Kiơ̆ Anih vei lăng jŏh ayŏ kơ dŏ xoang, Tơplŏng kơdâu păng chă tơmang lăng dêh char Lâm Đồng, lơ̆m 4 năr pơdơ̆h (30/4 – 3/5), lơ̆m dêh char sơng đei dang 620.000 ‘nu tơmoi, tŏk 21% pơting hăm khei âu sơnăm 2025; lơ̆m noh tơmoi đơ̆ng teh đak đe dang 21.000 ‘nu. Akŏm đĭ đăng jên đei iŏk yoa dang 1.420 ti.

Tơmoi tŏk lơ đơ̆ng blŭng năr pơdơ̆h lêh hloi, lơ tơring, anih chă tơmang lăng păng anih tep pơdơ̆h đei bơngai ngăl. Kơsô̆ anih tep pơdơ̆h đei bơngai oei đơ̆ng 70 – 80%, hơdrô̆ hnam hotel đơ̆ng 3 – 5 sơnglŏng đei 85 – 96%, đei năr rim lăm đei bơngai tep pơdơ̆h ngăl. Dôm tơring, anih chă tơmang lăng kơchăng hơtŏk tơdrong pơvih, tơlĕch lơ tơmam; vei lăng ‘lơ̆ng tơdrong sơđơ̆ng, cham char, pơklĕm hơdăh kơjă tơmam, vei lăng sơđơ̆ng kơjă pơvih. Kiơ̆ đơ̆ng noh, hơnơ̆ng tơƀôh tơdrong ‘lơ̆ng hơiă mưh chă tơmang lăng tơ̆ Lâm Đồng, hue lăng truh trong jang tŏk pran kơjăp păng hơtŏk ‘lơ̆ng tơdrong pơvih pơvăn.

Kiơ̆ kơ Anih vei lăng găh Joh ayŏ, Tơplŏng kơdâu păng Chă tơmang lăng dêh char Đắk Lắk, lơ̆m 4 năr pơdơh lêh 30/4 – 1/5, iŏk yua đơ̆ng chă tơmang lăng kơ dêh char đei 347 ti hlak jên, tŏk vă jê̆ 19% pơting hăm sơnăm 2025. Iŏk yua âu truh đơ̆ng tơdrong tơlĕch jang đei yua dôm tơdrong jang pơtrŭt, tơklep hăm tơdrong jang joh ayŏ - chă tơmang lăng ‘lơ̆ng hơiă. Ƀôh hơdăh đei dôm tơdrong jang nhen hao khinh khí cầu jum dăr kơthôt Nghinh Phong, phường Tuy Hoà, dăh mă lăng joh ayŏ Êđê, kơdŏ soang kră sơ̆, tôn chĭng chêng, sa tơmam sa joăt joe păng tơƀôh pơm kăt, pai, sa ka ngừ đak dơsĭ... tơgop pơm tơdrong hơiă ăn hơnih truh Đắk Lắk.