VOV4.Bahnar – Ƀơ̆t pơdơh lêh năr 30/4 păng năr 1/5 sơnăm ou, tơmoi truh Đăk Lăk gô đei akŏm tơdrong pơgơ̆r “Păr juang tơmang bri kông” ah Năr akŏm Khinh khĭ kâu 2025, pơgơ̆r đơ̆ng năr 1 truh năr 3/5 tơ̆ xah Krông Na, apŭng Buôn Đôn.

VOV4.Bahnar – Tơ̆ Cham akŏm pơhiơ̆ Đại Đoàn Kết, Anih Joh ayŏ, Tơplŏng kơdou păng Tơmang pơhiơ̆ dêh char Gia Lai Pơtơm năr Akŏm Joh ayŏ kon pơlei kon kông dêh char Gia Lai 'măng mă 4 sơnăm 2025 hăm tơdrong vang akŏm đơ̆ng hloh 800 ngê̆ nhơ̆n tang măt ăn kon pơlei kon kông hơrih pơm jang tơ̆ dêh char Gia Lai.

VOV4.Bahnar – Ngê̆ nhơ̆n A Thu bơngai Xơ Đăng tơ̆ thôn Đăk Rô Gia, xah Đăk Trăm, apŭng Đăk Tô, dêh char Kon Tum, jĭ bơngai dăp đon dăp bơnôh lơ̆m tơdrong jang vei răk tơƀăk mong rim kơjă joh ayŏ kon kông. Hăm tơdrong nhan lăp pran kơtang, Ngê̆ nhơ̆n A Thu ưh hơdrô̆ gơh hơgei lơ̆m tơdrong reh brŏ kon kông, mă oei hăt hot chă akŏm, pơm brŏ păng pơtho ăn khul sơnăm mơlôh.

VOV4.Bahnar – Năr akŏm Joh ayŏ kon pơlei kon kông dêh char Gia Lai 'măng mă 4 pơgơ̆r đơ̆ng năr 11 truh năr 13/4/2025, lơ̆m pơkăp dôm tơdrong jang sơng kơ kuh 50 sơnăm Năr Tơblah jơnei tơring pơbah, rơngei teh đak.

VOV4.Bahnar – Năr 8/4, Anih Pơdah tơmam drăm đơ̆ng tơdrong Tơblah Hồ Chí Minh pơtơm pơdah hơnăn "50 sơnăm păr ang ling lang tơdrong hơri nuih mơng", pơdah đei jê̆ 500 tŏ um, tomam drăm bơ̆ng pang kăp gĭt.

VOV4.Bahnar – Tơmang pơhiơ̆ Đăk Lăk hlôi tŏk jê̆ tong hơnê̆ gah kơsô̆ tơmoi păng tơdrong pơyua lơ̆m jăl 1 sơnăm ou.

VOV4.Bahnar – Pơgê 'năr brei (7/4), tơ̆ Anih tơmang pơhiơ̆ chơkơi Prenn Đà Lạt, dêh char Lâm Đồng hlôi pơgơ̆r Lêh akŏm yôk Ƀok dơnơm Hùng Vương.

VOV4.Bahnar - Tơ̆ apŭng sơlam Tuy Đức, dêh char Đắk Nông, dang ei đei hloh 200 ŭnh hnam hăm vă jê̆ 1.200 ‘nu pơlei dêh char Phú Thọ hơrih sa. Vă vei răk tơdrong lui kơyang păng hơtŏk tơdrong joăt joe “nhă đak ƀlŏk kơtu”, kon pơlei vang tơra jên, năr jang pơm hnam soi ƀok Pơtao Hùng. ‘Nâu ưh khan lăp jing tơdrong hơdrin vei răk joh ayŏ so mă oei jing trong vă chĕp răk păng tơƀăk mong tơdrong joăt joe vei lăng Teh đak, tơgop hơmet ming grŭp tơgoăt pôm nơ̆r ƀơ̆r đon đĭ đăng hơdrĕch hơdrŭng tơ̆ tơring sơlam Tây Nguyên.

VOV4.Bahnar - Năr Yôk ƀok dơnơm Hùng, kon pơlei rim hơdrung Tây Nguyên vang lăng truh tơm a la chă hơdrĕch hơdrung, tơbăt jơhngơ̆m đon hôn bơnê hăm rim mĕ ƀă ya ƀok hlôi tơ iung pơjing teh đak. Mă đơ̆ng oei tơ̆ yơ, kon pơlei Tây Nguyên ling lang chĕp kơjăp nơ̆r pơtho đơ̆ng Ƀok Hô: “Rim Ƀok pơtao Hùng hlôi pơjing teh đak, ƀok sou bơ̆n hơdrin vei kơjăp teh đak”, pơm ăn jơhngơ̆m đon hưch hanh hơdrĕch hơdrung jing jơhngơm pran tơ iung pơjing pơlei pơla roi năr roi pơdrŏng ‘lơ̆ng liĕm.

VOV4.Bahnar – Lơ̆m mŭk drăm joh ayŏ kơ kon pơlei kon kông tơ̆ Tây Nguyên, chrah mul meo đei lăng jĭ tơdrong joh ayŏ kăp gĭt hloh. Mul meo pơsat kơ kon pơlei Bahnar tơ̆ Tây Nguyên ưh hơdrô̆ jĭ dôm tơmam drăm chrah ƀônh ƀŏ ôh, mă kiơ̆ đơ̆ng noh oei tơƀôh hơdah đon lui kơ tơdrong hơrih.