Câu lạc bộ jŏh ayŏ kơ dŏ xoang hơdrĕch bơngai Tày, Nùng, Mường xăh Ea Kao đei 52 ‘nu bơngai ‘nŏh jĭ đe mih ma duch nă bơngai Tày, Nùng, Mường hưch ‘mêm tơdrong jŏh ayŏ kơ dŏ xoang đe sư vang akŏm. Đơ̆ng rŏng kơ đei tơdrong tơchơ̆t pơjing, bơngai jang lơ̆m câu lạc bộ đei pơtho tơƀôh găh tơdrong hơri then, reh đơn tính kơ bơngai Tày, Nùng; tôn 1,2 ƀai chĭng kơ bơngai Mường.

Đơ̆ng rŏng 2 giĕng, dôm bơngai kiơ̆ hŏk hlôi tôn gơ̆h 3 ƀai chĭng Mường păng reh 3 ƀai đơn tính, hơri then. Pha hăm dôm câu lạc bộ đei pơjing adrol kơ ‘noh, ‘nâu jĭ câu lạc bộ mă blŭng đei tơdrong jang hơdoi đơ̆ng lơ hơdrĕch hơdrung, hăm tơdrong tơm ‘nŏh vang tơgop chĕp vei păng atŏk tơiung dôm kơjă kăp gĭt đơ̆ng jŏh ayŏ kơ dŏ xoang so sơ̆; pơjing anih ngôi pơchơt ăn dôm hơdrĕch hơdrung, hơtŏk jơhngâm đon tơguăt băl.