VOV4.Bahnar - ‘Năr 26/9, Thủ tướng Phạm Minh Chính pơ gơ̆r hop akŏm trư̆k tuyê̆n hăm tơ pôl bơ ngai tĕch mơ dro păng dôm tơ ring găh trong jang tơ gŭm ăn anih tĕch mơ dro lơ̆m khei ‘năr đei jĭ COVID-19. Pơ ma lơ̆m hop akŏm, Thủ tướng tơ chĕng ‘lơ̆ng lơ nơ̆r pơ ma, tơ gop gĭt kăl đơ̆ng tơ pôl bơ ngai tĕch mơ dro lơ̆m păng ‘ngoăih kơ tĕh đak vă vang tơ jră hăm tơ drong jĭ Covid-19, hơ met pơ ‘lơ̆ng mơ mat tat, vei kơ jăp tơ drong jang xa, tĕch mơ dro.

Hop akŏm trư̆k tuyê̆n hăm tơ pôl bơ ngai tĕch mơ dro păng dôm tơ ring găh trong jang tơ gŭm ăn anih tĕch mơ dro yoa đơ̆ng jĭ COVID-19

Lơ̆m khei ‘năr truh, Thủ tướng athei: dôm anih tơm, anih jang kơ pal, tơ ring tơ rang bơ̆ jang mă ‘lơ̆ng dôm trong jang đơ̆ng Đảng, tĕh đak, tơ lĕch. Anih tơm tơ lĕch nơ̆r sơ kơ̆t tơ mât jên jang jăh pơ jing trong jang tŏk hơ lơ̆k dơ̆ng mŭk drăm, chih hơ dăh hăm rim tơ drong jang, tơ ring tơ rang. Atŭm hăm ‘nŏh, kơ dih kâu anih tĕch mơ dro kŭm athei chih pơ jing trong jang atŏk tơ iung dơ̆ng jang xa, tĕch mơ dro ăn kơ dih vă gơ̆h kơ chăng jang xa lơ̆m chăl ‘nao.

Thủ tướng pơ ma hơ dăh, Khul kơ dră tĕh đak, khul kơ dră pơ gơ̆r tơ ring hơ nơ̆ng năm hơ doi, vang tơ gŭm, pơ jing tơ drong ‘lơ̆ng păng tơ gŭm tôch ai ăn tơ pôl bơ ngai tĕch mơ dro, kon pơ lei lơ̆m tơ drong jang xa, tĕch mơ dro, mă loi lơ̆m khei ‘năr oei tôch mơ mat tat hrei ‘nâu. 

Dơ̆ng: Tơ blơ̆