VOV4.Bahnar - ‘Nao âu, Anih chĕp kơ̆l pơ gơ̆r Kuô̆k hô̆i tơ lĕch tơ drong Tơ chơ̆t 268 găh tơ drong asong ăn Khul kơ dră tĕh đak tơ lĕch dôm tơ drong tơ chơ̆t pha ƀiơ̆ hăm dôm tơ drong hơ găt đơ̆ng luơ̆t vă pơm lăp hăm tơ drong jang tang găn jĭ COVID-19. Kiơ̆ kơ ‘nŏh, Khul kơ dră tĕh đak gơ̆h bơ̆ jang 4 tơ drong pha hăm tơ drong hơ găt đơ̆ng luơ̆t oei yoa hrei ‘nâu. ‘Nâu jĭ tơ drong tơ chơ̆t tôch gĭt kăl ƀât mă tơ drong jĭ COVID-19 oei tơ pŏh roi đunh roi hơ mơt, ưh gơ̆h băt hơ drol tơ̆ lơ dêh char, plt găh Pơ băh.

Kiơ̆ kơ ‘nŏh, Anih chĕp kơ̆l pơ gơ̆r Kuô̆k hô̆i drơ̆ng nơ̆r hăm tơ drong tơ chơ̆t đơ̆ng Khul kơ dră tĕh đak vă bơ̆ jang dôm trong jang gĭt kăl tang găn jĭ COVID-19. Mă hơ dăh, Khul kơ dră tĕh đak asong pơ jing anih akŏm, hơ met ăn bơ ngai jĭ COVID-19 atŭm hăm ‘nŏh tơ lĕch hla ar asong bơ̆ jang. Pơ jao ăn Anih tơm vei lăng jang pơ gang gơ̆h tơ lĕch trong pơm hla ar vei lăng kiơ̆ tơ drong tơ chơ̆t pơm hla ar kơ đĕh, ƀônh vă pơm lăp hăm tơ drong jang tang găn jĭ. Khul kơ dră chĕp kơ̆l Jơ nŭm pơ gơ̆r kon pơ lei đei pơ jao tơ chơ̆t dôm tơ drong tơ chơ̆t găh hơ năp jang đơ̆ng Jơ nŭm pơ gơ̆r kon pơ lei păng tơ roi ăn Jơ nm pơ gơ̆r kon pơ lei lơ̆m hop akŏm jê̆ hlŏh. Hăm nơ̆r athei găh tơ drong hơ găt kla jên khăm hơ met jĭ ăn bơ ngai jĭ COVID-19 tơ̆ dôm anih akŏm, hơ met jĭ COVID-19 yoa tĕh đak vei lăng kiơ̆ jên pơ huach tơ̆ yăn âu, Khul kơ dră tĕh đak hơ nơ̆ng pơ tho jang kiơ̆ trong tơ lĕch jên tĕh đak ăn đĭ đăng tơ drong kla jên khăm hơ met jĭ ƀơm truh tơ drong hơ met jĭ COVID-19.

Kơ dră Kuô̆k hô̆i Vương Đình Huệ

Ƀok Đỗ Đức Duy, Khul tang măt Kuô̆k hô̆i dêh char Yên Bái akhan, tơ drong tơ lĕch tơ drong tơ chơ̆t 268 hlôi tơ tơm chih tơ lĕch tôch hơ dăh dôm tơ drong jang đei pơ jao lơ̆m tơ drong tơ chơ̆t đơ̆ng Kuô̆k hô̆i găh tang găn jĭ, hơ nhăk tơ drong tơ chơ̆t mât lơ̆m tơ drong arih xa:

“Tơ drong ‘nâu tơ ƀôh hơ dăh tơ drong vang yak hơ doi đơ̆ng Kuô̆k hô̆i hăm Khul kơ dră tĕh đak kŭm nhen tơ drong hlôh vao păng tơ gŭm băl đơ̆ng Kuô̆k hô̆i hăm Khul kơ dră tĕh đak, hăm kon pơ lei lơ̆m tĕh đak. Nhôn tơ chĕng ‘lơ̆ng tơ drong pơ gơ̆r jang tôch kơ chăng, rơ gei đơ̆ng đơ̆ng Kơ dră Kuô̆k hô̆i păng khul kơ dră chĕp kơ̆l Kuô̆k hô̆, lăp hăm rim tơ drong tơ̆ yăn âu đơ̆ng jĭ Covid-19”.

Jĭ Covid-19 hăm tơ drong tơ pŏh tôch krê hơ mơt, ưh gơ̆h băt hơ drol, hlôi tơ lĕch lơ tơ drong ‘nao vă chă tơ drong jang, vei sơ đơ̆ng tơ drong arih xa tơ pôl. Vă gơ̆h yak hlŏh dôm tơ drong mơ mat tat đơ̆ng jĭ, kăl đei lơ trong jang, tơ drong tơ gŭm tơ tom, trŏ ƀlep mă lei kŭm kăl đei tơ drong adrin, kơ chăng, hơ bĕch hơ bal, đon jang tơ năp đơ̆ng rim anih jang chinh trĭ vă dôm tơ drong tơ gŭm đơ̆ng tĕh đak jăh truh hăm kon pơ lei. Bơ ngai tăh hla păng kon pơ lei lơ̆m tĕh đak lăp đon tơ gŭm, tơ chĕng ‘lơ̆ng Anih chĕp kơ̆l pơ gơ̆r Kuô̆k hô̆i tơ tom drơ̆ng ñr ăn tơ drong tơ chơ̆t 268.

Yă Nguyễn Thị Hoài Linh – bơ ngai tăh hla tơ̆ Hà Nội pơ ma: “Tơ drong ‘nâu ăn ƀôh Kuô̆k hô̆i năng tơ drong arih, jơ hngâm pran kơ kon pơ lei kăl hlŏh, vei lăng ‘lơ̆ng tơ drong arih xa tơ pôl, vei lăng jơ hngâm pran păng tơ drong arih xa kơ kon pơ lei. Nhôn ƀôh sơ đơ̆ng jơ hngâm păng lui kiơ̆ trong jang đơ̆ng Kuô̆k hô̆i păng Khul kơ dră tĕh đak lơ̆m tơ drong chĕp kơ̆l pơ gơ̆r tang găn jĭ Covid-19 hrei ‘nâu”.

Yă Nguyễn Thanh Hải, bơ ngai tang măt Kuô̆k hô̆i dêh char Thái Nguyên

Kiơ̆ ƀok Trịnh Xuân An, Bơ ngai tang măt Kuô̆k hô̆i dêh char Đồng Nai, tơ drong Anih chĕp kơ̆l pơ gơ̆r Kuô̆k hô̆i tơ tom tơ lĕch tơ drong Tơ chơ̆t 268 chih hơ dăh 1,2 tơ drong jang pha hăm tơ drong hơ găt đơ̆ng khôi luơ̆t hrei ‘nâu, tơ tom hơ met pơ ‘lơ̆ng dôm tơ drong tơ hlăk tăk găh luơ̆t vă tơ jră đei yoa ‘lơ̆ng hăm tơ drong jĭ.

“Tang găn jĭ kăl đei dôm tơ drong tơ chơ̆t rơ gei, tơ tom, pran kơ jăp păng tơ ƀôh đei đon tơ năp tơ̆ hơ năp kon pơ lei. ‘Nâu jĭ tơ drong tơ chơ̆t tôch gĭt kăl, tôch lăp jô̆ hloi găh chinh trĭ păng luơ̆t, đei bơ ngai tăh hla păng dôm bơ ngai tang măt Kuô̆k hô̆i tơ chĕng ‘lơ̆ng; tơ ƀôh hơ dăh tơ drong rơ gei, hơ bĕch hơ bal, đon tơ năp, vang yak hơ doi đơ̆ng Kuô̆k hô̆i hăm Khul kơ dră tĕh đak lơ̆m tơ drong jang tang găn jĭ. Tơ drong tơm ‘nŏh ‘nŏh đĭ đăng yoa tơ drong đei yoa kơ kon pơ lei, đĭ đăng yoa tơ drong sơ đơ̆ng păng jang atŏk tơ iung kơ tĕh đak”.

Oei yă Nguyễn Thanh Hải – Bơ ngai tang măt Kuô̆k hô̆i dêh char Thái Nguyên ‘nŏh akhan, tơ drong tơ chơ̆t đơ̆ng Anih chĕp kơ̆l pơ gơ̆r Kuô̆k hô̆i chih hơ dăh Khul kơ dră chĕp kơ̆l Jơ nŭm pơ gơ̆r kon pơ lei đei pơ jao tơ chơ̆t dôm tơ drong găh hơ năp jang đơ̆ng Jơ nŭm pơ gơ̆r kon pơ lei păng tơ roi ăn Jơ nŭm pơ gơ̆r kon pơ lei lơ̆m hop akŏm jê̆ hlŏh pơm ‘lơ̆ng, lăp hăm khei ‘năr đei lơ tơ ring oei athei bơ̆ jang kiơ̆ dôm trong jang tang găn jĭ tôch kơ hret nhen găn ưh ăn ngôi akŏm lơ bơ ngai, bơ̆ jang pơ vang găn lơ̆m tơ pôl.

“Nhôn kŭm vă lăng kiơ̆ tơ drong ‘nŏh vă chih tơ lĕch dôm tơ drong jang mă hơ dăh ăn tơ ring nhôn, vă tơ lĕch đei lơ trong jang rơ hơi ‘lơ̆ng mă lơ̆m dôm tơ drong hơ găt đơ̆ng Luơ̆t nhen Luơ̆t tang găn jĭ hrei ‘nâu tam đei chih hơ dăh găh tơ drong pơ truh tơ mam, pơ gang lơ̆m tơ drong tang găn jĭ thoi yơ, pơm thoi yơ vă tang găn jĭ ‘lơ̆ng ƀiơ̆, đei yoa ƀiơ̆ păng tơ jur tôch ai tơ drong athei pơm lơ hla ar mă lei oei pơm glăi hăm tơ drong hơ găt đơ̆ng luơ̆t”.

Mĭnh lơ̆m dôm tơ drong kăl tơ rĕk ‘nŏh Kuô̆k hô̆i pơ jao trong jang ăn Khul kơ dră tĕh đak, Thủ tướng tĕh đak tơ chơ̆t păng pơ gơ̆r bơ̆ jang kiơ̆ dôm trong jang tam mă đei luơ̆t hơ găt mă ưh ‘nŏh pha hăm tơ drong hơ găt đơ̆ng dôm khôi luơ̆t, tơ drong tơ chơ̆t oei yoa dang ei vă pơm lăp hăm tơ drong ‘mĕh vă tôch gĭt kăl đơ̆ng tơ drong jang tang găn jĭ COVID-19.

Dơ̆ng: Tơ blơ̆