Tŏk bŏk tô 8, phường Ayun Pa, hơnih pơgar iĕ kơ ‘nhŏng Kpă Sa tŏk bŏk jing hơnih năm truh mă kon pơlei chă tơroi băl mưh rim ‘măng ‘meh tơchă 1 hơnih ngôi hơđơ̆ng kiơ̆ tơdrong hơrih sa kơ bơngai Jarai. Đơ̆ng sơnăm 2018, Sa pơtơm pơm hơmet ming hơnih teh mă hlôi lê̆ pơtăm ‘nhot, rong kon tơrong, tơplih rim hơnih cham, rim tơm ‘long jing klĕp ‘lơ̆ng. Ưh khan lăp dơ̆ng tơ̆ tơdrong pơm ‘lơ̆ng hơnih pơgar 200m², Sa oei tơroi, tơƀôh dôm tơmam sa joăt joe nhen hla ƀlang pro har, ƀoh hơmrĕ hmôch trit, dôm tơmam yua kơ bơngai Jarai… lơ̆m mang tơpôl. Dôm video, rup hmă ‘noh hlôi ƀơm truh jơhngơ̆m tơpôl, ƀlă đơ̆ng noh lơ bơngai tơchă truh năm tơmang lăng nhen truh 1 hơnih iĕ kơ joh ayŏ kon kông.

“Ƀơ̆t blŭng ĭnh kŭm bơngơ̆t, yua kơ pơgar ĭnh tam mă đei ‘lơ̆ng, kơna hlôi hơmet ming pơtăm dơ̆ng ‘nhot pơm hơ met ming pơgar vă kơ hơnih lơ̆m pơgar lăng lăp ‘lơ̆ng păng ‘yâu, rơgoh hloh. Ĭnh jang pơgar âu đơ̆ng 2018, truh dang ei. Rim năr ĭnh pơm hơmet ngăl, jang pơgar tơchĕng hơnih ‘nâu jang thoi yơ, hơnih to pơm thoi yơ vă lăng ‘lơ̆ng hloh, ‘noh hoach lơ jơ năr ăn pơgar vei rong kon tơrong păng choh pơtăm, đơ̆ng pơgê truh kơsơ̆ ƀơ̆t lăp kŭm ưh kơ đĭ tơdrong, năr hơyơ kŭm athei jang vă ăn pơgar lăng hơiă hloh, ‘lơ̆ng hloh, vă kơ rim bơngai hơiă hloh.”

Lĕch đơ̆ng Ayun Pa, vih tơ̆ xăh Ia Ly, tơdrong jang “Plei joh ayŏ tơmang lăng Jarai” kơ mŏ H’Uyên Niê tŏk bŏk tơgŭm tơiung ming dôm tơdrong jang joăt joe ngêh kơ hiơt hiong bơih. Đei ƀôh đơ̆ng bơngơ̆t ƀơ̆t ƀôh tanh brai, tanh hơkăt dăh mă peh ƀa pă gan đei ƀôh lơ̆m tơdrong hơrih sa rim năr, mŏ kŭm hăm 1 grŭp drŏ kăn lơ̆m pơlei pơgơ̆r dôm tơdrong jang chă lăng vă kơbăt ăn tơmoi. Đĭ đăng đei roi tơƀôh đei iŏk yua gơnang đơ̆ng fanpage kơ pơlei. Gơnang đơ̆ng noh, drŏ kăn lơ̆m pơlei đei dơ̆ng iŏk yua hai, chĕp vei đei tơdrong jang joăt joe hăm tơdrong jang rim năr đơ̆ng kơdih hai. Mŏ H’ Uyên Niê tơroi. 

“Đe gơh băt, ƀôh đơ̆ng trang mạng păng trang fanpage kơ pơlei. Pơlei đei mĭnh trang fanpage ‘noh jĭ pơlei tơmang lăng tơpôl, ƀơ̆t mă tơmoi pơma dơnuh đơ̆ng noh dăh mă kŭm kiơ̆ đơ̆ng tơdrong tơroi đơ̆ng bôl buăl. Dôm tơdrong jang tơm kơ pơlei oei jing tanh brai, tanh reo, hơkăt, peh ƀa, tơdrong jang pai sa tơmam sa nhen tong phe, koh pơ o, ‘lao vă tơmoi kơtă tăh phe lơ̆m đing pơ o, prung pơlăh vă sŏng sa pơyan hơ yơ ‘noh ăn tơmoi pơm, sa pơyan ‘noh. Pơtih gia nhen khei ‘năr kăl kơ hơtuch sơnăm ‘noh jĭ phĕ cheh phe đum ‘noh tơmoi gơh phĕ păng phĭn rup”.

Tơdăh Kpă Sa păng H’Uyên Niê păr ang tơdrong ‘lơ̆ng hơiă kiơ̆ lơ̆m mạng păng tơmam joăt joe, ‘noh Rcom Bus – tơdăm Jarai 23 sơnăm tơ̆ Pleiku ‘noh rơih tơ dra hơri hơsoang păng um rup vă tơroi tơdrong tơroi Tây Nguyên ƀĕnh tơdrong hơiă mơlôh. Fanpage “Tarzan Tây Nguyên” kơ sư đei hloh 160.000 ‘nu bơngai pơih lăng. Dôm clip hlôm hơke kơpô păng tơ̆ chơ kơi đak kơtăh dăh mă tŏk hao kông tăh kơpen joăt joe ‘lơ̆ng hơiă kơ bri kông. Bus tơroi, đơ̆ng 1 ‘nu hơioh ưh kơ pơ̆n kiơ, ưh kơ pơ̆n chĕp điên thoăi tơ̆ hơnih đei lơ bơngai, sư ƀrư̆ ƀrư̆ joăt hăm tơdrong kuay phim păng lui ngeh hloh kiơ̆ rim video. Ưh kơ hŏk tôn reh hơđăl, Bus oei pơm đei tơdrong hơiă hơdrô̆. Hơkâu pran jăng, sŏk kơjung, hơkar jơmăng đơ̆ng tŏ sa păng jơhngơ̆m hiôk rơhâu pơm ăn kơ sư đei krao ‘noh “Tarzan Tây Nguyên”. Dôm phim kuay tŏk tơ̆ kông, teh tŏng tơley, tôn reh bơ̆n tĭng nĭng, chĭng klơk đơ̆ng Bus đa iŏk đei kơhrĕng ‘măng đe pơih lăng; phim mă blŭng iŏk đei hloh 200.000 ‘nu bơngai ‘meh vă. Đơ̆ng noh, Bus jing 1 ‘nu bơngai tang măt ăn tơmang lăng tôch kơ hơiă.

“ Ĭnh roi tơƀôh joh ayŏ păng tơdrong joăt oei sa tơ̆ lơ̆m mang tơpôl vă kơ rim bơngai băt truh tơdrong joh ayŏ Tây Nguyên đei dôm tơdrong hơiă, tơdrong ‘lơ̆ng tôch kơ lơ. Tây Nguyên jĭ 1 tơdrong kiơ ‘noh tôch kơ gĭt kăl, plĕnh teh mơ̆t hơdai hiôk, hơiă dêh văi. Kơdih kâu ĭnh ‘noh bơngai kon kơ Tây Nguyên ĭnh ƀôh kŭm tam mă kĕ chă băt đĭ tơring teh  Tây Nguyên âu, dôm jơva chĭng chêng, tơdrong ‘lơ̆ng hơiă joh ayŏ kơ bơngai kon kông ĭnh ƀôh tôch kơ hơiă păng chhôk ‘nă ƀơ̆t hơtŏk tơiung đei tơdrong joh ayŏ ‘lơ̆ng hơiă kơ hơdrĕch nhôn, ĭnh roi tơƀôh ăn kơ đĭ đăng rim bơngai băt truh lơ hloh”.

‘Nhŏng Đỗ Đức Thanh, Phŏ Bí thư Đoàn dêh char, Kơdră Khŭl vei lăng hơdruh tơdăm dêh char Gia Lai akhan, ‘nâu jĭ tơbăt hơdăh ăn hơnăp jang đơ̆ng tơplih kơsô̆ hăm hơdruh tơdăm. Tơdrong pơcheh hơgei đơ̆ng rim bơngai ưh khan lăp tơgŭm kơdih đe sư hơtŏk tơiung mă oei păr ang um rup Gia Lai - 1 tơring teh ƀĕnh tơdrong hơiă, rơhâu, ƀĕnh tơmam ‘lơ̆ng tơmang lăng.

“Gơh pơma hơdăh kơmăy kơmŏk kơsô̆ păng mang tơpôl ‘noh jĭ 1 lơ̆m dôm tơmam tôch kơ đei yua pơm tơdrong hiôk vă kơ đe buăl đoàn viên gơh băt tơ jê̆ hloh hăm joh ayŏ kơ hơdrĕch kon kông, kŭm nhen tơdrong tơiung pơjing tơdrong jang sa, chă pơm kơdih dôm video clip, um rup vă roi tơƀôh kơdih kâu oei jang kiơ vă pơjing tơdrong jang sa. Đe buăl gơh tơroi ăn kơ rim bơngai băt tơdrong chhôk ‘nă kŭm nhen tơdrong jang kơdih tŏk bŏk jang vă ‘meh vă hơtŏk tơiung kơdih kâu. Kiơ̆ đơ̆ng noh đe buăl kŭm roi tơƀôh um rup kơ pơlei pơla, tơring hăm dôm tơdrong ‘lơ̆ng hơiă hơdrô̆ joăt joe vă um rup kơ pơlei pơla truh hăm tơpôl, sơng đei lơ hloh dơ̆ng tơmoi truh hăm tơring.”

Đơ̆ng hơnih pơgar iĕ tơ̆ Ayun Pa, truh dôm không tanh brai tơ̆ Ia Ly dăh mă re jơva đơ̆ng hlôm hơke kơpô tŏk bŏk bri kông Pleiku… Dôm bơngai mơlôh kon kông kơ Gia Lai tŏk bŏk tơroi tơdrong joh ayŏ kơ pơlei pơla kơdih kiơ̆ trong ‘nao: pơcheh, kiơ̆ chăl hle păng chhôk ‘nă. Đe sư jing dôm bơngai tang măt ăn joh ayŏ Tây Nguyên, tơgop gĭt kăl hơnhăk um rup Gia Lai truh jê̆ hloh hăm tơmoi lơ̆m păng ‘ngoăih teh đak.