Lơ̆m yuh 'năr tơngiĕt, tơring đei hơ-'nguă gom găn groi kông hơla tŏ iơ-iă, jơva chĭng chêng re ang đơ̆ng Hơnih pơdah pơdei Hồ Gia Trang Lâm Hà, Lâm Đồng. Tăp dăr jơmŭl unh khơ̆ng, đe drăkăn K’Ho hrŭk hơbăn ao tanh đei lơ đak kơ-ang, hơsuang rah vei rah ăn tơdra chĭng chêng. Jơva chĭng chêng re nhen lĕ krao tơƀlŏk kơ yă ƀok dơnơm sơ̆. Tơmoi Phạm Thị Vân lŭ lăp: lăng khul chĭng chêng drăkăn tôn, tơdrong 'lơ̆ng niang niat mă akŏm đei tơdrong pran jăng: "Khul chêng drăkăn noh tôn khial khial pơm ăn jơva chĭng chêng jing rơmuơn hloh, atŭm hăm tơdra hơsuang 'lơ̆ng gô pơm ăn ƀai chêng jing kăp gĭt phara hloh kơ khul chĭng chêng drŏnglo; trŏ hăm joh ayŏ kiơ̆ gah mĕ juăt jue kơ bơngai K’Ho”.

Tôn pơdah hơnơ̆ng tơ̆ hơnih tơmang pơhiơ̆ tơ̆ Lâm Hà noh Khul chĭng chêng drăkăn Bồ Liêng. Khul đei hloh 20 'nu, lơ̆m noh 6 'nu drăkăn ngê̆ nhơ̆n kơtă tôn chĭng chêng, oei dôm to noh hơsuang hơdoi. Rim tơdra kơ rim bơngai – đơ̆ng tơdra hơtŭn jơ̆ng, hơsuang păng hơneng ti, tap ti tơ̆ chêng – adoi tơbang hơdah tơdrong 'lơ̆ng. Ưh hơdrô̆ 'lơ̆ng gah um ai, đe sư oei 'lơ̆ng kơlih tơdra kăp gĭt vang vơch dơ̆ng. Drăkăn ngê̆ nhơ̆n K’Phèn, akŏm lơ̆m khul chĭng chêng drăkăn Bồ Liêng, tơ̆ xah Đinh Văn Lâm Hà, dêh char Lâm Đồng tơroi: “Inh lăp kơ chĭng chêng kon kông po kơdih, ou jĭ joh ayŏ juăt jue mă yă ƀok răk ăn. Đơ̆ng lăp noh hăp hram lơ̆m sĕch pham layơ ưh kơ băt. Truh dang ei kơdih inh rơbot lơ tơdra ƀai chêng kơ bơngai K’Ho inh”.

Lơ̆m khul chĭng chêng Bồ Liêng, drăkăn ngê̆ nhơ̆n K’Phôn oei jing bơngai kloh klĕch gah tơdrong hơri brông K’Ho đei ƀơ̆r hơri hiôk hloh. Yă chơt hơ-iă tơroi: "Truh pơdah dah mă chă pơlong tơ̆ yơ noh khul chĭng chêng drăkăn nhôn đei iŏk lơ nơ̆r hmach bơnê đơ̆ng bơngai mơ̆ng lăng. Kơlih đe pơmai oh pơdah tôn chĭng chêng kloh klĕch bơih, tơdra noh hrou 'lơ̆ng, rơbot lơ ƀai chêng, atŭm hăm hơbăn ao tanh guăng 'lơ̆ng, pơm ăn bơngai mơ̆ng lăng ƀôh hơdah tơdrong iơm dim kơ bơngai drăkăn. Khei năr truh, nhôn pơtho ăn đe mon drăkăn, hơdrol hloh noh lơ̆m kơtum kơtŏng gô đei minh kon sou pơtoi pơhrăm tôn chĭng chêng. Kơdih inh gô kơtă pơtho ăn kon sou, hơpơi 'meh joh ayŏ juăt jue mă yă ƀok răk ăn oei đei răk vei ling lang”.

Kră pơlei, ngê̆ nhơ̆n ưu tŭ K’Bes – bơngai akŏm pơjing khul chĭng chêng drăkăn Bồ Liêng đơ̆ng 15 sơnăm hơdrol ki, dang ei adoi oei hơlen tơnăp tơdrong akŏm kơ khul. Lơ̆m lơ sơnăm pơtho ăn hloh 200 'nu tôn chĭng chêng, ƀok lăp kơ đon hloh hăm đe mon drăkăn kiơ̆ pơhrăm tôn chĭng chêng: "Dang ei, inh pơtoi oei pơtho tôn chĭng chêng ăn lơ kôn mon kon sou. Sơnăm sơ̆ inh pơtho ăn đe hơ-ioh hŏk lăm 5, lăm 6, đơ̆ng rŏng kơ noh đe tơdăm đơ̆ng 30 truh 40 sơnăm. Mưh chă pơtêng hăm jơhnơr sơnăm bơngai pơhrăm tôn chĭng chêng đơ̆ng đe hơ-ioh, truh đe tơdăm, noh khul drăkăn pơhrăm tenh vao hloh, tenh rơbot dôm ƀai chêng pơtêng hăm khul nai. Lăm pơhrăm chĭng chêng drăkăn lăp pơhrăm tôn chĭng chêng, inh tam mă năm truh tơ̆ lăm noh đe kôn mon truh tơ̆ lăm hơdrol bơih, trŏ jơ, pơ-'nam pơhrăm noh inh sô̆ hơ-iă dêh. Lơ năr inh pơtho 'nguaih kơ jơ pơkăp tơ̆ lăm, vă kon sou băt lơ ƀai chêng hloh, tơgăl kơ pôk bơnê"

Khei năr ou ki, Khul chĭng chêng drăkăn Bồ Liêng hlôi vang akŏm pơdah lơ̆m tơdrong akŏm juăt jue, lơ̆m khei năr lêh têt, năr akŏm kăp gĭt kơ kon pơlei Việt Nam. Đe sư adoi đei dôm hơnih jang tơmang pơhiơ̆ tơ̆ tơring “chih măt” năm akŏm tơdrong jang tơmang pơhiơ̆ pơlei pơla. Mă tơ̆ chơnang pơdah ayơ, lơ̆m tơring ayơ, đe sư adoi oei tơbang hơdah đon bơnôh kŭp yom kơ chĭng chêng – um pơtih grasia ăn tơdrong hơrih joh ayŏ kơ bơngai K’Ho. Tơdrong niang niat kơ khul chĭng chêng drăkăn Bồ Liêng ah joh đak krong Đạ Đờng hlôi tơgop pơm hơtŏk tơdrong jang tơmang pơhiơ̆ Lâm Đồng. Ƀok Nguyễn Văn Thạnh – Phŏ Kơdră Hơnih Asong jang Hơkŏp xah Đinh Văn Lâm Hà, dêh char  Lâm Đồng ăn tơbăt: "Tơring hlôi pơgơ̆r đei dôm tua tơmang pơhiơ̆ joh ayŏ, tơmoi truh tơmang lăng gah joh ayŏ chĭng chêng lŭ lăp. 'Nou adoi jĭ minh trong jang vă tơring tơbang joh ayŏ chĭng chêng truh hăm tơmoi. Kiơ̆ đơ̆ng noh, pơjing tơdrong jang xa, đe ngê̆ nhơ̆n đei jên atăm vă hơtŏk jơhngơ̆m tơguăt hăm tơdrong vei răk joh ayŏ juăt jue".

Khul chĭng chêng drăkăn Bồ Liêng ưh hơdrô̆ pơm hơtŏk tơdrong 'lơ̆ng kơ chĭng chêng kon kông K’Ho, mă tŏk bŏk oei tơgop vei răk tơƀăk mong joh ayŏ juăt jue, pơjing đei tơdrong tơm ăn hơtŏk mŭk drăm, tơpôl gơh kơjăp sơđơ̆ng tơ̆ tơring kon kông Lâm Hà, Lâm Đồng.