Vă hơmet ăn năr gĭt kăl âu, pơđĭ plei H’Ring nhen vă ưh kơ đei tep. Đơ̆ng đak hơdrơ̆m pơlei truh rim hnam kơjung tă kơ đei hơpuih hơmet ‘yâu rơgoh ngăl. Gơ̆ng pơdơ̆ng ƀơ̆t tŏk bŏk cham atŭm nhen 1 nơ̆r krao đe yang vih et sa. Tơ̆ kơđŏng soi, dôm tơmam ‘lơ̆ng hloh đơ̆ng bri kông đei pơyơ̆r ăn: đơ̆ng pơlăh đing, tơ drô ge, truh ka đak, ‘nhĕm prung păng pơđĭ ‘nhĕm kơ ne chŭn. ‘Noh ưh kơ sĭ lăp jing tơmam sa đĕch, mă jing đak pơ uh, jing tơdrong pơđom đơ̆ng groi teh mĕ đơ̆ng rŏng 1 sơnăm jang sa pơnam. Pơma dơnuh găh tơdrong ‘lơ̆ng đơ̆ng năr et sa, mŏ H’Luyết, plei H’ring, xăh Cư M’gar hơiă tơroi:

“Pơyan jang sơnăm ‘nâu đei lơ, đei kơjă dơ̆ng kơna kon pơlei lơ̆m pơlei bu bu kŭm chhôk hơiă. Tơdrong et jur sa pơgơ̆r chơt hơiă, rơ ông rơ ang. ‘Moi kiơ̆ đơ̆ng et sa, kon sâu oei đei mơ̆ng ƀok yă, mĕ ƀă tơroi dơ̆ng dôm tơdrong joăt oei sa đơ̆ng kră sơ̆, đơ̆ng ‘noh sa roi ‘mêm păng pơ ‘lơ̆ng hăm tơdrong joăt joe ‘lơ̆ng hơiă kơ hơdrĕch kơdih .”

Ưh khan lăp jing ‘măng bơnê, Et jur sa oei jing hơnih tơgoăt kơjăp tơdrong pôm ƀơ̆r đon, hơnih dôm tơdrong hlôh vao jang sa đei pơjao kiơ̆ rim jơhnơr. Tơroi găh tơdrong gĭt kăl joh ayŏ đơ̆ng et sa âu, ƀok Joang Chả, Bí thư chi bộ plei H’ring tơbăt:

"Bơngai Xơ Đăng đei pơgơ̆r et sa rim sơnăm. Đơ̆ng rŏng 1 sơnăm jang gleh hrat, mưh truh pơyan kĕch yuă đang, kon pơlei gô iŏk ƀa hle peh păng pơgơ̆r et sa. Et sa đei tơdrong ‘lơ̆ng ‘meh vă yang tơgŭm ăn sơnăm ‘nao ‘mi rŏ tŏ hơlăng, tơdrong hơrih sa hiôk, jang sa đei iŏk yua lơ hloh.”

Kŭm hăm kon pơlei kơtă hơnih, et jur sa sơnăm ‘nâu tơ̆ plei H’Ring sơng tôch kơ lơ tơmoi. Lơ̆m re jơva chĭng chêng jơ̆p bri kông, mŏ Lê Thị Long, tơmoi truh đơ̆ng pơlei tơm Hồ Chí Minh vang tơroi jơhngơ̆m chơt hơiă ƀơ̆t ‘nâu ‘noh ‘măng mă 2 sư vang akŏm et soi âu.

“‘Măng mă 2 ĭnh vang akŏm et sa. Et jur sa ĭnh ƀôh ƀĕnh tơdrong hơiă kơ bơngai Xơ Đăng tơ̆ âu păng kon pơlei tơ̆ âu tôch kơ rơhâu, hiôk. ‘Ngoăih tôn chĭng chêng ĭnh oei đei sa dôm tơmam sa kơ kon pơlei kon kông. Ĭnh apĭnh hmach kơ kon pơlei hơnih âu sơnăm ‘nao pran jăng grăng hơkâu, hiôk chơt, jang sa đei phe ƀa lơ.”

Et jur sa sơnăm 2026 tơ̆ plei H’ring đei tơdrong ‘lơ̆ng gĭt kăl hăm khŭl kơdră păng kon pơlei lơ̆m tơring. ‘Nâu jĭ tơdrong jang joh ayŏ tih mă blŭng đei pơgơ̆r đơ̆ng rŏng kơ bơ̆jang kiơ̆ tơdrong jang tơmơ̆t hơdai, hơmet pơ ‘lơ̆ng tôm khŭl bơ̆jang tơ̆ xăh. Đơ̆ng tơdrong chơt hơiă atŭm kơ kon pơlei, ƀok Nguyễn Tuấn Anh, Phŏ Kơdră Anih vei lăng kon pơlei xăh Cư M’gar tơbăt:

“Đơ̆ng rŏng tơmơ̆t hơdai, khŭl kơdră tơring tơlĕch tơdrong chĕp vei, tư̆k tơiung kơjă kăp gĭt joh ayŏ kơ dôm hơdrĕch kon kông ‘noh jĭ tơdrong gĭt kăl. Chơt hơiă dêh ‘noh jĭ pơđĭ tơdrong kŭm nhen trong pơgơ̆r et sa tă kơ yua đơ̆ng kơdih kon pơlei lơ̆m pơlei iŏk jang. Khŭl kơdră tơring păng kơdră đảng lăp tơgŭm 1 păh jên păng 1,2 tơdrong kăl đĕch, uơ oei dơ̆ng kon pơlei kơchăng bơ̆jang kơdih ngăl. ‘Moi kiơ̆ tơdrong et sa, jơhngơ̆m đon tơgoăt tơgoăl, tơklep hơdai lơ̆m tơpôl bơngai Xơ Đăng kŭm nhen đơ̆ng dôm hơdrĕch hơdrŭng hơrih sa tơ̆ pơlei tơ jê̆ đei hơtŏk loi dơ̆ng.”

Et jur sa pơtôch lơ̆m tơdrong chhôk hơiă, jing tơ ley tơgoăt kơjăp hloi lơ̆m năr blŭng sơnăm. Dôm kơchŏk tơdrô ƀâu phu phơ phơ̆t păng ‘măng hơsoang rơ huĭ rơ huĭn nhen nơ̆r tơƀôh hơdăh ăn tơdrong hơrih pran kơtang đơ̆ng tơdrong oei sa ‘lơ̆ng hơiă Xơ Đăng tơ̆ groi kông Đắk Lắk. Tơklăh ti hăm plei H’ring, ƀlŏk găh 1 pơyan jang phĭ tơnŏ păng tơdrong ‘mêm băl hơiă oei gô đei ling lang kŭm hăm re jơva chĭng chêng tŏk bŏk bri kông.