VOV4.Bahnar - Tơ̆ hơ năp tơ drong jĭ Covid-19 oei tơ pŏh tôch hơ mơt, lơ hơ iŏh athei oei hơ drô̆ vă khăm hơ len, hơ met jĭ COVID-19 dăh mă tơ ƀâp bơ ngai jĭ COVID-19, Anih tơm vei lăng jang pơ gang đei hla ar chih kơ sô̆ 7020 găh tơ drong ăn oei hơ drô̆ vă tang găn jĭ COVID-19 hăm đe hơ iŏh.

Kiơ̆ kơ ‘nŏh, Anih tơm vei lăng jang pơ gang ăn tơ băt asong ăn bơ ngai ‘lŏ gơ̆h năm vei lăng hơ iŏh tơ̆ dôm anih hơ met jĭ COVID-19, anih akŏm hơ met ăn bơ ngai jĭ COVID-19, anih oei hơ drô̆ atŭm dăh mă gơ̆h oei hơ dai hăm hơ iŏh mưh oei hơ drô̆ tơ̆ hnam hăm nơ̆r pơ kăp mât oei hơ dai hăm hơ iŏh, pơm kiơ̆ ‘lơ̆ng dôm tơ drong hơ găt tang găn jĭ Covid-19. 

Hăm tơ drong bơ ngai ‘lŏ ưh gơ̆h năm hơ doi vă vei lăng hơ iŏh ‘nŏh khul kơ dră tơ ring ăn bơ ngai nai vei lăng hơ iŏh, athei kăn ƀô̆ tơ̆ hnam pơ gang, anih oei hơ drô̆ dăh mă bơ ngai jang tơ gŭm vei lăng hơ iŏh, hlôh vao, băt trong vei lăng păng tơ gŭm ăn hơ iŏh. Hăm hơ iŏh hơ la 16 sơ năm jĭ bơ ngai Việt Nam, tơ ƀâp hăm bơ ngai jĭ COVID-19, athei oei hơ drô̆ tơ̆ hnam 14 năr jô̆ đơ̆ng năr tơ ƀâp mă hơ tuch hăm bơ ngai jĭ păng hơ nơ̆ng hơ len năng jơ hngâm pran lơ̆m 14 năr đơ̆ng rŏng dơ̆ng.

Dơ̆ng: Tơ blơ̆