VOV4.Bahnar – Giĕng âu ki, Thủ tướng tĕh đak pơ gơ̆r jang bơ̆ jang đơ̆ng Khul kơ dră pơ gơ̆r tĕh đak hăm khul kơ dră chĕp kơ̆l Anih krao hơ vơn kon pơ lei T.Ư, Anih T.Ư MTTQ Việt Nam păng dôm khul jang chinh trĭ, tơ pôl găh tơ drong tang găn jĭ Covid-19, vei lăng tơ drong tơ drong arih xa kơ kon pơ lei păng vei lăng ‘lơ̆ng tơ drong arih xa tơ pôl. Thủ tướng Phạm Minh Chính pơ ma hơ dăh, Khul kơ dră tĕh đak vă jang hơp doi ‘lơ̆ng hăm Anih krao hơ vơn kon pơ lei T.Ư, MTTQ jơ̆p tơ ring, dôm khul jang chinh trĭ, tơ pôl lơ̆m tơ drong tang găn jĭ Covid-19; atŭm hăm ‘nŏh pơ ma hơ dăh hơ năp jang tih tên đơ̆ng tơ drong jang krao hơ vơn kon pơ lei, roi tơ băt, pơ hlôh đon ăn kon pơ lei yoa jơ hngâm pran kơ dih, yoa jơ hngâm pran tơ pôl panwg yoa tơ drong jang tŏk kơ tĕh đak.

Tơ̆ jơ bơ̆ jang, Anih krao hơ vơn kon pơ lei TW athei MTTQ, dôm khul grŭp jang chinh trĭ, tơ pôl hơ nơ̆ng krao hơ vơn kon pơ lei bơ̆ jang ‘lơ̆ng tơ drong pơ vang găn lơ̆m tơ pôl kiơ̆ tơ drong tơ chơ̆t 16 tơ̆ dôm tơ ring; athei Khul kơ dră tĕh đak jang ‘lơ̆ng hlŏh dơ̆ng tơ drong vei lăng sơ đơ̆ng tơ drong arih xa tơ pôl, tơ gŭm ăn dôm bơ ngai oei tơ ƀâp mơ mat tat yoa pơ vang găn tơ pôl, mă loi ‘nŏh bơ ngai oei hiong tơ drong jang; Khul kơ dră tĕh đak pơ tho ăn Anih tơm vei lăng bơ ngai jang, linh jĭ rơ ka păng tơ pôl tơ chĕng hơ len, chih tơ mât dơ̆ng bơ ngai đei xa yoa tơ drong tơ gŭm đơ̆ng Khul kơ dră tĕh đak; Khul kơ dră tĕh đak athei tơ rĕk, pơ ngơ̆t hlŏh dơ̆ng ăn khul y ƀak si bơ̆ jang tang găn jĭ blŭng a; jăh ƀet vắc-xin ăn dôm bơ ngai kăl đei ƀet hơ drol...

Pơ ma lơ̆m jơ bơ̆ jang, Thủ tướng Phạm Minh Chính pơ ma hơ dăh, lơ̆m khei ‘năr jĭ oei tôch hơ mơt hrei ‘nâu, hăm lơ pơ rang jĭ tơ plih ‘nao, bơ̆n athei đei trong jang ‘nao, hơ nơ̆ng hơ met ming vă gơ̆h jang ‘lơ̆ng hlŏh dơ̆ng, yoa kon pơ lei mă pơ vih pơ văn. Khul kơ dră tĕh đak pơ hnŏng pơ jing 1 khul kơ dră tơ plih ‘nao, tơ păt ‘lơ̆ng, jang tơ năp, đei yoa pơ vih ăn kon pơ lei. Hơ nơ̆ng tưk tơ iung dôm tơ drong hlôi jang đei, pơm hơ tŏk hlŏh dơ̆ng tơ drong chĕp kơ̆l pơ gơ̆r đơ̆ng Đảng lãnh đạo, tơ drong vei lăng đơ̆ng tĕh đak, kon pơ lei pơm tơm kiơ̆ đơ̆ng MTTQ, khul grŭp jang chinh trĭ, tơ pôl, vang tơ gop nơ̆r, tơl tơ blang. Thủ tướng pơ ma hơ dăh, kon pơ lei ‘nŏh jĭ tơm dơ nơm, kŭm jing tơ ‘ngla bơ̆ jang tang găn jĭ hai.

Thủ tướng pơ ma hơ dăh, tơ drong krao hơ vơn kon pơ lei tơ̆ anih jang kơ tĕh đak kăl ‘moi kiơ̆ nơ̆r pơ tho đơ̆ng Đảng, tĕh đak, tơ gop pơm tơ plih ‘lơ̆ng găh tơ drong krao hơ vơn kon pơ lei. MTTQ đơ̆ng T.Ư truh tơ̆ tơ ring tơ guăt bơ ngai jang, tơ gŭm ăn kon pơ lei đei tơ drong mơ mat tat. Thủ tướng pơ ma hơ dăh, tơ drong kăl đei chih răk đơ̆ng dôm tơ drong tơ blăh adrol sơ̆ ăn ƀôh, tơ drong akŏm jơ hngâm pran đơ̆ng kon pơ lei, tơ guăt đĭ đăng hơ drĕch hơ drung ‘nŏh tôch gĭt kăl. Athei krao hơ vơn kon pơ lei vang bơ̆ jang vă vei lăng kơ dih kâu đe sư hai. Thủ tướng pơ ma hơ dăh:

“Ƀok Hô pơ ma bơih "krao hơ vơn kon pơ lei rơ gei ‘nŏh tơ drong kiơ kŭm jang kĕh" Ƀok Hô tơ tă hloi akhan "Khul kon pơ lei tôch tih, tơ drong krao hơ vơn kon pơ lei tôch gĭt kăl, ưh lăp iŏk yoa hla ar chih, pơ gơ̆r mít tinh, chih tơ băt nơ̆r, săy pơ răih hla ar, tơ lĕch nơ̆r pơ ma ‘nŏh tôm bơih ôh" Ƀok oei pơ ma "Hơ drol hlŏh ‘nŏh athei chă trong tơ blang tơ ƀôh ăn rim bơ ngai băt hơ dăh ‘nŏh jĭ tơ drong đei yoa ăn đe sư, jĭ tơ drong jang kơ đe sư, đe sư athei bơ̆ jang khŏm đei”, bơ̆n ưh gơ̆h pơ ma ƀơ̆r hŏh đĕch, bơ̆n athei krao hơ vơn, pơ tho tơ ƀôh ăn kon pơ lei, bơ̆n athei krao hơ vơn kon pơ lei pơm hơ tŏk đon kơ chăng, yoa jơ hngâm pran kơ dih đe sư, jơ hngâm pran tơ pôl, yoa tơ drong jang tŏk kơ tĕh đak.”

Tơ dra adrol tơ drong jĭ lơ̆m khei ‘năr truh oei tôch hơ mơt, mă loi tơ̆ plt Hồ Chí Minh păng dôm dêh char, plt găh Pơ băh. Yoa thoi nŏh athei bơ̆ jang mă ‘lơ̆ng dôm tơ drong hơ găt đơ̆ng Đảng, tĕh đak găh tang găn jĭ. MTTQ păng dôm khul grŭp jang chinh trĭ, tơ pôl athei hơ tŏk tơ drong pơ gơ̆r, dăr lăng; tơ gŭm kiơ̆ lơ trong pha ra băl. Athei vei lăng ‘lơ̆ng tơ drong sơ đơ̆ng tơ̆m tơ pôl, pơm sơ đơ̆ng ăn kon pơ lei, bơ̆ jang ‘lơ̆ng dôm tơ drong hơ găt tang găn jĭ. Thủ tướng pơ ma hơ dăh găh tơ drong tưk tơ iung hơ năp jang đơ̆ng Krao hơ vơn kon pơ lei mưh đei tơ drong krê hơ mơt, mă loi ‘nŏh lơ̆m khei ‘năr đei jĭ covid -19 âu.

“Inh athei Anih krao hơ vơn kon pơ lei iĕm hơ nơ̆ng jang ‘lơ̆ng hơ năp jang kơ dih mưh đei tơ drong krê hơ mơt. Anih krao hơ vơn kon pơ lei pơ gơ̆r, jang hơ doi hăm Mặt trận Tổ quốc Việt Nam, dôm khul grŭp jang chinh trĭ tơ pôl, anih jang kơ tĕh đak, khul grŭp đei ƀơm truh krao hơ vơn bơ ngai jang, kon pơ lei pơm kiơ̆ mă ‘lơ̆ng tơ drong chĕp kơ̆l pơ gơ̆r đơ̆ng anih jang đảng, khul kơ dră tơ ring, tưk tơ iung tơ dỏng jang chinh trĭ, vang jang lơ̆m khul jang hơ drol. Hlôh vao kơ jăp, tơ roi tơ băt, krao hơ vơn kăn ƀô̆, Đảng viên, kon pơ lei bơ̆ jang kiơ̆ trong jang đơ̆ng Đảng, khôi luơ̆t tĕh đak kiơ̆ lơ trong, đei yoa ‘lơ̆ng, hơ tŏk tơ drong pơm tơm đơ̆ng kon pơ lei, hơ tŏk đon pơ hnŏng păng kơ sư̆k pran đơ̆ng tơ guăt đĭ đăng hơ drĕch hơ drung, drơ̆ng 1 nơ̆r lơ̆m tơ pôl, hơ met kơ jăp đon lui đơ̆ng kon pơ lei hăm Đảng, tĕh đak.”

Hăm Khul linh so, oei đei năng jĭ khul linh tơ blăh, bơ̆ jang păng choh jang xa. Khul druh dăm CS Hồ Chí Minh tơ iung jơ hngâm đon yak hơ drol, athei hơ met ming dơ̆ng mă kơ jăp păng oei kơ jăp tơ̆ tơ ring, băt hơ dăh rim tơ drong lơ̆m kon pơ lei. Khul drŏ kăn Việt Nam, Khul kon pơ lei jang chŭn mir Việt Nam... athei “pơ gơ̆r” ăn đĭ đăng bơ ngai jang vang bơ̆ jang tang găn jĭ. Công đoàn kŭm krao hơ vơn bơ ngai jang vang tơ gop, tơ gŭm ăn tơ drong tang găn jĭ. MTTQ păng dôm khul jang chinh trĭ, tơ pôl athei bơ̆ jang kơ jăp tơ̆ tơ ring ‘năi.

Thủ tướng oei tơ tă, mưh sơng iŏk hơ met bơ ngai jĭ athei hlôh hơ dăh “ăn mât tơ̆ hnam pơ gang hơ drol, pơm hla ar đơ̆ng rŏng”. ‘Ngoăih kơ hơ met ăn dôm bơ ngai F0 tơ̆ hnam pơ gang păng ăn oei hơ drô̆ hăm bơ ngai F0 tơ̆ hnam ‘nŏh Anih tơm vei lăng jang pơ gang athei tơ chĕng hơ len, hơ met jĭ ăn dôm bơ ngai jĭ ưh đei tơ̆ hnam pơ gang dăh mă tơ̆ hnam, mă athei hơ met tơ̆ dôm anih rơ hơi ‘lơ̆ng kiơ̆ trong ăn bơ ngai dơ̆ng, ngôi hơ tăih băl. Bơ̆ jang iŏk yoa hrâu pơ gang hmă hăm pơ gang đơ̆ng hla, rưh ‘long mă lăp ‘lơ̆ng. Anih tơm vei lăng bơ ngai jang-linh jĭ rơ ka păng tơ pôl tơ chĕng hơ len, tơ mât yoa dôm trong jang đơ̆ng Đảng, tơ drong tơ gŭm đơ̆ng khul luơ̆t tĕh đak hăm dôm bơ ngai vang jang lơ̆m khul tang găn jĭ hơ drol, mă loi ‘nŏh jĭ pôk hơ păh, pơ lung jơ hngâm đon păng hơ păh tơ mam kiơ̆ đơ̆ng pôk pơ ư đe sư.

Dơ̆ng: Tơ blơ̆