Hăm 'năr tơngiĕt kơ tơring groi kông Măng Đen 'lơ̆ng rŏ. Hơyuh 'năr rơngơp 'lơ̆ng, roi pơm ang hơdah hloh kơ-ang pơkao anh đào oei chôh ang, pơm ăn cham char lêh akŏm tơnŏ, vơch kơ đon bơnôh đơ̆ng dôm năr blŭng sơnăm 'nao.

Măng Đen đơ̆ng đunh sơ̆ đei pơtih nhen minh “dêh plenh jơk”, tơring mă plenh teh tơkuh băl, tơring mă bri kơdrơ̆ng hrou atŭm hăm tơdrong hơrih hiôk hian. Sơnăm 2025, Măng Đen pơtoi sơkơ̆t hơdah hơnih dơ̆ng jĭ minh lơ̆m dôm hơnih truh tơmang 'lơ̆ng rŏ kơ Việt Nam ah mă sơng đei jê̆ 2 triu 'nu tơmoi, lơ̆m kơsô̆ pơhlom 5 triu 'nu tơmoi truh Quảng Ngãi, tơgop kăp gĭt lơ̆m tơdrong pơyua đơ̆ng jang tơmang pơhiơ̆ hloh 3.700 tih hlj kơ jơ̆p dêh char.

Tơ̆ lêh pơtơm Giĕng Joh ayŏ - Tơmang pơhiơ̆ Măng Đen 2026, yă Y Ngọc, Phŏ Kơdră juăt jang kơ Hơnih jang vei lăng kon pơlei dêh char Quảng Ngãi ăn tơbăt, dêh char pơkăp keh đang tơdrong hơmet 'lơ̆ng asong jang gah tơmang pơhiơ̆; iŏk yua tơnăp dôm tơdrong pran, khŏm mă pơjing Măng Đen jing hơnih truh tơmang pơhiơ̆ cham char, pơdơh pơdei tơnăp hloh, hơtŏk tơ-iung kơjăp, tơgăl hăm găr dơmŏng kơ tơring păng lơ̆m apŭng plenh teh: “Măng Đen hrei ou pă đei oei lơ̆m hơnih jang tơmang pơhiơ̆ hơdrô̆ hơdrăn đĕch ôh mă hlôi jing hơnih tơroh, akŏm lơ̆m pơkăp Bri  – Dơsĭ kơ dêh char Quảng Ngãi 'nao. Tơroh tơdrong tơngiĕt kơ bri kông Măng Đen hăm kial tơhlu hơyuh ƀăt kơ đak dơsĭ achon teh Lý Sơn, Mỹ Khê; tơroh cham char joh ayŏ chĭng chêng kăp gĭt hăm dôm mŭk drăm joh ayŏ Sa Huỳnh”.

Tơdrong joh ayŏ kơdŏ suang đei hơmet tơnăp, asong jing 3 apăng: “Hơnih plenh teh tơkuh băl”, “Um ai bri kông” păng “Ƀlŏk hơdơ̆r hơpơi 'meh”. Dôm tơdrong hơri hơsuang kăp gĭt nhen: Tơm a la chă Măng Đen, Đak kơ-ang pơkao đào Măng Đen, Tơdrong hơri hơ-'nguơ̆u kơ Măng Đen, Kơmăng tôn chĭng chêng, Jơmŭl unh khơ̆ng groi kông… tơƀôh dơ̆ng tơdrong 'lơ̆ng rŏ kơ cham char, joh ayŏ păng kon bơngai Măng Đen, pơtruh hăm tơmoi minh tơdrong vơch akŏm ƀenh kơ tơring bri kông.

Ƀok Dương Tấn Nhựt, oei tơ̆ tơring Lý Sơn, dêh char Quảng Ngãi truh tơmang pơhiơ̆ tơ̆ Măng Đen tơroi: “Ah lêh, têt kơ sơnăm 'nao, inh ƀôh tơdrong joh hơri kăp gĭt tơpă, sô̆ hơ-iă dêh. Kiơ̆ đơ̆ng noh pơlan să, tơgop hơtŏk joh ayŏ, tơmang pơhiơ̆ kơ dêh char Quảng Ngãi. Quảng Ngãi păng Kon Tum 'nao tơmơ̆t hơdai, noh kon pơlei adoi hiôk hloh lơ̆m tơdrong chă hŏk hơlen dih băl, akŏm tơdrong joh ayŏ kơ 2 tơring Hlĕch păng Pơmơ̆t kơ dêh char Quảng Ngãi”.

Giĕng Joh ayŏ - Tơmang pơhiơ̆ Măng Đen 2026 hăm lơ tơdrong pơvih 'lơ̆ng nhen: Lêh akŏm khinh khí cầu, tơdrong joh ayŏ kơdŏ suang “Măng Đen năr 'nao”, akŏm kơchơ tơmam xa OCOP, akŏm kơchơ tơmam choh pơtăm păng 'long pơm pơgang, dôm tơdrong akŏm tơplŏng kơdou – hơlen băt păng tour tơmang pơhiơ̆ cham char plenh teh, 'nhăk ăn tơmoi truh tơmang dôm tơdrong hơlen băt kăp gĭt, ưh kơ layơ hiơt tơ̆ tơring teh groi kông Măng Đen.