Kiơ̆ Hơnih jang Joh ayŏ, Tơplŏng kơdou păng Tơmang pơhiơ̆ dêh char Lâm Đồng, kơsô̆ tơmoi chă tơmang lăng, oei pơdơh đei pơhlom 650.000 'nu, lơ̆m noh tơmoi đơ̆ng teh đak đe pơhlom 30.000 'nu; pơyua đơ̆ng jang tơmang pơhiơ̆ đei pơhlom 1.200 tih hlj. Tơdrong yua lăm pơdơh đei jơnei đơ̆ng 70–80%, gah dôm hơnih oei pơdơh kiơ̆ pơkăp đơ̆ng 3–5 sao đei đơ̆ng 85–90%.

Vă jong ăn tơmoi, dêh char Lâm Đồng hlôi tơlĕch lơ trong jang vei sơđơ̆ng 'lơ̆ng lơ̆m tơpôl, sơđơ̆ng trong nơnăm, rơgoh cham char păng rơgoh tơmam drăm xa. Dôm hơnih jang gah tơmang pơhiơ̆ pơm kiơ̆ tơnăp kơjă thoi nhen pơkăp, ưh lê̆ đei tơdrong pơđep kơjă, chă tơdui, pơjing cham char tơmang pơhiơ̆ gơh hơgei, sơđơ̆ng 'lơ̆ng.

Đà Lạt pơtoi jĭ hơnih truh đei lơ unh hnam rơih iŏk. 'Nhŏng Lê Văn Trọng, tơmoi đơ̆ng dêh char Đăk Lăk tơroi: “Ƀôh hơdah tơdrong 'mêm kơ tơmoi đơ̆ng hơnih oei xa truh dôm hơnih tơmang lăng cham char 'lơ̆ng adoi đei tơroi tơnăp. Ah mă truh hăm pơgar pơkao ou, inh ƀôh hơdah tơdrong hơtŏk tơ-iung kơ dêh char Lâm Đồng 'nao, tơdrong hơtŏk tơ-iung kơ teh đak yak mơ̆t lơ̆m sơnăm 2026”.

Lơ̆m kơplah noh, tơring gah Hlĕch kơ dêh char Lâm Đồng adoi đei lơ tơmoi truh. 'Nhŏng Nguyễn Thành Công, tơmoi đơ̆ng pơlei tơm HCM ăn tơbăt: “Inh rơih Phan Thiết păng Mũi Né jĭ hơnih truh tơmang. Inh năm tơmang tơ̆ Suối Tiên, Lâu Đài tơdrô vang, hao gre jeep, vơ̆r thŏng sup… păng 'măn jơ năr pơdơh pơdei. 'Măng chă tơmang pơhiơ̆ blŭng sơnăm ou inh lăp chă tơmang lăng cham char plenh teh”.

Ƀơ̆t 'măng ou, lơ tơdrong akŏm joh ayŏ - pơhiơ̆ đei pơgơ̆r nhen Countdown – Sơng sơnăm 'nao 2026 tơ̆ Đà Lạt, Mũi Né păng tơring gah Pơmơ̆t Lâm Đồng; atŭm hăm dôm tơdrong joh ayŏ, lêh akŏm tơ̆ dôm hơnih tơmang pơhiơ̆. Mă kăl, Lâm Đồng pơgơ̆r sơng 'măng păr blŭng a kơ sơnăm 2026, sơng pơhlom 200 'nu tơmoi, tơgop tơbang um rŭp kơ hơnih truh sơđơ̆ng 'lơ̆ng.

 Gơnơm hơmet tơnăp, tơmang pơhiơ̆ Lâm Đồng ah Têt Dương lịch 2026 hlôi pơtrŏ tơnăp tơdrong 'meh chă tơmang lăng, pơdơh pơdei kơ tơmoi. Đơ̆ng tơdrong pơtơm ou, Lâm Đồng tơlĕch tơchơ̆t sơng hloh 25 triu 'nu tơmoi lơ̆m sơnăm 2026, sơkơ̆t hơdah hơnih dơ̆ng pran gah tơring tơmang pơhiơ̆ 'lơ̆ng hloh kơ jơ̆p teh đak.