Lơ̆m tơdrong et soi kơ yang hri đei hơmet pơgơ̆r tơ̆ pơlei Dun De, xah Ia Grai, tơdrong et xa đei hơmet pơgơ̆r trŏ ƀlep đơ̆ng khôi soi tơbeh, tơmam soi plang ăn kơ yang kiơ̆ kră sơ̆ truh tơdra chĭng chêng păng tơdrong hơsuang kơ đe hơdruh tơdăm lơ̆m pơlei.

Pơmai Puih Gái, bơngai lơ̆m pơlei Dun De ăn tơbăt: Et soi kơ yang hri kơ bơngai Jarai sơ̆ jĭ tơdrong et xa gĭt, pơgơ̆r hơdrol kơ rei pơtăm, ah mă kon pơlei apinh yang hơpang asong ăn 'mi kial sơđơ̆ng, pơyan jang xa đei yua lơ. Găn ga kiơ̆ khei năr, khôi juăt ou nhen lĕ hiơt hiong. Hrei ou, mă tơdrong jang xa adoi oei gơnơm lơ̆m cham char 'mi kial, tơdrong et soi kơ yang hri adoi oei vei sơnong kăp gĭt vă kon pơlei akŏm dih băl, tơroh păng vei răk dôm kơjă joh ayŏ juăt jue: “Sơnăm mă yơ nhôn adoi truh akŏm. Kon pơlei hơmet pơgơ̆r et soi dơ̆ng vă vei răk dôm khôi juăt 'lơ̆ng rŏ kơ bơngai Jarai, noh inh băt gah tơdrong hơsuang, nơ̆r chĭng chêng. Nhôn adoi pơtho ăn đe hơ-ioh băt, vă ning mônh kơnh ưh đei hiơt joh ayŏ kon pơlei pơla po”.

Hăm bơngai Jarai tơ̆ tơring Ayun Hạ, et soi apinh đak 'mi Yang Pơtao Apui tơroi hơdah tơdrong hơrih đon lui păng tơdrong tơguăt 'lơ̆ng đơ̆ng kon bơngai hăm cham char. Găn ga pă lĕ dôm hnưr bơngai, khôi juăt ou adoi oei đei vei răk nhen minh djoi brai grasia tơroh kon pơlei hăm yang hơpang, bri kông, tŏ 'mi kial păng pơyan jang xa. Hơnơ̆ng đei pơgơ̆r lơ̆m pơhlom khei 9 rim sơnăm, et soi apinh đak 'mi pơjing đei cham char grasia kơ bri kông, nơ̆r chĭng chêng păr ang, dôm bơngai tơgŭm ăn Pơtao Unh chăl mă 14 pơgơ̆r tơdrong et soi kŭp yom kăp gĭt. Lơ̆m đon lui kơ bơngai Jarai, Pơtao Unh ưh kơ sĭ bơngai pơgơ̆r kon pơlei pơla, mă jĭ ƀok “pơtao kơ đon bơnôh”, tang măt ăn đon lui păng tơdrong kŭp yom đơ̆ng kon pơlei. Kon pơlei apinh asong ăn tŏ 'mi kial sơđơ̆ng 'lơ̆ng, pơlei pơla jang xa đei yua, kiơ̆ đơ̆ng noh pơtruh tơdrong hơpơi 'meh gah tơdrong hơrih phĭ tơtŏ dơnŏ 'lơ̆ng păng kơjăp lơ̆m tơdrong hơrih. Ƀok Rmah Yơi, bơngai đei kon pơlei lui yom tơ̆ Plei Ơi, xah Chư A Thai, dêh char  Gia Lai ăn tơbăt: “Nhôn pơ-ư pơ-ang kơlih hlôi đei tôm 14 chăl Pơtao Unh pơtoi hloi. Pơtao Unh ưh kơsĭ pơtao pơgơ̆r kon pơlei, mă jĭ ƀok pơtao gah grasia đon bơnôh, đei kon pơlei tơ̆ rim pơlei pơla kŭp yom kơdêh. Lơ̆m tơdrong hơrih đon lui kơ kon pơlei, Pơtao Unh đei sơnong tơroh kon bơngai hăm yang hơpang, tang măt ăn kon pơlei vă sơkat apinh gơh đei tŏ 'mi kial sơđơ̆ng, pơyan jang xa đei yua lơ, jơhngơ̆m jăn kon pơlei grăng pran ling lang”.

Lơ̆m dôm sơnăm tơjê̆ ou, dêh char Gia Lai tơrĕk gah tơdrong jang vei răk, hơmet dơ̆ng dôm khôi juăt kră sơ̆, atŭm hăm noh dar deh tơguăt hăm hơtŏk jang tơmang pơhiơ̆. Lơ khôi et xa đei hơmet dơ̆ng lơ̆m dôm tơdrong akŏm joh ayŏ tih nhen Giĕng akŏm Pơkao dur – Kông unh Chư Đang Ya, Festival chĭng chêng, Năr akŏm joh ayŏ kon pơlei kon kông, Giĕng Mŭk drăm joh ayŏ kon pơlei kon kông dêh char Gia Lai … păng dar deh jing tơdrong akŏm rim sơnăm, hơvơn lơ kon pơlei păng tơmoi tơrĕk truh. Atŭm hăm noh, đei lơ tơdrong akŏm nhen “Chĭng chêng hơtuch giĕng – Mơ̆ng lăng păng Pơhrăm” dah mă “Um ai joh ayŏ Gia Lai – vei răk păng hơtŏk”, pơgơ̆r kiơ̆ pơkăp tơ̆ Cham pơhiơ̆  Đại Đoàn Kết, hlôi tơgop hơ-'nhăk tơdrong joh ayŏ pơlei pơla lĕch tơ̆ kơphô̆.

Hăm tơdrong vang akŏm đơ̆ng đe ngê̆ nhơ̆n Bahnar, Jarai, dôm tơdrong pơdah ưh hơdrô̆ gah chĭng chêng mă oei pơdah dôm tơdrong et xa nai, tơdrong jang kră sơ̆, tơmam xa păng pơsuh pơchơt kră sơ̆ 'lơ̆ng hơ-iă hloh. Yă Lê Thị Thu Hương, Phŏ Kơdră Hơnih Joh ayŏ, Tơplŏng kơdou păng Tơmang pơhiơ̆ dêh char Gia Lai, sơnăm 2025, tơdrong chă hơmet dơ̆ng dôm khôi juăt so kơ kon pơlei đei pơm jang kiơ̆ lơ trong, 'lơ̆ng hloh, kăp gĭt hloh tơrĕk truh tơdrong tơm, ưh đei “chă pơm pơdah” đĕch ôh, kiơ̆ đơ̆ng noh vei tôm tơdrong 'lơ̆ng trŏ kơ joh ayŏ kon pơlei kon kông tơ̆ tơring teh Gia Lai:  “Jah vă akhan, kiơ̆ đơ̆ng dôm tơdrong hơmet dơ̆ng, kon pơlei chơt sô̆ lơ̆m đon. Đơ̆ng sơnăm 2023 truh 2025, dêh char hlôi pơgơ̆r lơ tơdrong et soi păng khôi juăt so. Dang ei, hơnih jang pơtoi tơgŭm ăn Hơnih jang vei lăng kon pơlei dêh char pơtoi chih akŏm tơdrong jang vei răk chĭng chêng đơ̆ng sơnăm 2026-2030, lơ̆m noh đei tơdrong hơmet dơ̆ng dôm khôi juăt so. Inh hơpơi 'meh khei năr truh joh ayŏ kon kông tơ̆ Gia Lai gô đei lơ bơngai băt truh hloh".

Dôm khôi juăt so đei hơmet tơ-iung ưh hơdrô̆ vei răk dôm joh ayŏ kră sơ̆ kơ pơlei pơla, mă oei rong tơdrong pơ-ư pơ-ang ăn kon pơlei pơla gah joh ayŏ kon kông po, kiơ̆ đơ̆ng noh pơm hơtŏk um ai joh ayŏ 'lơ̆ng rŏ păng tơdrong hơrih ăn tơring teh Gia Lai hrei ou.