ma atŭm păng apŭng Kon Rẫy pơ ma adrô̆. Inh ƀôh thoi nŏh jĭ đon tơ tăm tôch ‘lơ̆ng. Vă truh ‘năr 23/5 bơ ngai tăh hla nhôn vă chĕp kơ phĭu pôk rơih vă dôm bơ ngai đei pôk rơih gơ̆h bơ̆ jang kiơ̆ nơ̆r pơ kăp, tơ drong vă jang đơ̆ng kơ dih hlôi pơ ma tơ lĕch.”

Hop akŏm bơ ngai tăh hla oei mơ lôh hăm tơ drong pôk rơih Kuô̆k hô̆i păng Jơ nŭm pơ gơ̆r kon pơ lei jơ̆p tơ ring

Oei tơ̆ plt Buôn Ma Thuột, Anih jang đoan dêh char Dak Lak pơ gơ̆r hop akŏm Bơ ngai tăh hla oei mơ lôh hăm tơ drong pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021 – 2026 ‘măn ăn đe đoàn viên druh dăm păng sinh viên dôm hnam trưng đăi hŏk, cao đẳng. Lơ̆m hop akŏm, bơ ngai tăh hla oei mơ lôh chă hơ len năng Luơ̆t pôk rơih Bơ ngai tang măt Kuô̆k hô̆i păng bơ ngai tang măt Jơ nŭm pơ gơ̆r kon pơ lei, Khôi luơ̆t tơm păng dôm hla ar chih đơ̆ng anih jang kơ pal găh tơ drong pôk rơih; lăng ƀôh, hlôh vao vă tơ jră hăm đon tơ chĕng ‘mĕh phă ngơ̆r pôk rơih; đei roi tơ băt găh trong tăh hla pôk rơih, trong sek tơ lang mưh đei tơ drong jĭ jăn lơ̆m năr pôk rơih. 

Đoàn viên Phan Văn Khải, tơ̆ phường Thành Công, plt Buôn Ma Thuột đei nơ̆r pơ ma: “Jĭ 1 ‘nu bơ ngai tăh hla ‘nao ‘măng mă blŭng năm pôk rơih, kiơ̆ đơ̆ng hop akŏm bơ ngai tăh hla oei mơ lôh, ŏh băt hơ dăh ƀiơ̆ găh tơ drong gơ̆h năm pôk rơih đơ̆ng kơ dih păng đei tơl tơ blang lơ tơ drong mă kơ dih kâu tam mă gan băt. Kiơ̆ đơ̆ng noh ŏh hơ met jơ năr năm pôk rơih kiơ̆ tơ drong hơ găt. Oh hơ mĕng dôm bơ ngai tang măt quốc hội păng Jơ nŭm pơ gơ̆r kon pơ lei jăl truh gô tơ iung đon rơ gei păng đei lơ tơ drong tơ chơ̆t trŏ ƀlep vă tơ gop ăn tơ drong jang atŏk tơ iung mŭk drăm, tơ pôl tơ̆ tơ ring”.

Oei pă 1 giĕng dơ̆ng truh năr pôk rơih, giĕng âu ki, Khul dăr lăng tơ dỏng pôk rơih đơ̆ng Anih chĕp kơ̆l pơ gơ̆r Kuô̆k hô̆i, Anih vei lăng pôk rơih tĕh đak yoa Phŏ Kơ dră tĕh đak Võ Thị Ánh Xuân chĕp kơ̆l truh dăr lăng tơ drong hơ met ăn pôk rơih tơ̆ 1,2 anih lơ̆m plt Gia Nghĩa, dêh char Dak Nông.

Phŏ Kơ dră tĕh đak Võ Thị Ánh Xuân iung pơ ma nơ̆r pơ tho

Kiơ̆ Anih vei lăng pôk rơih plt Gia Nghĩa, tơ̆ dôm anih tơ ƀâp, krao hơ vơn ăn pôk rơih, lơ bơ ngai tăh hla akhan, dôm bơ ngai lĕch pơ jei đei jơ hngâm đon tơ păt ‘lơ̆ng, jang tơ năp, pơm kiơ̆ ‘lơ̆ng dôm tơ drong hơ găt đơ̆ng luơ̆t, đei tôm tơ drong kăl, tơ găl lĕch pơ jei pơm bơ ngai tang măt Kuô̆k hô̆i păng Jơ nŭm pơ gơ̆r kon pơ lei jơ̆p tơ ring đơ̆ng 2021-2026. Dang ei plt Gia Nghĩa hlôi pơ jing 59 anih tăh hla, hăm 8.560 ‘nu bơ ngai tăh hla vă năm pôk rơih. Tơ ring đei trong jang tôch rơ đăh vă vei lăng sơ đơ̆ng ‘lơ̆ng tơ pôl, tang găn tơ drong jĭ… adrol, lơ̆m păng đơ̆ng rŏng kơ pôk rơih.

Kiơ̆ đơ̆ng dăr lăng, Phŏ Kơ dră tĕh đak Võ Thị Ánh Xuân tơ chĕng ‘lơ̆ng dôm tơ drong adrin đơ̆ng plt Gia Nghĩa mưh tơ lĕch jang tơ tom, trŏ jơ năr hơ găt hăm dôm tơ drong jang hơ met ăn pôk rơih. Atŭm hăm ‘nŏh hơ pơi ‘mĕh dôm tơ ring jang ‘lơ̆ng tơ drong tang găn jĭ Covid-19 pơm ‘lơ̆ng ăn bơ ngai tăh hla păng kon pơ lei, vă năr pôk rơih gơ̆h jing năr chơt hơ iă kơ đĭ đăng kon pơ lei tơ pă.

“Đei 2 tơ drong, mă 1 bơ ngai lĕch pơ jei athei đei roi tơ băt, krao hơ vơn lăp hăm tơ drong gơ̆h jang đơ̆ng kơ dih. ‘Măng mă âu mơ mat ƀiơ̆ ‘nŏh đei pơ gơ̆r lơ̆m khei ‘năr oei đei jĭ Covid-19 yoa thoi nŏh bơ̆n athei adrin, tơ drong gơ̆h jang đơ̆ng bơ ngai lĕch pơ jei athei vei lăng ‘lơ̆ng kiơ̆ lơ trong, ưh đei pơ gơ̆r kơ tă tơ̆ yăn âu ‘nŏh gơ̆h pơ gơ̆r kiơ̆ trong nai nhen pơih tơ roi lơ̆m radio, tivi... pơm thoi yơ vă dôm bơ ngai lĕch pơ jei gơ̆h jang ‘lơ̆ng hlŏh tơ drong krao hơ vơn pôk rơih đơ̆ng kơ dih. Mă 2 ‘nŏh bơ ngai tăh hla athei iŏk đei tôm nơ̆r roi tơ băt găh bơ ngai lĕch pơ jei păng nơ̆r roi tơ băt găh pôk rơih ‘măng mă âu. Bơ ngai tăh hla athei băt vă gơ̆h jang ‘lơ̆ng hơ năp jang đơ̆ng kơ dih, đơ̆ng năm vang năm pôk rơih, pôk rơih mă trŏ, mă tôm kiơ̆ luơ̆t”.

Dơ̆ng: Tơ blơ̆