Jơnei hla ar chih kơtơ̆ng ang ‘măng âu tôch kơ gĭt kăl, jĭ 1 lơ̆m dôm tơdrong jang hơdăh yak truh tơbăt 80 sơnăm Năr joăt joe kach mang kon pơlei, 20 sơnăm năr đĭ đăng kon pơlei vei lăng sơđơ̆ng teh đak. Tơ̆ lêh pơjao tơmam jơnei, Khŭl chơ̆m ƀai hlôi rơih iŏk 72 ƀai chih hơgei vă pơjao tơmam hơpăh, ‘noh đei: 6 ƀai đei jơnei A; 12 ƀai jơnei B; 19 ƀai jơnei C; 35 ƀai iŏk đei hơpăh pơ chhơp jơhngơ̆m.

Tơ̆ lêh pơjao jơnei, Radiô nơ̆r pơma Việt Nam (VOV) hlôi chơt hơiă iŏk đei 2 jơnei ‘noh jĭ 1 jơnei A đơ̆ng grŭp chih Bùi Thị Hương Giang; Nguyễn Thị Kim Thanh (Khŭl kơtơ̆ng ang kơ Radiô nơ̆r pơma Việt Nam) hăm ƀai "Lơ̆m tơdrong đơ̆ng lôch hăm hơrih” păng 1 jơnei pơchhơp jơhngơ̆m đơ̆ng grŭp chih Bùi Hương Giang; Nguyễn Hà Phương (Báo Điện tử Nơ̆r pơma Việt Nam) hăm ƀai " Hŭt lê̆ lui Tin lành Đêgar: hue tơ̆ rŏng ‘noh ‘lơ̆ng”.