VOV4.Bahnar - Hơlen nơ̆r athei đơ̆ng Kơdră chĕp pơgơ̆r Dơnŏ anĭh tơm Kŏng ang păng Kơdră chĕp pơgơ̆r Dơnŏ anĭh bơ̆ jang Pơlong-Pôk hơpăh Trung ương, Thủ tướng Tĕh đak hlôi đei Hla bơar tơblang hơdăh kơsô̆ 1065/TTr-TTg năr 3/8/2021 athei Kơdră chĕp pơgơ̆r Tĕh đak pôk hơpăh Mê đai nuih mơng dơ̆ng mă Ƀar ăn nhap Thượng úy Phan Tấn Tài, Kang ƀô̆, Khŭl Kang sat dăr lăng hơlen tơdrong yoch ma tuý, Kŏng ang Kuân 6, Kŏng ang pơlei tơm Hồ Chí Minh, găh Dơnŏ anĭh tơm Kŏng ang, hlôi iŏk đei jơnei kơtang lơ̆m iung tơ jră, tơgŭm ăn iung tơ jră, tơgop lơ̆m bơ̆ jang tơ iung pơjing chủ nghĩa xã hội păng vei lăng Tĕh đak. Hơdrol kơ ‘nŏh, drung kơsơ̆ năr 2/8, Khŭl bơ̆ jang pơtrui lơ phương đei 4 ‘nu kang ƀô̆ kŏng ang (lơ̆m au đei Thượng úy Phan Tấn Tài, bơ̆ jang dăr joang Khŭl Kanh sat dăr lăng hơlen tơdrong yoch ma tuý Kŏng ang Kuân 6) bơ̆ jang pơtrui, dăr lăng tang găn jĭ hơbŭh. Tơ̆ trong pơtrui, Khŭl bơ̆ jang ƀô̆h mĭnh ‘nu tơdăm lĕch tơ̆ trong, pơm glăi tơdrong pơkăp tang găn jĭ. Khul bơ̆ jang pơtrui athei bơngai tơdăm au năm tơ̆ Hơnĭh bơ̆ jang Kŏng ang phương vă xek tơlang. Tơ̆ trong năm, bơngai tơdăm au ư̆h kơ pơm kiơ̆, vơ̆r gre rĕnh kơdau jăk kơna khŭl pơtrui drŭh. Lơ̆m jơ drŭh rôp, bơngai tơdăm au bĭt gre pơm ăn gre kơ Thượng úy Phan Tấn Tài pơ̆k păng lôch răm.

Tơblơ̆ nơ̆r: Amazưt