Ƀlep ƀơ̆t blŭng sơnăm ‘nao, hơmet ăn sơng Têt joăt joe kơ hơdrech hơdrŭng, tơ̆ tơring Tây Nguyên pơgơ̆r lơ lêh joh ayŏ ‘lơ̆ng hơiă. ‘Nâu jĭ ‘măng vă hơbăn ao tanh kơ dôm hơdrĕch kon kông đei hrŭk tơƀôh hơdai hăm boa chĭng, tơdra hơsoang. Mŏ H’Blim oei tơ̆ plei Ja Rah, xăh Nâm Nung, dêh char Lâm Đồng kŭm hăm klo păng đe kon sư tă kơ hrŭk hơbăn ao tanh M’Nông vang truh năr lêh “Tăm Blang m’prang bon” tơroi:

“Bơngai M’nông đei hơbăn ao hrŭk tôch kơ ‘lơ̆ng păng dôm ƀai chĭng, tơdra hơsoang tôch kơ hơiă păng hơbăn ao hrŭk chă tanh kơdih, ƀai chĭng ‘meh ƀai kiơ ‘noh pơhrăm tôn ƀai ‘nei, đei năr kiơ ‘noh tôn, hơsoang hơvơn kon pơlei lăng, năm lăng oei rơih iŏk ƀai chĭng kiơ vă lăp hăm tơdra hơsoang, tơdrong ‘lơ̆ng hơiă joh ayŏ joăt joe âu tôch kơ chơt, ĭnh kŭm pơtho akhan kơ kon klo ĭnh vang akŏm hơdai ĭnh tôch kơ hơiă”.  

Ƀrông ƀrang hơbăn ao tanh ưh khan lăp jing hơbăn ao hrŭk lơ̆m năr lêh, mă hlôi jing tơdrong ‘lơ̆ng hơiă joh ayŏ lơ̆m tơpôl dôm hơdrĕch kon kông Tây Nguyên. Yă Ka Thu oei tơ̆ xăh Hòa Ninh, dêh char Lâm Đồng tơroi, hơbăn ao tanh tơklep hăm bơngai K’Ho iŏk đơ̆ng ‘nao rơneh klĕp truh vih hăm ƀok yă:

“Ĭnh tơtă kơ kon ĭnh, mă đơ̆ng hrei ‘nâu đei tôm tĕch che tơ̆ kơchơ, mă lei hăm hơdrĕch bơ̆n ‘noh hơbăn ao tanh athei chĕp vei, ưh kơ gơh lê̆ hiong sư, yua kơ truh năr tuch luch, tơdăh măh pă đei ‘nhŏ kơ mĭnh blăh hơbăn ao tanh ‘noh mơlâu dêh hăm mih ma duch nă lơ̆m pơlei, hăm ƀok yă bơ̆n. Athei đei hiă mĭnh blăh khăn hơbăn ao vă vih hăm ƀok yă, kơna athei kăl mă đei”.

Đei ƀôh đơ̆ng ‘meh vă tơdrong hơrih sa, hrei ‘nâu lơ̆m rim mạng tơpôl, đơ̆ng dôm trang kơdih truh rim anih pơm tơlĕch, hơp tak xăh… kŭm ƀrông ƀrang hơbăn ao tanh dôm hơdrĕch kon kông Tây Nguyên. ‘Nao âu, tơ̆ Hơp tak xăh tanh brai vai khăn Tơng Bông, Anih vei lăng kon pơlei phường Ea Kao, dêh char Đắk Lắk kŭm pơgơ̆r tơdrong jang livestream hăm hơnăn “Buôn Tơng Jŭ – Ea Kao apĭnh kơkuh”, pơih tơpăt lơ̆m dôm mạng tơpôl nhen Facebook, Zalo OA, TikTok.

Tơdrong jang vă roi tơƀôh khăn, hơbă ao tanh joăt joe păng roi tơƀôh tơdrong jang tơmang lăng tơpôl plei Tơng Jŭ, hăm dôm tơmam ‘lơ̆ng nhen hơbăn ao tanh joăt joe kơ drŏ nglo, drŏ kăn, hơƀăn ao hơioh, ao tai, hơbăn tanh ngă et sa, cà vạt, khăn lơ̆l kơƀang păng dôm hơbăn ao chơ choh kiơ̆ chăl hle. ‘Moi kiơ̆ trong livestream, tơring hlôi roi tơƀôh hơnih cham char bri brăh, hơnih hŏk hôp tơpôl kơ phường Ea Kao tơklep hăm tơdrong hơrih sa bơ̆jang, jang sa kơ kon pơlei, mă loi ‘noh kon pơlei kon kông.

Tơ̆ Gia Lai đei lơ hơnih tơmang lăng tơpôl hơiă nhen Plei Ốp (phường Pleiku), Plei tơmang lăng Tơpôl Ia Mơ Nông, xăh Ya Ly, nhen homestay Đinh A Ngưi tơ̆ xăh Tơ Tung… bơngai Jrai păng Bahnar tă kơ pơgơ̆r chă lăng vă kơ băt tơdrong joh ayŏ kon kông, tanh brai, lăng tôn chĭng chêng, sa tơmam sa păng tơdrong hơrih sa bri brăh, pơm tơdrong jang sa kơjăp hơdai hăm chĕp vei tơdrong joăt so ‘lơ̆ng hơiă.