Năr hơtuch giĕng, tơ̆ Hnam trương Mầm non Hoa Hồng, tơring Ia Dreh, dêh char Gia Lai, ƀrông ƀrang hơbĕn ao tanh chơt hơ iă ‘nă hal hloh dơ̆ng kơ yuơ jơva chĭng chêng. ‘Nou jĭ tơdrong pơgơ̆r hŏk pơhrăm dui brai vai tanh khăn, tanh jĭt păng tôn chĭng chêng kơ bơngai Jarai. Tơ̆ ou ưh khan lăp hơdrô̆ đe ngê̆ nhân hrŭk hơben ao tanh, mă lei rim kô pơtho, rim đe hơ ioh jei tơbôch tơbach hăm hrŭk hơbĕn ao tanh ‘lơ̆ng liĕm. Duch Nay H’Tố Trinh, kô pơtho Hnam trương Mầm non Hoa Hồng pơtho ăn đe hơ ioh chă lăng păng đei rim ngê̆ nhân chă pơtho ăn trong tanh brai tôch hơlen.“Hnam trương mầm non nhôn pơgơ̆r chă lăng hŏk pơhrăm tơdrong oei sa joăt joe kơ hơdrĕch hơdrung ăn rim đe mon hăm lơ tơdrong pơgơ̆r nhen tôn chĭng chêng, tanh jĭt, dui brai vai tanh khăn…. Nhôn hơvơn rim ngê̆ nhân tanh brai truh chă tơƀôh tơbăt hơbĕn ao tanh păng pơtho ăn đe mon trong tanh brai. Jĭ kô pơtho, tơdrong hơpơi ‘meh vă tih tên hloh kơ nhôn ‘noh vă rim đe oh hrôih pơm joăt, hlôh vao tơdrong gĭt kăl kơ tơdrong jang dui brai vai tanh khăn, ‘noh jĭ mŭk drăm mă mĕ ƀă yă ƀok chă pơsư̆ ăn kôn mon kon sou đơ̆ng rŏng.”

Rim ngê̆ nhân tanh brai, tanh jĭt păng ngê̆ nhân tôn chĭng chêng đơ̆ng rim pơlei Nông Siu, pơlei Bha Nga, pơlei Blak (tơring Ia Dreh, dêh char Gia Lai) hlôi tơgŭm ăn rim đe mon đei tơdrong tơmang lăng ‘lơ̆ng rŏ păng gĭt kăl găh tơdrong oei sa joăt joe kơ hơdrĕch hơdrung. Yă Nay H’Kông - Kơdră Khul Dui brai vai tanh khăn pơlei Nông Siu chơt hơ iă ‘nă hal kơ yuơ hơbĕn ao tanh đei vang chă pơdă tơƀôh lơ̆m jơ ‘năr pơgơ̆r lơ̆m dêh char, kon jên tĕch tơmam drăm ou đei hloh 50 triu hlak jên, kơdih yă đei Hơnih jang Mặt trận dêh char Gia Lai pôk ăn Hla bơar hôn bơnê. Dôm tơdrong gĭt kăl hloh ‘noh, iŏk đơ̆ng tơƀôh tơbăt dôm tơdrong oei sa joăt joe kơ bơngai Jarai, mă kăl ‘noh pơtho ăn tơdrong jang joăt joe sơ̆ ki ăn jơhnơr mơlôh.“Nhôn hlôi vang năm chă pơdă tơƀôh tơdrong jang dui brai vai tanh khăn tơ̆ pêng hnam trương mâu giáo lơ̆m tơring. Tơ̆ ou, ưh khan lăp chă pơdă, tơƀôh tơbăt mă oei chă pơtho hloi ăn đe kôn mon kon sou trong dui brai vai tanh khăn, đe sou tôch hưch hanh, đơ̆ng noh pơm hơtŏk jơhngơ̆m đon hưch hanh hơmanh bơnê hăm dôm khăn, hơbĕn ao tanh nhen rim mih ma duch nă hơdrol hlôi pơtho ăn. Tơdrong hưch hanh đơ̆ng đe kôn mon jei pơm ăn kơ nhôn chhôk hơ iă ‘nă hal, kơ yuơ đe kôn mon gô jing dôm bơngai pơtăl păng vei răk tơƀăk mong tơdrong jang dui brai vai tanh khăn ou.”

       Pơgơ̆r tơmang lăng hŏk pơhrăm tơdrong oei sa joăt joe hơdrĕch hơdrung tơ̆ tơring ia Dreh, dêh char Gia Lai ling lang đei kơdră tơring păng rim khul jang tơgŭm djru. Yă Nguyễn Thị Ly Na -  Kơ iĕng Kơdră Khul drŏ kăn tơring Ia Dreh tơbăt, đơ̆ng sơnăm sơ̆, lơ̆m tim mă hơgrop, Hơnih vei lăng kon pơlei apŭng Krông Pa (so) hlôi tơchơ̆t pơjing Khul Dui brai vai tanh khăn pơlei Nông Siu, hăm 17 ‘nu bơngai, vă vei răk tơƀăk mong tơdrong oei sa joăt joe kơ bơngai Jarai lơ̆m tơring. Tơdrong jang kơ khul ưh khan hơnhăk  tơdrong jang sa iŏk yoa kơjăp ăn pơmai oh, mă oei pơm hơtŏk ‘lơ̆ng tơdrong oei sa joăt joe kơ hơdrĕch hơdrung ăn jơhnơr mơlôh dơ̆ng. “Păh Hnam trương mầm non Hoa Hồng hơvơn ngê̆ nhân, Khul dui brai vai tanh khăn năm tơ̆ hnam trương vă tơƀôh tơbăt, pơtho ăn jơhnơr hơ ioh băt truh găh rim khăn, hơbĕn ao tanh kơ bơngai Jarai. Khul jei yak hơdoi hăm pơmai oh tơring, ‘noh pơm lơ liơ vă vei kơjăp tơdrong oei sa joăt joe sơ̆ ki kơ hơdrĕch hơdrung bơ̆n; hơpơi ‘meh vă tơmam drăm bơ̆n pơm tơlĕch đei rim bơngai băt truh ‘moi kiơ̆ rim ‘măng pơgơ̆r tơƀơ̆p pơlong dih băl dôm tơdrong oei sa joăt joe-joh ayŏ kơdŏ soang”.  

Dôm jơ hŏk pơhrăm tơmang lăng tơdrong gĭt kăl tơ̆ Hnam trương Mầm non Hoa Hồng, tơring Ia Dreh, dêh char Gia Lai hlôi pơm ăn hnam trương mầm non jing hơrih oei sa joh ayŏ ‘lơ̆ng rŏ hơbŏ nhen, kơ yuơ tơdrong oei sa joh ayŏ joăt joe hơdrĕch hơdrung ưh kơ oei lơ̆m hơnih mong răk mă ƀôh hơdăh yan ou, lang să dôm găr kơtoăl brai chă tanh, rim tơdra chĭng chêng vang vơch mơ̆t lơ̆m jơhngơ̆m.