Ngê̆ nhơ̆n Y Kŭt Niê pơtơm tơguăt hăm tơdrong hơri brông hăm tơmam tôn reh juăt jue đơ̆ng lăp 18 sơnăm. Ƀok tơroi: Sơ̆ ki ưh đei hla bar chih răk dah mă lăm hŏk nhen dang ei, inh kơdih kiơ̆ rok đe kră pơlei, ngê̆ nhơ̆n ‘lŏ sơnăm, mơ̆ng đe sư chă hơri, tôn chĭng chêng đang kơ noh hŏk ƀoi: “Inh băt chă hơri brông păng reh tôn tơmam tôn reh kon kông đơ̆ng 18 sơnăm. Hơdrol kơ noh, inh hơnơ̆ng mơ̆ng đe ngê̆ nhơ̆n yuk hơdrol năm pơdah đang kơ noh hŏk ƀoi. Dar deh, inh akŏm đei tơdrong hlôh vao păng pơtơm pơtho ăn kon sou lơ̆m pơlei. Sơnăm 2007, inh pơtho ăn đe oh tơ̆ Hnam trưng Teh đak rong ‘me. Đơ̆ng rŏng 3 khei pơhrăm, đe mon hlôi gơh tôn chĭng chêng. Đơ̆ng rŏng kơ noh, inh pơtoi vang akŏm lơ̆m Khul joh ayŏ kơdŏ suang kră sơ̆ tơ̆ Đồng Mô, Sơn Tây, Hà Nội păng tơguăt hăm khul truh sơnăm 2019.”

Kiơ̆ khei năr, dôm tơdra hơri brông Êđê, tơdra chĭng chêng păng tơdra brông brŏng kơ đĭng năm hlôi jing tơdrong ưh gơh kơƀah lơ̆m tơdrong hơrih kơ ƀok Y Kŭt Niê. Ưh hơdrô̆ pơdah kloh klĕch, ƀok oei kơdih chă pơm tơmam tôn reh kon kông. Tơdrong kăp gĭt hloh noh ngê̆ nhơ̆n Y Kŭt Niê ưh đei vei kơjă kăp gĭt noh ăn kơdih po. Hăm ƀok, tơdrong pơtho pơdjoi ăn đe sơnăm mơlôh jing sơnong jang kơ bơngai yuk hơlou: “Vă pơm đei minh pôm đĭng năm, noh đĭ pơhlom tong hơnê̆ khei. Mưh ưh rơvơn lơ tơdrong jang nai noh phơ phŏ hiong truh 1 khei pơtơm keh đang. Kiơ̆ kơ inh, dôm bơngai yuk hơlou athei đei sơnong pơtho ăn kôn mon kon sou, vă um ai joh ayŏ kăp gĭt kơ hơdrung hơdrĕch ưh đei hiơt hiong. Oei đe sơnăm mơlôh noh athei kơchăng chă trong hŏk hơlen, akŏm hăm dôm bơngai ‘lŏ sơnăm vă chă hŏk pơhrăm păng băt hơdah hloh”

Ngê̆ nhơ̆n Y Kŭt Niê hơnơ̆ng đei kon pơlei lui yom kơlih tơdrong yuk hơlou păng jang tơnăp. Ƀok hơnơ̆ng vei kơjăp păng pơlan să tơdrong joh ayŏ juăt jue, đơ̆ng tơdrong chă pơm, hlôm đĭng năm, tôn chĭng chêng truh vang akŏm lơ̆m dôm tơdrong jang atŭm kơ pơlei pơla, pơtho ăn đe sơnăm mơlôh lơ̆m tơring. ‘Nhŏng Y Tía Niê, oei tơ̆ pơlei Ea Mlay, xah Mdrak, dêh char Đăk Lăk jĭ minh bơngai vang akŏm lơ̆m khul chĭng chêng đei ngê̆ nhơ̆n Y Kŭt Niê pơtho pơhrăm tơroi: “Ngê̆ nhơ̆n Y Kŭt Niê jĭ bơngai tơnăp yuk hơlou lơ̆m pơlei. Lơ̆m kơplah khôi juăt, tơdrong joh ayŏ kon kông tŏk bŏk oei ƀơm hiơt hiong, ƀok hơnơ̆ng oei pơtoi vei răk păng pơlan să, đơ̆ng tơdrong hlôm đĭng năm, tôn chĭng chêng truh vang akŏm dôm tơdrong joh ayŏ kơ pơlei pơla. Mă kăl, ƀok dăp đon dăp bơnôh pơtho ăn kơ đe sơnăm mơlôh, hơpơi ‘meh đe oh hlôh vao, lăp păng pơdjoi joh ayŏ kơ hơdrung hơdrĕch po”.

Hăm tơdrong tơnăp, dăp đon dăp bơnôh păng đon lăp hăm joh ayŏ kon kông, ngê̆ nhơ̆n hlôi păng tŏk bŏk tơgop kăp gĭt ăn tơdrong jang vei răk tơƀăk mong dôm kơjă joh ayŏ juăt jue kơ bơngai Êđê. Dôm tơdrong jang ou ưh hơdrô̆ vei răk tơdra chĭng chêng, nơ̆r hơri brông ‘năr ou, mă oei pơdjoi gah um ai joh ayŏ ăn kôn mon kon sou.