Yă Lơ Mu K’Poh (bơngai K’Ho- Cil) hloh 70 sơnăm, oei tơ̆ thôn Srê Đăng, xah Tân Hội, dêh char Lâm Đồng ăn tơbăt: et soi krao hơnăn ăn bơngai hơ-ioh 'nao rơneh jĭ khôi juăt kăp gĭt. 'Nou jĭ 'măng vă tơƀôh tơdrong sô̆ hơ-iă kơ unh hnam, tơroi hăm pơlei pơla băt kơ minh bơngai 'nao: “Đơ̆ng rŏng khei năr hrat păng tơnap tap oei hơnăp, truh năr mĕ kon rơneh sơđơ̆ng, noh unh hnam mă noh pơgơ̆r et soi krao hơnăn kiơ̆ khôi kon kông nhôn. Hơpơi 'meh ning mônh kơnh nge gơh grăng pran, tih vơ̆ jing bơngai pơyua, yuk kiơ̆ mĕ ƀă”.

Ah mă nge đei rơneh lơ̆m minh giĕng, unh hnam pơgơ̆r Et soi krao hơnăn. Mưh tơdrong hơrih unh hnam tam mă kĕ đei 'noh đe pơgơ̆r pơtih đĕch vă nge đei hơnăn. Hơdrol kơ pơgơ̆r, unh hnam hơvơn đe kră pơlei, bơngai đei kon pơlei lui yom, dah mă bơngai ma lơ̆m kơtum kơtŏng truh pơđăp tơdrong et soi. Ƀok Liêng Hót Ha Kliêng (bơngai K’Ho Cil) tơ̆ thôn Srê Đăng, xah Tân Hội, dêh char Lâm Đồng ăn tơbăt, tơmam soi plang lơ̆m et krao hơnăn kơ bơngai K’Ho adoi kiơ̆ tơdrong kĕ đei kơ rim unh hnam: “Đei nhŭng, đei iĕr noh ƀuh nhŭng iĕr; hăm tơdrong hơpơi 'meh nge ưh đei ƀom jĭ pơlŏ trŏ tơngiĕt, ưh đei tơnap tap lơ̆m tơdrong hơrih, mă gô đei tơdrong sơđơ̆ng 'lơ̆ng păng pŭn ai. Đơ̆ng rŏng kơ noh bơngai tang măt ăn unh hnam hơvơn bơngai 'lŏ sơnăm 'măn ti ah klĕng nge păng thơ thou ăn nge gơh đei tơdrong sơđơ̆ng, hăm tơdrong hơpơi 'meh nge kĕ tang găn tơdrong kơnê̆, tơdrong chere. Ning mônh kơnh, ah tih vơ̆ đei đon bơnôh dim 'lơ̆ng, tơgop jơhngơ̆m tơ-iung pơjing pơlei pơla; noh jing tơdrong kăp gĭt hloh kơ et soi krao hơnăn ou kơ bơngai K’Ho nhôn”.

Hơnăn kơ bơngai K’Ho Cil noh kăp gĭt, tơƀôh tơdrong pơdjoi kơtum kơtŏng păng tơring oei hơrih xa. Yuơ noh, hơdrol kơ pơgơ̆r et soi krao hơnăn, unh hnam athei apinh dôm bơngai hlôh vao kloh klĕch gah tơm a la chă kơtum kơtŏng, đe 'lŏ kră, bơngai đei lui yom lơ̆m unh hnam, vă rơih hơnăn mă trŏ. Hăm K’Ho Cil tơ̆ Tân Hội, hơnăn krao ăn nge drăkăn noh K’Jiêng, K’Ba; mưh nge drŏnglo noh Ha Liang, Ha Kră, Ha Ôñ… Ƀok Liêng Hót Ha Kliêng ăn tơbăt, noh jĭ dôm hơnăn krao tơguăt hăm dôm bơngai hơgei lơ̆m kơtum kơtŏng, ah đei tơbăt lơ̆m tơpôl pơlei pơla, bơngai K’Ho Cil tôch pơ-ư pơ-ang: “Kiơ̆ khôi kon kông nhôn vă krao hơnăn ăn kơ nge athei rơih dôm hơnăn drŏnglo băt 'mêm kơ pơlei pơla, tơ-iung pơjing pơlei pơla noh iŏk krao hơnăn ăn kơ kon. Oei dôm bơngai ayơ mă ưh kơ 'lơ̆ng noh đe ưh đei iŏk hơnăn noh krao ăn kơ kon ôh. Bơngai drăkăn thoi ăi mơ̆n, bơngai drăkăn ayơ răk ăn tơdrong 'lơ̆ng noh iŏk krao hơnăn ăn kơ kon. Pơtih nhen yă K’ Huệ, K’Ba, ƀok Ha Liang, Ha Kră … noh jĭ dôm hơnăn vă unh hnam rơih păng krao ăn kơ kon po, kơlih đe sư đei đon băt 'mêm, băt tơgŭm dih băl păng tơgop jơhngơ̆m vei lăng pơlei pơla”.

Jah vă akhan, et soi krao hơnăn kơ bơngai K’Ho Cil tơ̆ Lâm Đồng ưh hơdrô̆ jĭ minh khôi joh ayŏ, mă oei jing tơdrong tơbăt ăn rim jơhnơr bơngai băt tơgĭt kơ tơm a la chă, vei răk khôi juăt 'lơ̆ng rŏ mă yă ƀok pơsư̆ ăn. Kiơ̆ đơ̆ng rim hơnăn, tơdrong băt 'mêm kơ unh hnam, tơdrong hơpơi 'meh kơ minh tơdrong hơrih sơđơ̆ng, pran jăng, băt kŭp yom păng tơguăt tơguăl đei pơtruh ăn bơngai hơ-ioh. Lơ̆m tơdrong hơrih 'nao hrei ou, et soi krao hơnăn adoi oei đei sơnong kăp gĭt, tơroh khei năr sơ̆ - dang ei – hơnô̆ hơnăp kơnh, rong 'me đon bơnôh păng tơdrong joh ayŏ kơ kon pơlei K’Ho Cil.