Lơ̆m dôm năr ou, tơ̆ Hnam oei akŏm Sắc tộc Têrêsa tơ̆ phương Tân Lợi (Đăk Lăk), tơdrong pơhrăm joh hơri đei ƀôh rơ-ông rơ-ang. Lơ̆m lăm oei re nơ̆r pơ̆t pơng, chĭng klơk hrou atŭm hăm pơyan puih mak tŏk bŏk truh. Đe buăl sơnăm mơlôh bơngai Xơ Đăng hăt hot hơmet dôm tơdrong joh hơri vă pơdah ăn kon pơlei păng tơmoi truh lăng ah blŭng sơnăm 'nao.  

Đak pơ-uh hram hơ-iuch ao, A Bảo, 23 sơnăm, truh đơ̆ng pơlei Đăk Rơ Wa, phương Kon Tum, dêh char Quảng Ngãi – dang ei oei pơm jang tơ̆ Hnam oei akŏm Sắc tộc Têrêsa tơroi: “Tơmam tôn reh kon kông ưh gơh kơƀah lơ̆m tơdrong hơrih rim năr, hăp nhen lĕ tơmam xa pơ-'lơ̆ng ăn đon bơnôh. Lơ̆m tơdrong hơrih athei đei tơdra hơri 'noh sô̆ hơ-iă hloh. Nhen chăl yă ƀok hơdrol ki atŭm tơ-oei ah tơnuh unh khơ̆ng vă chă mơ̆ng tơdra pơ̆t pơng, chĭng klơk, chă tôn reh ăn dih băl mơ̆ng; mĕ ƀă tap pơ̆t pơng, tôn chĭng klơk vă lung kon tep pơm ăn tơdrong hơrih roi sô̆ chơt hloh. Mă hăt noh lơ̆m tơdrong akŏm et xa ah khei puih mak, lêh têt, tơdra pơ̆t pơng, chĭng klơk re ang hơvơn lơ bơngai truh lăng mơ̆ng, sô̆ chơt dêh”

Oei Karôly, 29 sơnăm, tơ̆ pơlei H’Ring, xah Cư M’gar (Đăk Lăk) tơroi, tơdra hơri jĭ djoi tơlei tơguăt kon pơlei pơla, jĭ pơhngol kơ pơlei pơla lơ̆m rim 'măng akŏm ah khei puih mak. Kơyuơ noh mă đe buăl sơnăm mơlôh tơ̆ hnam oei akŏm hơnơ̆ng pơhrăm vei răk joh ayŏ kon kông po, ưh hơdrô̆ jĭ tơdrong lăp, mă oei vih truh pơlei pơla akŏm pơdah ăn kon pơlei păng tơmoi lăng: “Inh lăp kơdêh gah tơmam reh tôn kon kông po. Lơ̆m khei puih mak, năr lêh têt, nhôn hơnơ̆ng tap pơ̆t pơng, tôn chĭng klơk atŭm hăm tôn chĭng chêng, atŭm băl hơri hơsuang pơsô̆ hăm kon pơlei păng tơmoi truh hơpong ngôi. 'Nou adoi jĭ 'măng vă tơguăt đon 'mêm kơ-eng, tơguăt tơguăl hloh dơ̆ng lơ̆m pơlei pơla. Ah mă tơmam reh tôn re ang, lơ̆m đon bơnôh inh mơn sô̆ hơ-iă, mă hăt noh lơ̆m khei puih mak, khei têt, đei tơƀơ̆p yă ƀok, mĕ ƀă, 'nhŏng pơmai oh; inh tap pơ̆t pơng vă rim bơngai atŭm chă hơsuang, ƀơ̆t doh tơdrong sô̆ đei hơtŏk hloh dơ̆ng”

Hăm A Tùng, 29 sơnăm, adoi oei tơ̆ pơlei H’Ring, tơdrong pĭn kơ-'mĭn, tơgĭt hăm tơdrong hơri kon kông, oei jing sơnong vei răk tơƀăk mong joh ayŏ mă yă ƀok pơsư̆ ăn: “Pơ̆t pơng, chĭng klơk noh kăp gĭt hloh lơ̆m tơdrong hơrih kon pơlei Xơ Đăng păng minh ƀar hơdrung kon kông nai. Dôm tơmam reh tôn ou adoi kăp gĭt nhen chĭng chêng lơ̆m tơdrong vei răk tơƀăk mong joh ayŏ kon pơlei kon kông. Ah chăl yă ƀok hơdrol sơ̆, lơ̆m dôm năr blŭng puih mak, tơdrong et xa ƀa 'nao, năr têt, ưh gơh kơƀah tơdra pơ̆t pơng, tơdra chĭng chêng hrou atŭm hăm tơdrong hơri brông, pơm ăn năr puih mak, năr akŏm et xa, năr lêh têt sô̆ hơ-iă hloh, rơ-ông rơ-ang păng tơgop vei răk tơƀăk mong joh ayŏ juăt jue kơ bơngai Xơ Đăng.”

Tơdrong dăp đon dăp bơnôh đơ̆ng đe sơnăm mơlôh nhen A Bảo, Karôly dah mă A Tùng ưh hơdrô̆ pơjing đei dôm tơdrong pơdah 'lơ̆ng trŏ hăm um ai joh ayŏ kon kông, mă oei pơlan să tơdrong pơ-ư pơ-ang lơ̆m tơpôl. Ƀok Pê Đoan, oei tơ̆ pơlei H’Ring, lơ 'măng đang măt ƀôh đe oh vih pơdah tơ̆ pơlei lơ̆m dôm tơdrong akŏm lêh ƀrơ̆k jơhngơ̆m tơroi:  “Đe oh tôch hơgei, băt pơdreh dôm tơmam reh tôn kon kông, băt vei răk um ai joh ayŏ juăt jue. Đe oh nhan lăp noh pơhrăm tenh dêh, oei năm pơdah tơ̆ lơ tơring, kon pơlei bu bu kŭm sô̆ hơ-iă”

Ưh hơdrô̆ akŏm lơ̆m tơdrong hơrih rim năr, lơ̆m dôm tơdrong akŏm kăp gĭt nhen Et xa ƀa 'nao, tơdra chĭng kram kơyuơ đe buăl mơlôh tơ̆ Hnam oei akŏm Sắc tộc Têrêsa pơdah hlôi jing tơdrong pơ-'lơ̆ng đon bơnôh tơgop chơt hơ-iă păng tơguăt kơjăp ăn pơlei pơla. Ƀok A Vi Voan, kơdră thôn pơlei Kon H’Ring, xah Cư M’gar (Đăk Lăk) ăn tơbăt: “Đe oh oei mơlôh mă lei băt tơgĭt, vei răk joh ayŏ kon kông po, băt yua dôm tơmam reh tôn nhen chĭng chêng, chĭng klơk, pơ̆t pơng, tĭng nĭng... pơlei pơla nhôn pơ-ư pơ-ang păng sô̆ hơ-iă kơlih đei đe sơnăm mơlôh băt vei răk tơƀăk mong joh ayŏ juăt jue yă ƀok pơsư̆ ăn”

Đơ̆ng năr akŏm pơhrăm dăp đon dăp bơnôh tơ̆ Hnam oei akŏm Sắc tộc Têrêsa truh dôm tơdrong năm pơdah ah lêh akŏm tơ̆ dôm pơlei pơla, đe buăl sơnăm mơlôh Xơ Đăng tŏk bŏk oei pơdjoi tơdrong lăp hăm joh ayŏ kon kông ăn đe sơnăm mơlôh. Noh jing đon băt, sơnong tơnăp, jĭ tơdrong hơpơi 'meh vă tơdra pơ̆t pơng, chĭng klơk, tĭng nĭng, chĭng chêng... păr ang ling lang, vă um ai joh ayŏ Xơ Đăng pơtoi oei ling lang kiơ̆ kơ sơnăm yăm kơ khei.