Đơ̆ng rŏng 3 năr pơgơ̆r tôch hơiă, tơdrong thi sơng đei hlŏh 800 ‘nu ngê̆ nhơ̆n, bơngai tôn chĭng, hơxoang truh đơ̆ng 26 xăh, phường lơ̆m dêh char Đắk Lắk, dơ̆ng tang ăn 9 hơdrĕch kon kông đei: Rađe, M’nông, Jarai, Bahnar, Xê Đăng, Bru Vân Kiều, Mường, Tày, Nùng.

Dôm khul vang thi găh 5 tơdrong: Tôn chĭng, tơmam tôn reh kơ hơdrech kon kông, hơri brông, hơxoang păng pơgơ̆r dơ̆ng dôm tơdrong et soi so, hăm hlŏh 100 ƀai tôn, hơri hơxoang tôch hơiă. Lơ tơdrong et soi đơ̆ng sơ̆ kơ dôm hơdrĕch kon kông đei tơƀôh dơ̆ng nhen: et tŏk hnam, soi chă hơnăn, hơiă kơ bơngai ‘lŏ, soi tơjur gơ̆ng, soi kơ pơlei,…kŭm hăm dôm jĭt ƀai tôn chĭng, tơmam tôn reh kơ bơngai kon kông, hơri hơxoang đei dôm khul pơgơ̆r tôch hơiă.

Pơtôch tơdrong thi, Anih pơgơ̆r hơpăh 8 yaih ăn dôm khul vang thi iŏk đei jơnei ‘lơ̆ng, pôk pơ ư 37 ƀai tôn chĭng, hơri, hơxoang hơiă hlŏh. Khul ngê̆ nhơ̆n xăh Liên Sơn Lắk iŏk đei yaih như̆k lơ̆m ‘măng thi âu.