Tơdrong jang đei jên jang dang 500 ti, lơ̆m noh jăl mă mônh hlôi tơlĕch dang 200 ti hlak jên, pơm hơmet anih jang tơ̆ 2,9 ha. Dôm anih đei pơm hơmet ‘nŏh, anih tep pơdơ̆h bungalow tơter dơnâu, anih pơdơ̆h ngôi tơ̆ bri, anih lăng ngôi dơnâu đak, kŭm hăm tơdrong pơvih pơvăn, tơmam xa păng check-in. Tơring chă tơmang lăng đei tơlĕch trong jang tŏk jing anih pơdơ̆h ngôi ‘lơ̆ng rŏ, đei hơdrô̆ pha kơ dôm tơring nai, anih tơmoi gơ̆h mât lăng tơ̆ bri brăh, hơmet pơ ‘lơ̆ng jơhngâm đon.

Kiơ̆ Anih vei lăng kon pơlei xăh Măng Đen, rim tơdrong jang mưh đei tơmât yoa gô tơgop chă tơdrong jang, pơm hơtŏk iŏk yoa ăn kon pơlei, atŭm hăm ‘nŏh tưk tơiung tơdrong jang mŭk drăm, tơpôl kiơ̆ trong kơjăp ‘lơ̆ng. Tơdrong tơmât yoa dôm anih âu ưh lăp tơgop hơmet pơ ‘lơ̆ng anih chă tơmang lăng đĕch mă oei pơih đei anih pơdơ̆h ngôi, chă hơlen năng tơ̆ yăn âu ăn tơmoi mưh truh tơ̆ Măng Đen, mă loi lơ̆m dôm năr lêh, têt.