Đơ̆ng 6 jơ gơmăng, mưh kơphô̆ ƀrach hơdăh ŭnh hơyuh, Kơphô̆ gơmăng Kơchơ Nhỏ hlôi iơ iơ̆r iơ iăr. Hloh 60 ki-ốt chă pơdă tĕch mơdro rim tơmam drăm ‘nhĕm ‘nhot, tơmam drăm kăl kơ tơring păng tơmam pôk ăn dih băl. Jơ ‘năr tơmang pơhiơ̆ Puih mak, răt yoa blŭng sơnăm mơsuơ̆t mơsoăt ưh khan lăp hơnhăk đei tơdrong chơt hơ iă ‘nă hal mă oei tơgop lơ̆m pơtrŭt kơtang tơdrong jang tĕch mơdro, tơmang pơhiơ̆ tơ̆ gơmăng lơ̆m tơring. Oh Lê Trúc Thảo Nguyên, chơt hơ iă tơbăt:“Ĭnh rơih năm tơ̆ kơphô̆ gơmăng Kơchơ Nhỏ kơ yuơ tơ̆ ou jơnŭm kơchơ mă blŭng đei pơjing tơ̆ phương Pleiku, cham char tơ̆ ou tôch kơsă, tôch hơ iă, rim rĕng tĕch tơmam drăm jei tôch hơ iă đei lơ tơmam drăm ‘lơ̆ng liĕm păng ‘nhĕm ‘nhot sa ‘lơ̆ng”.

Ưh khan lăp hơdrô̆ rim boăl mơlôh, lơ ŭnh hnam jei rơih năm tơ̆ ou lơ̆m jơ ‘năr blŭng Puih mak. Mŏ Võ Thị Thu Diễm, oei lơ̆m phương Diên Hồng tơbăt:“Ba năm tơ̆ kơphô̆ gơmăng Kơchơ Nhỏ ‘noh tơ̆ ou jĭ tôch chơt hơ iă, kơdrơ̆m bơngai. ‘Nhĕm ‘nhot lơ kơ loăi, trŏ lăp hăm đe hơ ioh păng ŭnh hnam năm tơmang lăng. Kơphô̆ gơmăng chă pơrŏ tôch kơ ‘lơ̆ng”.

‘Nao đei tơmơ̆t pơgơ̆r mă lei Kơphô̆ gơmăng Kơchơ Nhỏ hlôi tĕnh koăng jing hơnih kăl atŏk tơ iung mŭk drăm gơmăng kơ tơring. Mă kăl lơ̆m dôm năr blŭng puih mak ‘nao, tơmoi năm tôch kơ lơ tơgŭm ăn tơdrong chă tĕch răt jĭ iơ iơ̆r iơ iăr, hơnhăk ba hloi tơdrong hơmŏ kơ mĭnh sơnăm jang sa pŭn ai.

Tơ̆ mĭnh hơdrơ̆r tơmam ‘nhĕm ‘nhot joăt joe sơ̆ ki, mŏ Ksor H’Khal pơvih pơvăn dôm ‘nhĕm ‘nhot kon pơlei Jrai, nhen pơlăh prung, iĕr pham, ‘nhĕm nhŭng phang, ‘nhĕm rơmo phang, hla ƀlang pai hăm pro har, kơtonh tăng kôl. Mŏ chơt hơ iă tơroi:“Hăm tơmoi lơ lơ lou ba chơt hơ iă dêh kơ yuơ đei tơmoi băt truh ‘nhĕm ‘nhot joăt joe kơ pơlei pơla Gia lai adoi nhen rim ‘nhĕm ‘nhot bơngai Jrai. Nhôn tôch hưch hanh hơmanh bơnê kơ yuơ dêh char pơjing rơvơn tơƀôh tơbăt dôm tơmam drăm kăl kơ pơlei pơla bơ̆n, ning nai kai ning mônh kơnh kon pơlei băt truh lơ hloh dơ̆ng”.

 Kơhô̆ gơmăng Kơchơ Nhỏ đei pơjing tơjê̆ đak glung Hội Phú, mĭnh hơnih ‘lơ̆ng liĕm lơ̆m hơnih kơdrơ̆m Pleiku, adoi nhen pơlei pơla đunh đai tai sơnăm, tơklep kơjăp hăm gru kơnăl chăl sơnăm hơdrol kơ teh đak rơngei hiôk hian. Ƀok Đặng Toàn Thắng, Kơdră chĕp pơgơ̆r Hơnih vei lăng kon pơlei Phương Pleiku tơbăt:“Pơgơ̆r Kơphô̆ yak jơ̆ng tơ̆ gơmăng vă atŏk tơ iung mŭk drăm tơmang pơhiơ̆ kiơ̆ rim trong tơlĕch ăn đơ̆ng Tơdrong tơchơ̆t Hop akŏm tih Đang ƀô̆ dêh char Gia Lai păng Tơdrong tơchơ̆t Hop akom tih Đang ƀô̆ phương Pleiku. Đơ̆ng noh pơjing đei cham char, hơnih truh vă tơmoi lơ̆m teh đak păng dêh char Gia Lai đei hơnih chă tơmang lăng tơ̆ gơmăng hăm phương Pleiku pơma hơdrô̆ păng lơ̆m pơlei tơm so Pleiku pơma atŭm”.

Kơphô̆ gơmăng Kơchơ Nhỏ lơ bơngai năm tơ̆ ou truh tŏk bŏk măng. ‘Nou ưh khan hơnih chă răt yoa, pơchơt pơhiơ̆, mă oei jing tơgoăt dih băl kon pơlei pơla, tơƀôh tơbăt tơdrong oei sa joăt joe kơ tơring păng pơtrŭt tŏk kơtang mŭk drăm tơmang pơhiơ̆ kơphô̆ groi kông Pleiku. Lơ̆m jơ ‘năr Puih mak groi kông, tơdrong hơrih sa ‘nao tŏk bŏk rơ ông rơ ang, pơkă ăn mĭnh sơnăm đei lơ tơdrong tơplih ‘nao.