VOV4.Bahnar – Khei năr âu ki,  tơdrong tơlĕch pơm kiơ̆ tơgŭm ăn bơngai kon kông hlôi đei jơnei kăp gĭt. Lơ̆m noh athei jô̆ truh tơdrong hơtŏk tôm tơdrong găh pơtho pơhrăm tơ̆ tơring kon pơlei kon kông păng groi kông. Mă tam đei jơnei tơnăp tơpă mă lei duh axong đei tôm tơdrong kăl găh pơtho păng hŏk pơhrăm.

Hnam trưng phôh thŏng kon kông hŏk oei ăh kơ ‘năr jăl kơđeh Nậm Búng xăh Nậm Búng, apŭng Văn Chấn, dêh char Yên Bái jing hnam trưng ‘nao tơ iung pơjing ăh khei 4/2021. ‘Nâu duh jing anih oei xa păng hŏk pơhrăm kơ kon hơ ioh bơngai kon kông lơ̆m tơring. Hnam trưng ‘nao, kơjăp ‘lơ̆ng, kơƀang tang dŏ hŏk pơhrăm đei răt hơmet ‘nao noh jing tơdrong xô̆ hơ̆k ưh adrô̆ hăm bơngai pơtho păng bơngai hŏk kơ hnam trưng mă noh jing tơdrong xô̆ xôn đơ̆ng đe mĕ ƀă đei kon hơ ioh kiơ̆ hŏk tơ̆ âu. Dang ei đe xư xơđơ̆ng jơhngơ̆m ăn kon hơ ioh năm hŏk kơlih pă đei chiu pŭ tơdrong tơngiĕt găng ăh pơyan puih, tơdrong tô̆ hang ăh pơyan phang nhen tơ̆ hnam trưng xo. Kiơ̆ ƀok thây Nguyễn Văn Du, Phŏ Kơdră hnam trưng noh dang ei hăm kon hơ ioh kon kông erih tăp dăr noh hnam trưng ‘nao âu đei tôm tơdrong kăl erih xa hŏk pơhrăm ăn đe hŏk tro. Mă lei atŭm hăm dôm tơdrong ƀônh hiôk noh adoi oei đei tơdrong tơnap tap hăm bơngai pơtho tơ̆ hnam trưng Nậm Búng âu: “Găh đak xŏ nhă kơ đe mon noh athei gơnơm lơ̆m hnam kon pơlei, săch yăo khoa noh 100% đe mon athei răt mă tơ̆ tơring groi kông noh tơnap tap. Hnam trưng adrô̆ hơlêm đe mĕ ƀă noh akŏm răt 2 môn toán păng tiếng việt, oei săch nai noh hŏk kiơ̆ săch bơngai pơtho kơyuơ ưh kơ kĕ răt. 60% đe mon ưh đei jên vă răt tôm kơloăi săch hŏk pơhrăm”.

Ƀok Nguyễn Văn Tiến, Kơdră tơring Tiên Nguyên, minh tơring groi kông kơ apŭng Quang Bình, dêh char Hà Giang ăn tơbăt: Tơroi vă kơ vei xơđơ̆ng anih oei xa ăn bơngai pơtho păng hŏk tro tơ̆ dôm hnam trưng lơ̆m xăh noh mă tơm duh xơđơ̆ng, mă lei tơpă noh adoi oei kơƀah lơ tơdrong, mă kăl noh lăm hŏk păng hnam hơkŏm joh ayŏ. ‘Meh hơmet duh nhen ming man thêm noh ưh đei jên, jên chă hơvơn lơ̆m kon pơlei adoi tơnap kơlih kon pơlei noh bơngai kon kông ưh kơ đei chă tơgŭm, tơgop. Kơyuơ noh, kăl đei tơdrong vang jang đơ̆ng dôm jăl jang, dôm anih jang vă pơm thoi yơ vei xơđơ̆ng tơdrong tơnăp pơtho păng hŏk pơhrăm tơ̆ tơring groi kông oei lơ tơnap tap: “Lăm hŏk oei kơƀah, lăm hŏk hôp, lăm pơm jang duh ưh kơ măh. Dôm xơnăm adrol ki xăh duh chă hơvơn tơdrong tơgŭm lơ̆m tơpôl, đơ̆ng đe mĕ ƀă, đe kang ƀô̆... mă lei duh adrô̆ pơgia ưh đei kơjăp nhen tơdrong jang đơ̆ng teh đak. Duh athei kơjăp, lăm hŏk noh athei vei xơđơ̆ng kơjăp mă mônh bơih, mă lei vă trŏ ƀlep nhen tơdrong pơkăp noh tam mă ôh, oei kơƀah lơ, athei mơng lăm pơm jang kơ bơngai pơtho, hrăt hrot dêh”.

Ưh kơ măh săch pơhrăm, ưh kơ măh lăm hŏk, dôm lăm jang kơpal noh jing tơdrong mă dôm hnam trưng pơtho tơ̆ tơring ataih yaih, tơring kon pơlei kon kông oei ƀơm tơnap tap. Mă lei hăm tơdrong tơrĕk tơgŭm đơ̆ng Teh đak hăm dôm trong pơkăp jang tơnăp, đei jơnei atŭm hăm tơdrong tơgŭm đơ̆ng jơnŭm jang tơpôl noh pă đei đunh bơih, tơdrong mă âu gô kĕ xek tơlang. Vă pơm thoi yơ đe hŏk tro, đe mĕ ƀă hŏk tro xơđơ̆ng jơhngơ̆m đei minh hnam trưng hŏk pơhrăm ‘lơ̆ng, vei xơđơ̆ng ăn tơdrong jang pơtho pơhrăm kon bơngai mă Đảng păng Teh đak tơrĕk  pơkăl pơm jang.   

                                                                                              Lan chih păng pơre nơ̆r