VOV4.Bahnar – Bơngai Êđê hơrih tơguăt hăm cham char plenh teh, đe sư lăng bri kông 'noh hnam, tơm dơnơm kơ tơdrong hơrih. Đe sư băt chă iŏk yua dôm tơmam drăm mă bri kông pơsư̆ ăn vă pơjing 'nhot xa ưh hơdrô̆ 'lơ̆ng mă akŏm ƀenh kơ tơdrong joh ayŏ hơdrung hơdrĕch kon pơlei kơdih. Hla tơnŭng, minh hơdrĕch 'long chăt hon tơ̆ jih đak, tơ̆ mir, hăp ƀăl iơ iă, jĭ minh lơ̆m dôm hla 'nhot kăp gĭt đei bơngai Êđê iŏk pơjing 'nhot tŭl ka hơ̆p.

VOV4.Bahnar - Mă đơ̆ng tơring Teh tơmăn đak krong Cửu Long đei lơ đak krong, hơbong đak, đei lơ kông lôk mă lei tơdrong tơtăm đơ̆ng Đảng- Teh đak hlôi tơlĕch lơ jên pơm trong truh dang ei um ai tơ̆ tơring âu đei tơplih tôch hơiă. Gơng, trong đei man kơjăp ‘lơ̆ng, trong yak hiôk hian, tơjur ƀiơ̆ jơnăr yak vih vât, chơ chuĕn tơmam ‘nŏh jĭ tơdrong ‘lơ̆ng vă tơring teh đei 9 tŏ đak krong âu jang tŏk, hơđơ̆ng jơhngâm mât lơ̆m chăl ‘nao.

VOV4.Bahnar - Ƀok Khamtay Siphandone, sơ̆ jang Kơdră Ƀan châ̆p hanh Trung ương Đảng Kon pơlei Kăch mang Lào, sơ̆ jang Kơdră teh đak, jang Thủ tướng teh đak Cộng hòa Dân chủ Nhân dân Lào lôch hơchăng. Vă tơƀôh đon bơnôh băt 'mêm kơ ƀok Khamtay Siphandone păng đei đơ̆ng tơdrong jang tơbôl kăp gĭt Việt Nam - Lào, Đảng, Teh đak Việt Nam hlôi tơchơ̆t akŏm Kơ-ŭ pơdoong ƀok Khamtay Siphandone kiơ̆ khôi pơkăp kơ-ŭ pơdoong lơ̆m jơ̆p Teh đak lơ̆m 2 năr noh năr 4 păng 5/4/2025. Tơdrong tơbôl kơjăp đơ̆ng Việt Nam păng Lào đei dôm chăl Kơdră pơgơ̆r kơ 2 Đảng, 2 Jưnŭm pơgơ̆r păng kon pơlei 2 teh đak akŏm jơhngơ̆m hơtŏk. Găn ga hloh 60 sơnăm jô̆ đơ̆ng iung jang tơbôl truh dang ei, tơdrong jang tơbôl kăp gĭt ou roi năr roi kơhret kơjă păng jang đei jơnei hloh.

VOV4.Bahnar – Dôm tơdrong roi tơbăt, tơguăt trong chă tơmang lăng đơ̆ng Đắk Lắk păng Phú Yên đei tơlĕch hrôih, vă pơm pơ ‘lơ̆ng hlŏh dơ̆ng tơdrong pơgơ̆r tơbăt 50 sơnăm tơblăh iŏk rơngei đĭ đăng tơring Pơbăh, pơjing đei 1 teh đak kơjăp ‘lơ̆ng; tơgop pơm hơtŏk tơdrong chă tơmang lăng, năm truh đon pơhnŏng jang tŏk mŭk drăm tŏk hlŏh 8% nhen hlôi tơlĕch.

VOV4.Bahnar - Chu-ru jĭ minh lơ̆m dôm hơdrung bơngai kon kông kơtuei măt bơngai hơrih đunh đai tơ̆ tơring Tây Nguyên, oei hơrih jang xa mă tơm noh tơ̆ dêh char Lâm Đồng păng Ninh Thuận. Mă tŏ sĕt măt bơngai mă lei bơngai Chu-ru adoi oei vei răk đei um ai joh ayŏ kon kông kơdih, atŭm hăm khôi juăt kră sơ̆ păng tơdrong hơri bua pơđơ̆k, tơroi hơ-'mon păng lơ brŏ kon kông.

VOV4.Bahnar - 50 sơnăm đơ̆ng rŏng kơ tơblăh rơngei dêh char Quảng Nam, tơring groi kông, tơring kăn kư̆ kăch mang lơ̆m khei ‘năr tơblăh sơ̆ dang ei hlôi pơjing lơ anih chă tơmang lăng lơ̆m tơpôl, sơng đei lơ tơmoi truh. Dôm tơmam chă tơmang lăng tơklep hăm cham char bri brăh păng tơdrong joh ayŏ kơ dŏ xoang kơ kon pơlei kon kông tơ̆ tŏn bŏk bri kông Trường Sơn ‘lơ̆ng rŏ gô tơgŭm ăn kon pơlei tơ̆ âu đei iŏk yoa sơđơ̆ng ‘lơ̆ng.

VOV4.Bahnar – Anih vei lăng kon pơlei apŭng Phú Thiện pơgơ̆r lêh soi kơ yang ‘mi đơ̆ng Yang Pơtao Apui păng tơdrong thi jŏh ayŏ kơ dŏ xoang, tơplŏng kơdâu kơ dôm hơdrĕch kon kông ‘măng mă XVI.

VOV4.Bahnar – Tơ̆ pơlei Kon Trang Long Loi, thĭ trơ̆n Đak Hà, apŭng Đak Hà, dêh char Kon Tum đei bre klo hơkăn ngê̆ nhơ̆n A Thui păng Y Nhui (bơngai Rơ Ngao, minh hơdrung bơngai klah kơ hơdrung Bahnar) dăp đon dăp bơnôh hăm tơdra hơri juăt jue. Hăm tơdrong lăp akŏm ăn joh ayŏ kon kông, klo hơkăn ngê̆ nhơ̆n ou ưh hơdrô̆ chih akŏm, pơcheh, pơdah ,ă oei pơtho tơdra hơri kră sơ̆ ăn đe mơlôh, tơgop vei răk tơƀăk mong um ai joh ayŏ Rơ Ngao.

VOV4.Bahnar - Chrôi Rum Chếk (lêh pŭn ai đơ̆ng đak dơsĭ) đei năng jĭ 1 lơ̆m dôm tơdrong lêh so đơ̆ng sơ̆, đei lơ tơdrong juăt ‘lơ̆ng đơ̆ng bơngai Khmer. Lêh âu tôch gĭt kăl vă soi apinh yang tơjur tơdrong pŭn ai, sơđơ̆ng ‘lơ̆ng ăn bơngai năm tơ̆ đak dơsĭ jang xa hiôk hian, rôp yâu đei lơ kang hơdang păng bơngai kơ yang đak dơsĭ hlôi păngăn kon bơngai ka hơdang jrăh jrai.

VOV4.Bahnar - Buôn Ma Thuột –tơring teh bri kông să seng Tây Nguyên, tơring ƀou phu tru hŭt kaphê hlôi jing minh pah kơ tơdrong joh ayŏ ưh layơ kơƀah lơ̆m tơdrong hơrih rim năr. Rim 'măng năm truh Ban Mê, buăl adoi đei huch kaphê đei pơm hăm lơ trong phara băl, ƀenh kơ um ai joh ayŏ kon pơlei tơ̆ tơring, pơm lăp đon kon bơngai.