VOV4.Bahnar - Kiơ̆ tơ drong hơ găt 07/2021 đơ̆ng Khul kơ dră tĕh đak chih hơ dăh tơ drong tơ nuh lơ pang đơ̆ng 2021-2025, đơ̆ng sơ năm 2022, iŏk yoa jô̆ păh lăp hơ la kơ 1 triu 500 rơ bâu hlak jên 1 ‘nu, 1 khei tơ̆ tơ ring tơ rang păng hơ la 2 triu hlak jên 1 ‘nu 1 khei tơ̆ tơ ring kơ drâm gô đei chih tơ mât lơ̆m unh hnam tơ nuh, vă jê̆ tơ nuh.

Đơ̆ng 2022-2025, Việt Nam vă tơ mât yoa tơ drong hơ găt tơ nuh lơ pang ‘nao hăm tơ drong hơ tŏk kơ sô̆ jên iŏk yoa păng chih tơ băt mơ mat tat găh tơ drong jang hăm bơ ngai tơ nuh. Kiơ̆ kơ ‘nŏh, kơ sô̆ hơ găt hăm unh hnam tơ nuh, vă jê̆ tơ nuh hăm jên khei đei jô̆ atŭm ‘nŏh 1.500.000 hlak jên 1 ‘nu 1 khei tơ̆ tơ ring tơ rang păng 2.000.000 hlak jên 1 ‘nu 1 khei hăm tơ ring kơ drâm. Unh hnam tơ nuh păng vă jê̆ tơ nuh pha ra băl găh tơ drong hơ găt tam mă đei lơ̆m tơ drong pơ vih pơ văn tơ̆ tơ pôl.

Tơ drong hơ met ming âu gô pơ lung ăn dôm tơ ring tơ mât jên jang pơm tơ jur tơ nuh hin ăn dôm unh hnam oei ưh tam tôm găh kơ sô̆ iŏk yoa. Tơ drong hơ tŏk kơ sô̆ hơ găt găh iŏk yoa hăm unh hnam tơ nuh gô pơm hơ tŏk kơ sô̆ unh hnam tơ nuh păng vă jê̆ tơ nuh. Mă lei tơ drong tơ gŭm gô truh hăm lơ unh hnam păng đei yoa ƀiơ̆ hăm unh hnam tơ nuh, vă jê̆ tơ nuh đơ̆ng sơ năm 2022-2025.

Dơ̆ng: Tơ blơ̆