VOV4.Bahnar – Tơchơ̆t pơyua đơ̆ng Tơdrong tơchơ̆t jang kơ teh đak găh hơtŏk mŭk drăm – tơpôl tơring kon pơlei kon kông păng groi kông đơ̆ng xơnăm  2021-2030 noh kon pơlei tơpă đei yua đơ̆ng Tơdrong jang, atŭm hăm noh chĕp vei mŭk drăm, tơdrong pran kơ tơring; hơtŏk đon bơnôh hơtŏk tơ iung kơ kon pơlei vă tơring kon pơlei kon kông hơtŏk tơ iung pran, kơjăp xơđơ̆ng. Vă kĕ đei jơnei tơchơ̆t âu, tơdrong hơvơn lơ jơhngơ̆m jang, hơvơn axong pơm jang Tơchơ̆t đei Kuôk hô̆i, Jơnŭm pơgơ̆r teh đak tơrĕk kăp gĭt.

          Tơchơ̆t đơ̆ng Kuôk hô̆i pơkăp Tơdrong tơchơ̆t jang kơ teh đak găh hơtŏk mŭk drăm – tơpôl tơring kon pơlei kon kông păng groi kông jăl xơnăm 2021 - 2030 xơkơ̆t hơdăh: hơvơn rim tơdrong axong jang vă hơtŏk mŭk drăm – tơpôl tơring kon pơlei kon kông păng groi kông, lơ̆m noh tơdrong axong jang đơ̆ng teh đak jing xơnong kăp gĭt xơkơ̆t vă hơvơn tơdrong tơgŭm nai. 'Nâu jing minh anih 'nao, kăp gĭt hloh kơlih trong pơkăp jang athei đei jên axong jang xơđơ̆ng. 'Nguaih kơ noh, dôm tơring kon pơlei kon kông păng groi kông adoi jing tơring tơnap tap hloh. Kơyuơ noh, tơdrong tơgŭm jang đơ̆ng Trung ương jing minh tơdrong pơkăp adrol vă đei iŏk jơnei âu.

          Mă lei, lơ̆m khei năr jên axong tơm đơ̆ng teh đak oei ƀơm lơ tơnap tap kơyuơ đơ̆ng pơrang jĭ COVID, kăl hơvơn đei tơdrong vang jang lơ̆m tơpôl vă Tơdrong tơchơ̆t jang kơ teh đak găh hơtŏk mŭk drăm – tơpôl tơring kon pơlei kon kông păng groi kông jăl xơnăm 2021-2030 đei pơm jang tơnăp. Tơ̆ gop akŏm mă mônh Kuôk hô̆i jăl 15 'nao âu, bơngai tang măt Bố Thị Xuân Linh, jang tang măt ăn khul Bình Thuận pơtruh nơ̆r: “Vă vei xơđơ̆ng tơdrong gơh jang hiôk hian kơ tơdrong pơkăp jang, Khul kơpal teh đak athei đei trong jang hơdăh vei xơđơ̆ng jên jang tơtom păng drơ̆ng minh kiơ̆ pơkăp đei lơ anih jang tơgŭm. Lơ̆m noh jên mong kơ teh đak jing kăp gĭt hloh. Hơtŏk pran hơvơn jên jang 'nguaih kơ jên mong. Hơvơn tơdrong vang jang đơ̆ng kon pơlei vă pơm jang pơkep đơ̆ng teh đak noh teh đak păng kon pơlei atŭm vang jang. Atŭm hăm noh, lơ̆m tơdrong pơm kiơ̆ oei athei tơrĕk truh pơtho hơdăh jang atŭm hăm dôm jên jang nai vă pơm kiơ̆ tơchơ̆t kơ teh đak găh hơtŏk mŭk drăm – tơpôl tơring kon pơlei kon kông gơh đei jơnei kơjăp”

          Tơdrong hơvơn jên jang apŭng plenh teh ăn Tơdrong Pơkăp jang kơ teh đak găh hơtŏk mŭk drăm – tơpôl tơring kon pơlei kon kông păng groi kông jăl xơnăm 2021-2030 duh đei tơrĕk kăp gĭt. Anih Mong jên Apŭng plenh teh tơ̆ Việt Nam hlôi tơroi hơdăh găh tơdrong Jơnŭm Thư kĭ Anih mong jên jang hadoi Pơtho Pơhrăm Kơpal teh (GPE) axong ăn Jơnŭm pơgơ̆r Việt Nam jên tơgŭm ưh đei iŏk tơvih 25 trĭu đôlar păng pơjao ăn Anih Mong jên Apŭng plenh teh gô jing Anih jang tơgŭm âu ăn Việt Nam. Anih jang găh bơngai Kon kông chih akŏm pơkăp tơdrong jang hadoi hăm Anih tơm Axong jang, Anih tơm Jên hu vă vang tơgŭm jang ăn Jơnŭm pơgơ̆r teh đak iŏk yua 25 trĭu đôlar ưh đei iŏk tơvih đơ̆ng GPE, vă axong jên tŏk iŏk pơkăl noh 150 trĭu đôlar đơ̆ng Anih Mong jên Apŭng plenh teh axong tơlĕch jang Tơdrong pơkăp hơtŏk mŭk drăm – tơpôl tơring kon pơlei kon kông păng groi kông jăl xơnăm 2021-2030.

          Atŭm hăm noh, Thủ tướng teh đak kĭ pơkăp Tơdrong jang pơdui khei năr pơm jang kiơ̆ Tơchơ̆t kơsô̆ 2214 găh tơdrong kĭ pơkăp Pơm jang "Hơtŏk jang hadoi apŭng plenh teh tơgŭm hơtŏk mŭk drăm – tơpôl tơring kon pơlei kon kông" truh xơnăm 2025,  hăm tơchơ̆t atŭm vă pơtoi hơtŏk hơvơn dôm tơdrong axong jên jang, khoa hŏk kih thuơ̆t, tơdrong hlôh vao đơ̆ng dôm teh đak, dôm anih jang apŭng plenh teh, anih jang, tơ 'ngla bơngai jang tơ̆ teh đak đe, tơgŭm axong jên jang hơtŏk mŭk drăm – tơpôl tơring kon pơlei kon kông păng groi kông. Dôm tơdrong axong jang kơ Tơdrong jang tơguăt hăm Tơdrong Pơkăp jang kơ teh đak hơtŏk mŭk drăm – tơpôl tơring kon pơlei kon kông păng groi kông jăl xơnăm 2021 - 2030.

          Hơdăh, xek tơlang tơdrong ưh kơ măh teh oei, teh choh jang, đak xŏ nhă kơ unh hnam kon pơlei kon kông; hơtŏk choh jang xa, jang găh bri, chĕp vei mŭk drăm, tơdrong pran kơ dôm tơring vă pơm tơlĕch tơmam drăm kiơ̆ pơkăp kơjă kăp. Axong ming man tơdrong pơyua kăl, 'măn ăn tơdrong jang, tơdrong erih lơ̆m tơring kon pơlei kon kông păng dôm tơdrong jang kơ teh đak găh tơdrong jang kon kông; axong hơtŏk pơtho pơhrăm tơring kon pơlei kon kông păng groi kông hơtŏk pơ 'lơ̆ng rơgei bơngai kon kông pơm jang; axong hơlen khoa hŏk păng pơtho găh kŏng ngê̆ kơmăi kơmŏk 'nao lơ̆m tơdrong tơroh jang hadoi kiơ̆ kơjă pơkăp. Vei răk tơƀăk mong kơjă joh ayŏ kăp gĭt 'lơ̆ng rŏ kơ dôm hơdrung bơngai kon kông tơguăt hăm hơtŏk jang tơmang pơhiơ̆; vei lăng jơhngơ̆m jăn kon pơlei, hơtŏk pơ 'lơ̆ng tơdrong pran, hơkâu jăn kon pơlei kon kông; tang găn păng tơjră hiang hiơp hăm đe hơ ioh; pơm jang kiơ̆ pơkăp hơtŏ hơnơ̆ng drŏnglo drăkăn păng xek tơlang dôm tơdrong kăl hăm đe drăkăn păng đe hơ ioh...

          Tơdrong adrin kơ 'nôh truh xơnăm 2025, hơvơn lơ mŭk drăm tơdrong tơgŭm đơ̆ng apŭng plenh teh, mă kăl noh jên tơgŭm ưh đei iŏk tơvih, jên axong tơgŭm hơtŏk pơm jang păng jên tơgŭm nai. Hơvơn axong jang đơ̆ng apŭng plenh teh tơgŭm hơtŏk mŭk drăm – tơpôl tơring kon pơlei kon kông păng groi kông gơnơm đơ̆ng tơdrong đei ƀôh lơ̆m tơdrong erih, mŭk drăm păng tơdrong pran kơ rim tơring, rim hơdrung bơngai, kiơ̆ pơkăp vei răk tơƀăk mong dôm kơjă, um ai joh ayŏ juăt jue kơ dôm hơdrung bơngai, vei lăng xơđơ̆ng cham char. Hơvơn tơgŭm kih thuơ̆t đơ̆ng dôm anih jang, tơ 'ngla bơngai jang apŭng plenh teh tơgŭm hơtŏk rơgei ăn bơngai kon kông tơ̆ tơring groi kông păng groi kông; bơngai jang pơm jang găh tơdrong jang kon kông lơ̆m dôm jăl đơ̆ng trung ương truh tơ̆ tơring.

Lan chih păng pơre nơ̆r