VOV4.Bahnar  – Anih jang kơ Khul kơpal teh đak 'nao pơtruh hla bar pơgơ̆r đơ̆ng Thủ teh đak Phạm Minh Chính găh tơdrong pôk hơpăh, hơlêm hăm dôm khul jang, tơ 'ngla jang tơnăp lơ̆m tơdrong tang găn păng tơjră pơrang jĭ COVID-19. Kiơ̆ kơ noh, lơ̆m khei năr âu ki, lơ tơring pơm kiơ̆ kơjăp, drơ̆ng minh, gơh rơgei, đei jơnei dôm tơdrong jang tang găn păng tơjră pơrang jĭ COVID-19. Vă tơtom hơlêm khul jang, tơ 'ngla jang tang găn păng tơjră pơrang jĭ, Thủ tướng teh đak Phạm Minh Chính pơkăl rim anih jang tơm păng Anih vei lăng kon pơlei dôm dêh char, plei tơm tơtom hơlêm, pôk hơpăh hăm dôm khul jang, tơ 'ngla jang đei trong jang rơgei, tơnăp lơ̆m tơdrong jang tang găn păng tơjră pơrang jĭ COVID-19. Atŭm hăm noh, đei trong chă tơgŭm găh tơmam drăm păng đon bơnôh hăm khul jang tang găn păng tơjră pơrang jĭ păng đe mĕ ƀă kră, kon hơ ioh 'nhŏng oh kơ dôm bơngai vang jang lơ̆m khul tang găn păng tơjră pơrang jĭ.

Lan chih păng pơre nơ̆r