VOV4.Bahnar - Anih vei lăng dôm tơ drong lơ̆m tơ pôl kơ Kuô̆k hô̆i ‘nao pơ gŏr hop akŏm atŭm ‘măng mă 21, hơ len năng, pơ ma nuh găh 2 tơ drong tih, ‘nŏh jĭ Tơ drong jang tơm kơ tĕh đak tơ jur tơ nuh hin păng vei sơ đơ̆ng tơ drong arih xa tơ pôl kơ jăp ‘lơ̆ng đơ̆ng 2021-2025. Lơ nơ̆r pơ ma lơ̆m hop akŏm akhan, athei chă tơ drong jang xa vă pơm tơ jur tơ drong ưh hơ tŏ băl đơ̆ng pơ drŏng hăm tơ nuh.

Kiơ̆ hla ar tơ roi, tơ drong iŏk đei đơ̆ng jang kiơ̆ dôm tơ drong tơ gŭm, tơ drong jang tơ jur tơ nuh hin đơ̆ng 2016-2020 hlôi jang kĕh păng iŏk đei lơ hlŏh tơ drong hơ găt đơ̆ng Kuô̆k hô̆i, Khul kơ dră tĕh đak pơ jao, tơ gop vei lăng sơ đơ̆ng tơ drong arih xa tơ pôl, hơ tŏk tơ drong jang mŭk drăm păng jang tŏk pran kơ jăp, mă loi ‘nŏh ƀât mă mŭk drăm tĕh đak oei tơ ƀâp lơ tơ drong mơ mat tat. Tơ drong pơ jei băl:“Jơ̆p lơ̆m tĕh đak vang tơ gŭm yoa bơ ngai tơ nuh – ưh đei lê̆ bu tơ̆ rŏng” đei tơ lĕch jang tơ̆ jơ̆p tơ ring, iŏk đei lơ tơ drong jơ nei. Iŏk đei păng lơ hlŏh kơ sô̆ pơ jao găh Tơ gŭm roi tơ ƀôh, chă tơ drong jang ăn druh dăm, bơ ngai jang đơ̆ng nai truh. Anih pơ tho tơ drong jang, chă tơ drong jang dar dĕh đei pơih xă, pơm hơ tŏk tơ drong ‘lơ̆ng, tơ gop ‘lơ̆ng vă pơm hơ tŏk khul jang rơ gei, chă anih iŏk bơ ngai jang. Đơ̆ng 2016-2020, unh hnam tơ nuh jô̆ păh lăp jur 1,43% 1 sơ năm, kơ sô̆ unh hnam tơ nuh bơ ngai kon kông jur 4% 1 sơ năm. Đei hlŏh 6 triu ‘nu bơ nghai klăih đơ̆ng tơ nuh, hlŏh 2 triu ‘nu bơ ngai klăih đơ̆ng vă jê̆ tơ nuh...

Hop akŏm mă 21 kơ Anih vei lăng dôm tơ drong lơ̆m tơ pôl

Mă lei, tơ drong tơ jur tơ nuh hin tam mă kơ jăp, ƀônh kơ tơ nuh hơ lơ̆k dơ̆ng, ưh hơ tŏ băl găh iŏk yoa, tơ drong arih kơ bơ ngai pơ drŏng hăm bơ ngai tơ nuh oei tôch dêh; 1,2 trong jang, tơ drong tơ gŭm tam mă gan đei yoa tơ̆ yăn âu; tơ drong kơ chăng jang tŏk klăih đơ̆ng tơ nuh, tơ iung jơ hngâm pran đơ̆ng unh hnam tơ nuh oei tam mă ‘lơ̆ng; jên tơ mât ăn tơ drong jang tơ jur tơ nuh hin tam mă pơm lăp hăm tơ drong ‘mĕh vă tơ̆ yăn âu.

Tơ̆ hop akŏm, lơ bơ ngai tang măt akhan, hla ar chih tơ roi găh tơ drong jang tơm kơ tĕh đak tơ jur tơ nuh hin păng vei lăng tơ drong arih xa tơ pôl kơ jăp ‘lơ̆ng đơ̆ng 2021-2025 athei chih hơ dăh dơ̆ng dôm tơ drong hơ găt kăl vă chă tơ drong jang xa, tơ jur tơ drong ưh hơ tŏ băl đơ̆ng pơ drŏng hăm tơ nuh tơ̆ dôm tơ ring, atŭm hăm ‘nŏh drơ̆ng nơ̆r tơ mât dơ̆ng tơ drong pơ tho tơ drong jang lơ̆m tơ drong tơ jur tơ nuh hin. Bơ ngai tang măt Nguyễn Văn Sơn, khul Hà Tĩnh akhan, Tơ drong jang tơm kơ tĕh đak tơ jur tơ nuh hin kơ jăp ‘lơ̆ng đơ̆ng 2021-2025 đei ƀơm lơ tơ drong, lơ pang păng kơ jăp ‘lơ̆ng. Mă lei athei tơ rĕk, lơ̆m 3 tơ drong jang tih ‘nŏh tơ jur tơ nuh hin, tơ ring tơ rang ‘nao păng tơ jur tơ nuh hin tơ̆ tơ ring kon kông, groi kông sư đei ƀơm truh tơ̆ băl kơ na ƀônh hơ drom băl:

“Tơ drong jang ‘măng mă âu nhôn akhan Khul kơ dră tĕh đak hlôi đei trong jang sơ đơ̆ng ‘lơ̆ng. ‘Ngoăih kơ tơ jur tơ nuh hin tơ păt, tơ drong tơ gŭm, pơ tho tơ drong jang, chă tơ drong jang hơ dai hăm pơm hơ tŏk kơ plăh drŏ kăn hăm drŏ nglo kŭm đei tơ mât yoa. Mă lei nhôn oei ‘mĕh pơm hơ dăh 3 tơ drong jang ‘nâu, đei lơ tơ drong mă tơ drong jang tơ jur tơ nuh hin jang ưh gơ̆h, tơ tă iŏk jang găh tơ drong pơ jing tơ ring tơ rang ‘nao mă lei kŭm ưh kơ sĭ tơ drong jang găh tơ ring tơ rabng ‘nao mă sư ƀơm truh tơ drong tơ jur tơ nuh hin. Tơ drong tơ plih tơ drong jang ‘nâu ăn tơ drong jang pơ jing tơ ring tơ rang ‘nao kŭm ưh gơ̆h jang kiơ̆ ‘năi. ‘Nŏh jĭ tơ drong mă nhôn akhan athei chih hơ met mă rơ đăh”.

Mĭnh lơ̆m dôm tơ drong oei iŏk đei lơ đon tơ tăm đơ̆ng dôm bơ ngai jang tơ̆ Anih vei lăng dôm tơ drong lơ̆m tơ pôl ‘nŏh jĭ athei pơm hơ dăh tơ drong tơ jur tơ nuh, tơ gŭm ăn bơ ngai tơ nuh, tơ ring tơ nuh hăm tơ drong pơ tho tơ drong jang ưh lăp pơ ‘nhŏ ăn tơ ring tơ nuh đĕch. Ưh kăl tơ lĕch jên man hnam hŏk pơ ‘nhŏ hơ drô̆ ăn bơ ngai tơ nuh đĕch. Tơ drong kăl tơ̆ âu ‘nŏh jĭ trong tơ gŭm hăm bơ ngai tơ nuh thoi yơ.

Pơ ma lơ̆m hop akŏm, Phŏ Kơ dră chĕp kơ̆l Kuô̆k hô̆i Trần Thanh Mẫn tơ chĕng ‘lơ̆ng tơ drong iŏk đei đơ̆ng tơ drong jang tơ jur tơ nuh hin đơ̆ng 2016-2020. Tơ̆ hơ năp drong tam mă lăp, tam mă ‘lơ̆ng đơ̆ng jăl jang adrol ki, Phŏ Kơ dră chĕp kơ̆l Quốc hội Trần Thanh Mẫn athei, tơ drong pơ jing Tơ drong jang pơm tơ jur tơ nuh hin jăl ‘nao athei pơm ‘lơ̆ng hăm trong jang atŏk tơ iung mŭk drăm tơ pôl 10 sơ năm 2021-2030; trong vă jang atŏk tơ iung mŭk drăm tơ pôl 5 sơ năm; trong vă tơ mât jên jang tĕh đak đunh păh lăp păng trong tơ mât jên ăn tơ drong jang tơm kơ tĕh đak pơ jing tơ ring tơ rang ‘nao đơ̆ng 2021-2025:

“Athei tơ lĕch jang hrơ̆ch dôm trong jang tơ jur tơ nuh hin lơ pang; tơ plih ‘nao mă lăp hăm tơ drong jang tơ jur tơ nuh hin kiơ̆ đơ̆ng dôm tơ drong tơ gŭm, tưk tơ iung đon adrin jang tŏk đơ̆ng bơ ngai tơ nuh, tơ ring tơ nuh, mă loi ‘nŏh jĭ tơ ring đei lơ kon pơ lei kon kông; hơ met pơ ‘lơ̆ng tơ drong tơ gŭm tơ jur tơ nuh hin mă lăp hăm trong jang tŏk mŭk drăm, atŭm hăm ‘nŏh tơ mât hăm tơ drong jang tŏk kơ jăp ‘lơ̆ng; bơ ngai tơ nuh đei jang păng xa yoa dôm tơ drong iŏk đei đơ̆ng jang tŏk”

Găh tơ drong tơ gŭm ƀao hiêm tơ pôl, Phŏ Kơ dră chĕp kơ̆l Kuô̆k hô̆i Trần Thanh Mẫn akhan, lơ̆m dôm sơ năm âu ki, tơ drong tơ gŭm Ƀao hiêm tơ pôl đơ̆ng Việt Nam dar dĕh đei hơ met pơ ‘lơ̆ng, vă pơih xă tơ̆ jơ̆p tơ ring, pơ jing tơ drong ‘lơ̆ng ăn rim bơ ngai răt yoa, xa hơ păh, tơ gop vei lăng sơ đơ̆ng tơ drong arih xa tơ pôl, vei lăng ‘lơ̆ng tơ drong đei yoa tôch tơ găl đơ̆ng kon pơ lei. Mă lei, mă tơ pă oei đei ƀôh lơ tơ drong kăl tơ rĕk truh lơ̆m tơ drong atŏk tơ iung bơ ngai athei răt Ƀao hiêm tơ pôl nhen; tơ drong jang kiơ̆ trong tơ gŭm găh Ƀao hiêm tơ pôl; tơ drong vei lăng, iŏk yoa dôm kơ sô̆ jên mong lơ̆m Anih mong jên Ƀao hiêm tơ pôl; tơ drong ưh jăh nôp, hre, kuă nôp păng xa pơ gơ̆m jên Ƀao hiêm tơ pôl, ƀao hiêm hiong tơ drong jang.

Dơ̆ng: Tơ blơ̆