Đơ̆ng hrôih, kơdrơ̆m kon pơlei hlôi akŏm năm tơ̆ cham Hnam hop akŏm pơlei bon Jarah, tơring Nâm Nung, dêh char Lâm Đồng vă vang pơgơ̆r Kơ̆m kang kơnang giĕng Tăm Blang Mprang bon. Lơ̆m jơ ‘năr chơt hơ iă ‘nă hal kơ jơva chĭng chêng, hrŭk hơbĕn ‘nao ao ‘lơ̆ng, kon pơlei chơt hơ iă ‘nă hal chă hơsoang kiơ̆ ƀai tôn chĭng “Sơng tơmoi”. Mĭnh ‘nu bơngai tơdăm M’Nông tơroi:“Ĭnh Y Bằng, năr ou ĭnh vang yak hơdoi hăm khul ƀon Jarah pơgơ̆r kơ̆m kang kơnang giĕng “Tăm blang mprang ƀon” tơ̆ ƀon Jarah vă hơvơh hơvơi hơvơi hơpơi đei ‘mi rŏ tŏ hơlăng, vă kon pơlei pran jăng grăng akou păng vă kon pơlei hơrih sa hiôk hian păng hơvơh hơvơi hơpơi ăn jang sa iŏk iŏk yoa kơjăp vă kon pơlei chơt hơ iă ‘nă hal, kon pơlei tơ̆ ou ling lang vei răk tơƀăk mong tơdrong oei sa joăt joe sơ̆ ki đơ̆ng jơhnơr ou truh jơhnơr đơ̆ng rŏng, dôm tơdrong oei sa joăt joe ‘lơ̆ng rŏ ou ưh kơ gơh hŭt ôh”.

Kơtă tơ̆ hơnăp hnam hop akŏm pơlei ƀon Jarah ‘noh đei pơjing gơ̆ng ga joăt joe kơ bơngai M’nông chă pơrŏ tôch kơ hơlen. Tơ̆ ou dôm tơman drăm vă soi tơbeh ăn kơ yang hlôi hơmet ăn tôm. Tơmam soi tơbeh ‘noh đei 3 ge tơdrô, mĭnh tŏ kơl nhŭng, ŭnh jrĕnh, ngar lôm hăm kơpăih plei ƀlang, mĭnh kơtoăl brai đei pik pham iĕr, rup meo pơm nhen kơpô, rơmo, pơbe, iĕr, rim tơmam drăm choh pơtăm păng dôm ‘nhĕm ‘nhot sa joăt joe kơ bơngai M’nông. Păng mĭnh tơmam ưh kơ gơh kơƀăh ‘noh ‘long Ƀlang, iŏk yoa pơm dur pơlei. Lơm jơ ‘năr gĭt kăl, ƀok pơjou vơ vak sơmăh: “Ơ yang kông yang đak yang nak yang hrêr, yang bri kông ... năr ou nhôn pơgơ̆r kơ̆m kang kơnang giĕng vang et sa hơdoi hăm kon pơlei nhôn năr Kơ̆m kang kơnang giĕng var pơlei pơtăm ‘long, hơvơh hơvơi hơpơi kơ yang lăng tông nông gia ƀa hơƀo jing ‘lơ̆ng. Nhôn jei hơvơh hơvơi hơpơi kơ yang lăng tông nông gia kon pơlei nhôn pran jăng grăng akou. Dang ei hơvơh hơvơi hơpơi kơ yang vang jur et sa hơdoi hăm kon pơlei nhôn”.

Lăp đơ̆ng rŏng sơmăh, ƀok pơjou tơƀĕnh ăn kră pơlei et tơdrô ge, tơbăt hơdăh jơ ‘năr pơgơ̆r “Tăm blang mprang ƀon”. Khul tôn chĭng chêng păng hơsoang chă tôn chĭng chêng, hơsoang ‘lơ̆ng rŏ.

Pơjou sơmăh lơ̆m năr pơgơ̆r gĭt kăl ou ‘noh yă H’Đêm, mĭnh ‘nu ngê̆ nhân gơh hơgei oei lơ̆m bon Jarah, tơring Nâm Nung. Yă tơbăt “Kơ̆m kang kơnang giĕng Tăm blang mprang ƀon” đei pơgơ̆r lăp đơ̆ng rŏng jang sa keh đang. Lơ̆m soi tơbeh đei 3 ‘măng pơgơ̆r, mă blŭng ‘noh eoi tơbeh kơ yang hơbang mĕ ƀă yă ƀok, truh soi tơbeh ăn jang sa ƀa hơƀo, jơhngơ̆m pran jăng grăng akou păng mă hơtuch ‘noh pơgơ̆r kơ̆m kang kơnang giĕng Tăm blang mprang ƀon. Soi tơbeh đang, kră pơlei iŏk brai chô̆ tơ̆ kơkŏng ti, hơpơi ăn hơrih sa pran jăng grăng akou ăn kon pơlei păng tơmoi vang năm. Lăp đơ̆ng rŏng pơtăm ‘long ƀlang tơ̆ hơnăp hnam hop akŏm pơlei ƀon Jarah, yă H’Đêm tơbăt:“Tơdrong kơ̆m kang kơnang giĕng Tăm blang mprang ƀon”, ba tang măt ăn kon pơlei hơvơh hơvơi hơpơi kơ yang lăng tông nông gia kon pơlei hơrih sa hiôk chơt, pran jăng grăng akou”.

Ngê̆ nhân ưu tú Y Xuyên, Kră pơlei ƀon Jarah, tơroi tơbăt: ‘Nou tơdrong kơ̆m kang kơnang giĕng đunh đai tai sơnăm hloh kơ bơngai M’nông, tơbăt hơdăh jơhngơ̆m đon chơt hơ iă ‘nă hal đơ̆ng rŏng mĭnh sơnăm jang sa đei iŏk yoa kơjăp, pơlei pơla pran jăng grăng akoau păng hơmŏ sơnăm ‘nao ‘lơ̆ng rŏ hơbŏ nhen hloh dơ̆ng. Kră pơlei Y Xuyên hiôk chơt tơbăt: “Kơ̆m kang kơnang giĕng Tăm blang mprang ƀon” ‘nao đei Hơnih tơm vei lăng Joh ayŏ kơdŏ soang-Đă ƀlŏng lŏng tơplŏng kơdou păng Tơmang pơhiơ̆ drơ̆ng jing Mŭk drăm oei sa gĭt kăl dăr sơnăm teh đak. “Tơdrong kăl kơ “tăm blang mprang ƀon” ‘noh vă vei lăng năng tông, ưh kơ lê̆ đei khul kơnê̆ chă pơchŭt pơdôr phă pơrăm tơdrong hơrih sa hiôk chơt pơlei pơla, păng hơpơi ăn kôn mon kon sou pran jăng grăng akou, hơnŭk hơnoa; jang mir hoei kơrăm sem bri păng khul kơnê̆ phă pơrăm. ‘Nou jĭ dôm tơdrong joăt joe ‘lơ̆ng rŏ kơ kon pơlei M’nông nhôn”.

Kơ̆m kang kơnang giĕng Tăm Blang M’prang bon kơ bơngai M’nông oei tơ̆ tơring kăn kư̆ kĕch mang Nâm Nung, dêh char Lâm Đồng hlôi pơtôch hăm jơva chĭng chêng djơ djrĭng djơ djrăng vang vơch nơ̆r pơma dơnuh chơt hơ iă ‘nă hal kơ kon pơlei pơla. Đơ̆ng tơdrong soi tơbeh gĭt kăl truh tơdrong pơgơ̆r et sa chơt hơ iă, đĭ đăng jei tơƀôh hơdăh jơhngơ̆m đon hơpơi ‘meh vă găh mĭnh sơnăm ‘mi rŏ tŏ hơlăng, jang sa iŏk yoa kơjăp, kon pơlei oei sa sơđơ̆ng, pran jăng grăng akou, tơgoăt tơgoăl pôm nơ̆r ƀơ̆r đon păng hơnơ̆ng vang vei răk tơƀăk mong păng atŏk tơ iung tơdrong oei sa joăt joe ‘lơ̆ng rŏ hơbŏ nhen đơ̆ng mĕ ƀă yă ƀok chă pơsư̆ ăn.