Tơdrong mă ou tơƀôh hơdăh Tơdrong pơgơ̆r ‘lơ̆ng hơ iă kơ dêh char lơ̆m Sơnăm Tơmang pơhiơ̆ teh đak. Kiơ̆ đơ̆ng Hơnih vei lăng Joh ayŏ kơdŏ soag, Đă ƀŏng lŏng tơplong kơdou păng Tơmang pơhiơ̆ dêh char Gia Lai, lơ̆m dêh char sơng hơvơn đei dang 625.000 ‘nu tơmoi, tŏk 57% pơtêng hăm khei năr ou sơnăm hơdrol. Tơdrong hơvơn đei lơ tơmoi tơmang pơhiơ̆ kơ dêh char Gia Lai lơ̆m jơ ‘năr ou ‘noh gơnơm đơ̆ng tơdrong pơgơ̆r joh ayŏ kơdŏ soang, pơm lêh gĭt kăl đei pơgơ̆r ‘lơ̆ng hơ iă, tih să. Mă kăl ‘noh Năr Joh ayŏ kơdŏ soang rim hơdrung dêh char Gia Lai ‘măng mă I hăm tơdrong pơgơ̆r tôn chĭng chêng, joh hơsoang. Đơ̆ng noh, dêh char tơƀôh tơbăt tơdrong oei sa joh ayŏ, por ‘nhot, tơmam drăm sa păng tơdrong jang joăt joe sơ̆ ki. Hăm trong tŏk hơ iă ou, hơnih tơmang pơhiơ̆ Gia lai hlôi sơkơt hơdăh tơdrong hơvơn ‘lơ̆ng hơ iă hloh păng pơjing đei hơyak pran kơjăp ăn rim tơdrong pơgơ̆r đơ̆ng rŏng kơ Sơnăm Tơmang pơhiơ̆ teh đak 2026.