Unh hnam yă Liêng Hót Ka Hiên (bơngai K’Ho Cil) tơ̆ thôn Srê Đăng, xah Tân Hội, dêh char Lâm Đồng juăt pơm ƀanh kră sơ̆, lơ̆m noh ƀanh hơƀo hlôi jing “hơnăn” mă đe ư ang lơ̆m tơring. Ah yă Liêng Hót Ka Hiên 'lŏ sơnăm, yă pơtho trong pơm ƀanh hơƀo ăn đe pơmai oh, kon sou lơ̆m unh hnam, noh đe oei krao  “ƀanh hơƀo juăt jue”.

Pơmai Liêng Hót Zi Jăk krao yă Liêng Hót K’Hiên 'noh yăng. Đơ̆ng rŏng hŏk đang trung kâ̆p Dược, pơmai akŏm đei tơdrong hlôi hŏk vă pơm “ƀanh hơƀo juăt jue” kơ unh hnam gơh 'lơ̆ng hloh. Pơmai Liêng Hót Zi Jăk ăn tơbăt: “Ƀanh hơƀo 'lơ̆ng, nham noh gơnơm lơ̆m hơdrĕch hơƀo. Mă ƀanh 'lơ̆ng noh đei pơm đơ̆ng hơdrĕch hơƀo tơyông kon kông bơ̆n kơdih pơtăm. Păng hơƀo mă đe pơm ƀanh noh nĕ kơ kră dêh hang dah mă nĕ kơ pơda jat. Hơƀo tơl kră noh ƀanh ưh đei hrăng dah mă ƀanh ưh đei rơmuơn”.

Bơngai K’Ho hrei ou hơnơ̆ng yua hơdrĕch hơƀo tơyông kok vă pơm ƀanh. Hơdrĕch hơƀo ou 'lơ̆ng rơmuơn, plei đei lơ găr hơpôm hloh păng gơ̆ yua hrôih hloh. Kiơ̆ khôi juăt kơ kon pơlei, plei hơƀo tôm năr noh tơgenh dah gơ̆ ah pơgê hrôih vă gơh 'lơ̆ng hloh. Plei hơƀo đơ̆ng rŏng kơ gơ̆ 'nhăk brŏk đe pơm hloi vă kơ ƀanh gơh ƀou phu 'lơ̆ng. Kơđoh hơƀo đe 'măn 'nŭng ƀanh. Pơmai Liêng Hót Zi Jăk tơroi dơ̆ng:  “Đơ̆ng rŏng kơ gơ̆ hơƀo, đe 'lek kơđoh, đơ̆ng rŏng kơ noh đe chet iĕ păng tah lơ̆m kơmăi ot tah sĭk păng đak toh. Mưh tah lơ sĭk păng đak toh noh ƀanh hơƀo ưh đei ƀou phu đơ̆ng hơƀo. Đơ̆ng rŏng kơ noh iŏk kơđoh hơƀo vă 'nŭng ƀanh păng 'nhăk pai uh lơ̆m 2 jơ noh ƀanh hơƀo sĭn 'lơ̆ng”.

Ƀanh hơƀo ƀônh pơm, nhen lĕ tơ̆ rim pơlei pơla, đe drăkăn K’Ho adoi gơh pơm ƀanh hơƀo pai uh. Kơlih ưh kơ rơvơn hăm tơdrong jang, păng ưh đei 'meh xa lơ ƀanh hơƀo rim năr noh lơ bơngai đe ưh đei pơm kơdih mă chă răt đĕch. Đơ̆ng noh, ƀanh hơƀo pai uh jing tơmam drăm, tơmam xa ưh hơdrô̆ 'măn tĕch ăn kon pơlei tơ̆ tơring mă oei đei tơbang tĕch lơ̆m mạng tơpôl hloi. Pơmai Liêng Hót Rebeca 'noh kon drăkăn hơmol kơ yă Liêng Hót K’Hiên, 'nguaih kơ pơtho tơ̆ hnam trưng, pơmai oei pơtoi pơm “ƀanh hơƀo juăt jue” kơ unh hnam: “Kơdih inh noh bơngai pơtho tơ̆ trưng, ưh đei lơ jơ rơvơn, mă lei inh tơgenh jơ năr vă pơm ƀanh. Hơdrol hloh noh vă hơtŏk tơdrong sŏng xa ăn unh hnam, đang kơ noh 'măn tĕch ăn kon pơlei lơ̆m tơring chă jên ăn unh hnam. Păng tơdrong kăp gĭt hloh noh nhôn jing kon sou athei vei răk păng pơtoi tơdrong jang juăt jue kơ unh hnam kon kông nhôn”. 

Pơmai Lơ Mu Liviơ jĭ bơngai juăt răt ƀanh hơƀo kơ unh hnam yă Liêng Hót K’Hiên tơroi: “Ƀanh hơƀo jĭ tơmam xa kăp gĭt kon kông nhôn, rim bơngai adoi băt truh. Mă lei pơm đei ƀanh hơƀo pai uh păng gơh tĕch noh tơ̆ pơlei ou hơdrô̆ unh hnam pơmai Rebeca đĕch pơm. Unh hnam sư pơm ƀanh 'lơ̆ng, rơgoh, inh sô̆ lơ̆m đon kơlih lơ̆m pơlei oei đei unh hnam vei răk tơdrong pơm ƀanh juăt jue ou kơ kon kông po vă tơdrong jang ou ưh đei hiơt hiong mă oei pơyua ăn unh hnam dơ̆ng. Inh klưh yom kơ đe drăkăn K’Ho hơbĕch hơbal păng gơh hơgei adoi nhen băt vei răk tơƀăk mong tơdrong jang juăt jue kon kông po, lơ̆m noh đei tơdrong pơm ƀanh hơƀo”.  

Ƀanh hơƀo kơ unh hnam yă Liêng Hót K’Hiên pơm đei tĕch ăn bơngai răt tơ̆ jơ̆p tơring kơ dêh char Lâm Đồng. 'Nguaih kơ 'noh, ƀanh hơƀo oei đei tĕch ăn bơngai răt tơ̆ 'nguaih dêh char. Rim 'măng unh hnam pơm đei hloh 200 'nŭng ƀanh, rim 'nŭng tĕch đei 20 rơbou hlj... 'Nou jĭ tơdrong pơyua ưh đei lơ mă lei adoi tơgŭm ăn unh hnam chă đei kon jên. Mă kăl noh yă ƀôh chơt hơ-iă kơlih hlôi băt vei răk tơƀăk mong păng hơtŏk tơdrong pơm ƀanh juăt jue jing “tơdrong jang juăt jue” kơ unh hnam.