Kiơ̆ roi tơbăt tơ̆ hop akŏm, Dak Lak păng Bình Định hlôi đei dôm tơdrong jang hơdai hơtŏk tơiung tơmang lăng đơ̆ng sơnăm 2016 ‘moi kiơ̆ tơdrong jang kĭ pơkăp pơjing trong jang hơdai hơtŏk tơiung tơmang lăng 4 dêh char Bình Định – Phú Yên – Gia Lai – Dak Lak. Truh sơnăm 2022, trong jang hơdai âu đei tơmơ̆t dơ̆ng 2 dêh char Quảng Ngãi păng Kon Tum, pơjing trong jang hơdai hơtŏk tơiung tơmang lăng 6 dêh char Tŏk bŏk - Tây Nguyên hăm hơnăn Tây Nguyên bri kông hơdai hăm đak dơsĭ. Tơ̆ hop a kŏm, kơdră chĕp kơ̆l anih jang tơmang lăng 2 dêh char hlôi roi tơƀôh găh dôm tơmam tơmang lăng, tơdrong jang kăl, lêh joh ayŏ tơplŏng kơ dâu păng tơmang lăng lơ̆m sơnăm ‘nâu đơ̆ng 2 tơring.

Dôm bơngai tang măt kŭm pơma dơnuh găh dôm trong jang hơtŏk loi dơ̆ng jang hơdai hơtŏk tơiung  tour hơdai, mă loi ‘noh jĭ lơ̆m pơyan pơdơh hŏk sơnăm 2023;hơtŏk loi dơ̆ng tơ roi tơƀăt, sơng đei tơmoi tơmang lăng truh tơ̆ Bình Định păng hơlơ̆k dơ̆ng. Bơngai tang măt anih mơdro sa 2 dêh char kŭm tơ păt pơma dơnuh, tơroi dôm tơdrong mơmat tat, tơ hlăk tơ hlĭn kăl kơ hơmet pơ ‘lơ̆ng kŭm nhen tơlĕch dôm trong jang vă hơtŏk loi dơ̆ng, pơtrŭt tơmang lăng.