Lơ̆m tơdra tơnơ̆m kơ jơva chĭng chêng, đe hơdruh Êđê khial khial yak jơ̆ng tăp dăr ge tơdrô, hăm tơdra hơsuang hơvơn et tơdrô juăt jue. Rim tơdra jơ̆ng, ti rơmuơn nhen nơ̆r pơtruh kăp gĭt hăm yang hơpang păng tơmoi gĭt. Tơdra hơsuang hơvơn et tơdrô ang bang lơ̆m et soi jur xa ƀa ‘nao, et ming đak, et soi jơhngơ̆m jăn, et pơkong păng dôm khôi juăt nai kơ pơlei pơla. Tơdrong hơsuang lơ̆m hnam kơjung tơnŏ, cham akŏm rơ-ông rơ-ang dah mă tăp dăr tơdrô ge, hơnih tơroh kon bơngai hăm tơm a la chă joh ayŏ Êđê.

Kră pơlei Y Kŭt Niê (Aê Nang), tơ̆ pơlei Prao, xah Mdrak, dêh char Đăk Lăk ăn tơbăt: “Kiơ̆ khôi kră sơ̆ kơ bơngai Êđê, hơsuang hơvơn et tơdrô jĭ tơdrong hơsuang lơ̆m pơlei đei tơdrong sô̆, ah đei tơdrô ge, ưh gơh hơsuang mă unh hnam đei tơdrong ưh ‘lơ̆ng hơkou. Kră sơ̆ akhan jĭ hơnih akŏm đe hơdruh tơdăm atŭm akŏm, jơ̆p pơlei pơla vih akŏm et xa sô̆”

Tơdrong hơsuang hơvơn et tơdrô kơ bơngai Êđê đei tơƀôh hăm dôm tơdra hơsuang hơdu, hăm yak jơ̆ng văr tăp dăr tơm tơdrô ge. Tơpang ti rơmuơn lơ̆m rim tơdra hơsuang sơng drơ̆ng kăp gĭt. Mă ưh đei pơm pha kơ đe, tơdra hơsuang akŏm ƀenh khôi juăt păng tơdrong pơtih, tơƀôh tơdrong kŭp yom hăm yang hơpang păng đe tơmoi gĭt. Hrou atŭm hăm tơdra hơsuang noh jơva chĭng chêng Êđê, hăm tơdra hơdu, pơjing đei cham char grasia akŏm ƀenh kơ tơdrong joh ayŏ kon pơlei pơla.

Ngê̆ nhơ̆n Y Klôt Buôn Yă (Aê Thảo), oei tơ̆ pơlei Hra Ea Ning, xah Dray Bhăng, dêh char Đăk Lăk ăn tơbăt, hơsuang hơvơn et tơdrô kơ bơngai Êđê jĭ um pơtih kăp gĭt kơ tơdrong ‘mêm kơ tơmoi, jing djoi tơlei chô̆ pơtoi rim bơngai lơ̆m pơlei pơla, atŭm hăm noh tơroi gah tơdrong hơrih đon lui kăp gĭt kơ kon pơlei pơla. Kiơ̆ đơ̆ng tơdra hơsuang, bơngai Êđê tơƀôh đon lui, tơdrong pôk bơnê păng tơdrong hơpơi đei gah tơdrong hơrih sơđơ̆ng sơnêp sơnoi, phĭ tơtŏ dơnŏ ‘lơ̆ng: “Đơ̆ng rŏng keh đang dôm khôi et soi nhen et ming đak, et soi jơhngơ̆m jăn gô đei tơdrong hơsuang hơvơn et tơdrô hăm tơdrong ‘meh vă kon pơlei pơla akŏm lơ tơdrong lui păng phĭ tơtŏ. ‘Noh jing nơ̆r hơvơn yang kông, yang đak, yă ƀok dơnơm kơtơ̆ng nơ̆r chêng, ƀôh tơdra hơsuang gô vih atŭm et xa hăm kon pơlei pơla po”

Ngê̆ nhơ̆n Y Klôt Buôn Yă ăn tơbăt dơ̆ng, bơngai hơsuang hơnơ̆ng hrŭk hơbăn ao tanh juăt jue kơ bơngai Êđê. Kiơ̆ khôi juăt so, hơdrol kơ et tơdrô ge, đak tuh lơ̆m ge athei sŏ đơ̆ng hơdrơ̆m đak kơ pơlei hăm get, ưh đei sŏ đak đơ̆ng hơnih nai, kơlih noh jing đak yang: “Mưh soi hăm 3 tơm tơdrô noh đei 3 ‘nu hơsuang, 7 tơm tơdrô noh đei 7 ‘nu hơsuang. Hơnơ̆ng noh kơsô̆ bơngai hơsuang đơ̆ng 5 ‘nu tŏk tơ̆ kơpal păng hơnơ̆ng kiơ̆ kơsô̆ le, ưh đei hơsuang kiơ̆ kơsô̆ đôi. Sơ̆ ki, hơdrol kơ et tơdrô, đak tuh lơ̆m ge athei sŏ đơ̆ng đak hơdrơ̆m hăm get, ưh gơh sŏ đak đơ̆ng hơnih nai ôh”

Hơsuang hơvơn et tơdrô ưh hơdrô̆ jĭ khôi soi tơbeh, mă oei jing minh tơdrong joh ayŏ kăp gĭt, hơnih mă tơdra hơri, tơdrong hơsuang păng đon lui akŏm jing minh. Rim yak jơ̆ng, rim tơdra ti adoi đei pơm hăm tơdrong kŭp yom, tơƀôh tơdrong tơguăt đơ̆ng kon bơngai hăm cham char, yang hơpang păng kon pơlei pơla. Hăm tơdra chĭng chêng ang bang păng nơ̆r hiĕk sô̆ hơ-iă kơ pơlei pơla, tơmoi gô băt hơdah đei tơdrong tơnŏ, dơnưp păng grasia lơ̆m rim tơdrong joh ayŏ kơ tơring Tây Nguyên.